Issuu

Si früürt, der Ofe git z weni Wermi. Ir Schlafstube zieht si ds Bruutchleid ab, hänkts a ne Bügu, nuuschet es feschts Jupe u ne warmi Jagge us em Foto: Nicole Philipp

Göferli, zieht der rosarot Schal vo Ängland um d Schuutere, het geng no chaut, aber vo inne. Verena Blum-Bruni erzählt einfühlsam die erschütternde Geschichte ihrer Tante Frieda Geb. 1948 in der Länggasse, auf gewachsen in Bern und Köniz. Sie war ursprünglich Primarlehrerin, studierte später Geschichte an der Universität Bern und wurde Sekun darlehrerin. Lehrtätigkeit im Berner Oberland und Arbeit am Staats archiv Bern bis zur Pensionierung. Die Autorin lebt in Liebefeld, Köniz.

und stellt die Frage, ob es heute besser steht um die Rechte der Frauen in der Schweiz.

Verena Blum-Bruni

Bei Zytglogge erschienen: «Chlyni Grööggeli u gschickti Häng» (2024) «Zwüsche Fröid u Fäudgrau» (2022) «Chüderle u chutte» (2020) «Huufyse mit Gomfi» (2019)

rosarot u pächschwarz

Verena Blum-Bruni

ISBN 978-3-7296-5223-1

9 783729 652231

rosa rot u päch schwarz Ds rächtlose Läbe vor Frieda Rosa

Anfang des 20. Jahrhunderts wächst Frieda Rosa in Muri bei Bern mit drei Geschwistern in einer fröhlichen Familie auf. Seit ihrer Kindheit ist der kleine Bruder ihr engster Ver bündeter. Mit ihm lernt sie Auto fahren und ihm schreibt sie Briefe, als sie als Gouvernante im Ausland arbeitet. Zurück in der Schweiz, eröffnet die ausgebildete Modiste ihr eigenes Hutgeschäft – den Mietvertrag darf sie als Frau nicht selbst unterschreiben. Trotzdem: Frieda ist stolz und glücklich. Am Tag ihrer Hochzeit nimmt ihr Glück ein jähes Ende. Ihr Ehemann entpuppt sich als Lügner und Tyrann. Von einer frauenfeindlichen Gesellschaft und ihren Gesetzen im Stich gelassen, versucht Frieda, ihre Freiheit wiederzuerlangen.

Autorin und Verlag danken für die Unterstützung :

Der Zytglogge Verlag in der Schwabe Verlagsgruppe AG wird vom Bundesamt für Kultur mit einem Strukturbeitrag für die Jahre 2026 – 2028 unterstützt.

MIX Papier aus verantwortungsvollen Quellen

www.fsc.org

FSC® C083411

© 2026 Zytglogge Verlag, Schwabe Verlagsgruppe AG, Basel Alle Rechte vorbehalten Lektorat : Fabio Mussi Korrektorat : Jakob Salzmann Coverbild : Frieda Rosa, ca. 1926, Foto aus privatem Familienalbum Covergestaltung : Andreas Färber, mittelstadt 21, Vogtsburg-Burkheim Bildaufbereitung : Thomas Müller Fotografie, Allschwil ; Fred Braune, FdB – Für das Bild, Bern Layout/Satz : rdz IMA GmbH, Bonn Druck : CPI books GmbH, Leck Herstellerinformation : Zytglogge Verlag, Schwabe Verlagsgruppe AG, St. Alban-Vorstadt 76, CH-4052 Basel, info@zytglogge.ch Verantwortliche Person gem. Art. 16 GPSR : Schwabe Verlag GmbH, Marienstraße 28, D-10117 Berlin, info@schwabeverlag.de ISBN : 978-3-7296-5223-1 www.zytglogge.ch

Verena Blum-Bruni

ROSAROT U PÄCHSCHWARZ Ds rächtlose Läbe vor Frieda Rosa

Es spannends Stück Schwyzer Sozialgschicht us de Jahr um 1930, dere Epoche, wo Froue praktisch kener Rächt hei gha u nam Hürate nume mit em Yverständnis vom Ehemaa hei dörfe schaffe – genau wie my Tante Frieda Rosa.

Inhaut Angersch oder besser? . . . . . . . . . . . . . . . . . . . . . . . . . . . . . . . . . . . . . .

Masschleidig u Munichrine . . . . . . . . . . . . . . . . . . . . . . . . . . . . . . .

Puderdose u Porridge . . . . . . . . . . . . . . . . . . . . . . . . . . . . . . . . . . . . . .

Obacht u Outo . . . . . . . . . . . . . . . . . . . . . . . . . . . . . . . . . . . . . . . . . . . . . . .

Schnudernase u Seifechischte . . . . . . . . . . . . . . . . . . . . . . . . . . . . .

Zöpf u Zytgeischt . . . . . . . . . . . . . . . . . . . . . . . . . . . . . . . . . . . . . . . . . . . .

Hüet u Hüehnermischt . . . . . . . . . . . . . . . . . . . . . . . . . . . . . . . . . . . .

Hung u Hochzyt . . . . . . . . . . . . . . . . . . . . . . . . . . . . . . . . . . . . . . . . . . . . .

Sprysse u Splitter . . . . . . . . . . . . . . . . . . . . . . . . . . . . . . . . . . . . . . . . . . . .

Schock u Schmärz . . . . . . . . . . . . . . . . . . . . . . . . . . . . . . . . . . . . . . . . . . .

Herr u Hirt . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

Rächt u Richter . . . . . . . . . . . . . . . . . . . . . . . . . . . . . . . . . . . . . . . . . . . . . . 107 Cherzli u Chnüpple . . . . . . . . . . . . . . . . . . . . . . . . . . . . . . . . . . . . . . . . . 121 Besser oder angersch? . . . . . . . . . . . . . . . . . . . . . . . . . . . . . . . . . . . . . . 127 Bildnachweise . . . . . . . . . . . . . . . . . . . . . . . . . . . . . . . . . . . . . . . . . . . . . . . . 130

Angersch oder besser ?

Guldigi Sunnestrahle lüüchte uf ere schwarze Marmorplatte, das sy i myre Chindheit di erschte Erinnerige a d Tante Frieda. I stah mit mym Vatter, Friedas Brueder, z Muri uf em Fridhof bym Sydebärg u lege wie jedes Jahr im Novämber es Wintergsteck uf ihres Grab. Si syg chrank gsy, erklärt är, u na mym müehsame Frägle heissts de, sy Lieblingsschwöschter syg truurig gsy u a däm gstorbe. Nach intensivem Bohre erfahren i meh. Ihres Läbe chunnt mer vor wie nes riisigs Chrüzworträtsu, immer wider füut sech es Hüseli u i sueche fieberhaft nam Lösigswort. Nach mehrere Jahr isch es komplett. Es heisst «rächtlos» u isch der Chärne vo Friedas Gschicht. Hüüfig ghören ig, früecher syg aues besser gsy. De losen i gnauer. Tönts nach Nostalgie u glücklecher Juget oder nach vergässene Schwirigkeite we nid verdrängte? Ischs früecher würklech angersch gsy oder äbe besser? Pariert me, isst uus u gsehts eifach angersch? Ghört Abeschlücke u Dryschicke denn eifach zum Autag? Aus jungi Lehrere darf ig nar Yfüehrig vom Frouestimmrächt 1971 nöierdings wähle u abstimme. Der Schuelinschpäkter gratuliert mer zum Hochzyt u fragt: «Dörft Dir wyter Schuel gä, isch Öie Maa dermit yverstange?» Sy harmlosi Frag fahrt mer y wie ne zümftige Stromschlaag u elektri-

siert mi wie ne heftige Blitz vom Himu obenabe bis tief i d Ärde. Genau i däm Momänt chunnt mir my Tante Frieda Rosa i Sinn, wo nam Hürate 1936 gärn möcht bruefstätig blybe, aber ihre Maa verbietets. Punkt. I rächne nache: Genau 90 Jährli isch das männleche Verdikt gäge my Tante här. Je lenger ig über ihres Bruefsverbott hirne, umso meh rumplets u reklamierts i mir. Ersch itze packt mi d Gschicht vor Frieda richtig, hertnäckig wott i aues wüsse. Es isch chuum zum Gloube, was i ihrem churze Läbe abgangen isch u vor auem wie. D Biografie vo myr Tante Frieda Rosa zeigt ydrücklech es Stück Schwyzer Sozialgschicht über d Froue im erschte Drittu vom 20. Jahrhundert. Rosarot u heiter faat ihres Läbe aa u ändet pächschwarz. Ihri Gschicht laat mi bis hütt nid los u zeigt, dass denn i üser Demokratie d Froue aus politisch ohnmächtigi Wäse nüt hei z lache gha. Glychberächtigung isch für d Mehrheit vo de Manne es rots Tuech. Wo chämt me o häre mit Froue, wo sowiso ke Ahnig hei vor Politik? Das isch kes Wunger: Bis zum Frouestimm- u -wahlrächt 1971 brüete usschliesslech Manne d Gsetz uus, d Parlamentarier, o aues Manne, diskutiere se, u we si aagnoh sy, gäute si für aui – männlechi u wyblechi Pärsone ir Schwyz. Ds Zivilgsetzbuech ZGB vo 1912 bestimmt ds Läbe vor Frieda, dert isch d Macht vo de Manne feschtgschribe u dermit o d Ohnmacht vo de Froue. Mit chly Glück erben ig ds private Material über d Frieda: Schachtle mit Biuder, Akte, Ordner, Briefe.

Mündlechi Brichte vo ihrne Gschwüschterti erloube e Blick i ne Epoche, wo fasch mittuauterlech erschynt, aber ersch nünzg Jahr här isch. My Frag: Ischs hütt angersch oder besser mit de Rächt für d Froue?

Masschleidig u Munichrine

Vor em bodelänge Spiegu im Gang steit stouz di eufjährigi Frieda u bewunderet ihres prächtige Geburtstagsgschänk, Haarlätsche us richtiger Syde ir Lieblingsfarb: Tiefrosa. Die schmücke ihrer dunkubruune Zöpfli. Geng wider berüehrt si die Pracht, wo guet zu ihrem Name passt, nämlech Frieda Rosa. Fyn raschle di Koschtbarkeite, we si se aalängt. Söu me di Wunderwärk nume am Sunndig trage oder scho morn? Ihri Familie wohnt z Muri ar Pourtalèsstrass drü im grüümige Huus mit drei Wohnige, dernäbe steit der Houzschopf, drann abboue der Stau. D Wärchstatt oder Buddigg ligt im Chäuer. Uf em solide Wärchbank rüschtet der Vatter, der Zimmermeischter Fritz, d Bäuke, misst u zeichnet, kontrolliert geng wider u isch umgä vo spannende Sache: verschide grosse Saagine, Hoble, verschide dicke Seili, Chauberhäuslige, Bleistift u Winkumäss. Im Schopf näb em Wohnhuus lagere längi, schwäri Vierkantbäuke us Houz, o dert wunderbari Versteck. Guet verschlüüffe cha me sech o im Stau, wo ds Ross huset, der Faub, e brave Freibärger. Dä spannet der Vatter vor e Wage, we är di fertig zuegrichtete Dachbauke füehrt. Sorgfäutig befeschtiget är se mit schwäre Seili oder liechte Chauberhäuslige uf em länge Wage u

begleitet di Fuehr zur Bousteu. «Sorg ha zur Sach» isch sys Läbesmotto. Der Vatter isch dür u dür e Höuzige, dänkt gärn zrügg, won är nar Meischterprüefig aus Zimmermaa z Bärn am Stadttheater het mitghuufe bym Dachstuehl, aues nöischti Technik. Das färbt ab, u won är z Muri aafangs vom 20. Jahrhundert es grüümigs Huus für d Familie u sys Gwärb errichtet, muess sogar e Terrazzomacher us Italie häre für wasserfeschti Böde. Warum settigi Schiggane? I aune dreine Wohnige gits – denn no e Säuteheit – e Toilette mit Wasserspüelig u ne Zinkbadwanne. Es wär schlimm, we d Houzböde Wasserfläcke überchiemti – auso o dert e Fachmaa. Äxtra sorgfäutig drechslet der Meischter d Handlöif vom Stägegländer u schnitzt mit em Gseu Houzpföschte, wo i chlyne Pyramide ände. Dert dranne hett me sech uf de Zwüscheböde, we me di nöie acht Tritte i Aagriff nimmt. Die rugge heimelig u süüfzge lyslig: «Wider eine, wider eine», bis me vor der Wohnigstüre steit. Eigetlech isch hütt e bsungere Tag, d Störschnydere chunnt verby. Es git keni fertigi Chleider im Warehuus z choufe, me treit vo de grössere Gschwüschterti nache, u mängisch macht d Schnydere öppis Nöis. D Frieda isch ganz ufgregt u fröit sech tagelang druuf. Si luegt hurtig i d Stube. Dert isch e Stimmig wie a re Fäudschlacht mit Textilie u Wärchzüüg. Ihrer zwo Schwöschtere stecke d Nase scho i verschideni Stoffbaue, schmöcke dranne, ver-

glyche, stöh vor e Spiegu, male sech der fertig Rock us, gryffe nach nöie Gwäb u mache nes riisigs Gheie, stürze sech uf di bunte Stoffe, möchte es bestimmts Schnittmuschter, diskutiere, ändere – es geit zue wie uf em Märit z Marrakesch. Uf em Tisch lige verschide längi Schärine, e Lineal, Fadeschlagroue, farbigi Fäde u Druckli mit Chnöpf i aune Farbe, derzue spitzigi Gufe, Sydepapiir, Chryde u Rouele mit verschidene Stoffe, je nach Gschmack es Riisegnusch. Deheime by sich macht d Schnydere d Zueschnitte u näjt di Bitze mit ere grüene BerninaTrättmaschine zäme. Friedas Schwöschtere hei sech offebar scho ustobet byr Stichlitante, es lige blüemleti, gstreifti u schwäri, blaui Mantustoffe u passendi Fuetter schön bigelet uf em Kanapee: chlyni Päckli mit de Näme u de Mäss. Derzue Stoffmüschterli, bsungeri Wünsch, aues notiert d Schnydere exakt uf emene Zedu. Nach länge Diskussione, Widererwägige u nöiem Sondiere ischs ändlech so wyt, d Bstellige sy fertig. Itz chämt d Frieda dra, si isch ganz dürenang, aber zersch het si no e heikli Ufgab. Es geit um ihre vierjährige Brüetsch, wo das Chleider-Prozedere im Gägesatz zu ihre inbrünschtig hasset u sech drum verschloffe het. Dä isch weder ir Wärchstatt no im Houzschopf, es isch zum tubetänzig wärde, d «Gufehäx» stinkt ihm gruusig. Mit ihrer Brüue zvorderscht uf em Nasespitz, em Nadlechüsseli am Handglänk, emene länge Santimeter um e fautige Haus, wo sech bewegt

wie ne mageri Schlange, nimmt si aube Mäss für nes nöis Chitteli oder nöii Hose, leit ihm das blöde Stoffseili um e Haus, dass er schier erstickt, wien är bhouptet, när misst si der Rügge, d Ermu, der Buuchumfang, churz: es müehsams Prozedere. Si murmlet ihre Zouberspruch, genauer: si chribelet d Resultat uf enes Hüseliblatt mit em Name vom Opfer u brümelet derzue. Das isch der erscht Akt. Nach zwo Wuche rückt si wider aa, de heissts schön grad uf e Tisch stah, i d Provisorie schlüüffe, u de überprüeft si ihri Büez. Wes sitzt, chlepft si bis zum dritte Mau no ds Fuetter yne, macht Chnopflöcher, büezlet Chnöpf dra, de isch d Lydeszyt verby. Währet der müehsame Suechi nam jüngschte Chund niflet d Frieda nomau vor em Spiegu ungeduudig a ihrne rosarote Haarlätsche ume, het e Idee, när stiflet si diräkt i d Buddigg zum Räschtesack, sticht mit em Zeigfinger dry, es quiitschet luut, si packt der chly Sünder u bringt ne ufe. Itz geits tifig, d Gufehäx misst ne u zeigt uf bruun-graui Tweedstoffe. Är dörf useläse, huuchet si gnädig, aber är macht e Mouggere, die Waar gfaut ihm nid, wahrschynlech chratzet das grübelete Züüg. Churz dütet är wortlos uf ene Stoffbitz, seit Merci für ds Güetzeli, won ihm d Frieda zuesteckt, u tubet erliechteret ab. Aber itze chunnt Friedas Stündli ändleche. Sorgfäutig erlist si d Waar, dräjt d Stoffe vor Vorder- uf d Rücksyte, leit e Bahn über d Achsle, poschtiert sech dermit vor em Spiegu, luegt kritisch. Passt der

Stoff zu de nöie Haarlätsche oder tuet das enang weh? Si pröblet, wägt ab wie d Chünigin vo Ängland für ne Staatsrobe, seit d Schnydere zum Gspass. Di jungi Chundin usmässe, wo wider gwachse isch, der Schnitt vom Röckli bespräche, nomau vor e Spiegu ga glüssle, itz längts. Bis d Vorbereitige düre sy, bruucht d Schnydere ds letschte Räschteli Geduud, u si seit lysli, us dere Tochter gäbs de speter e Stoffigi, auso eini, wo mit Mode z tüe heig. Natürlech pässlet d Frieda ungeduudig uf d Schnydere, wo nach zwo Wuche aatrabet. Di nöie Haarlätsche müesse häre, si passe zum Chleid: sech cheere u dräje vor em Spiegu, de Eutere di nöii Montur vorfüehre, mit em ne Müntschi Merci säge u am nächschte Sunndig dermit z Predigt ga, nid wäg em Pfarrer. Im Chinderquartett z Muri steit d Rangornig fescht, ömu fasch. Di Eutischti, d Emma, 1901 gebore, amtet aus Steuverträttere vor Muetter u git de Jüngere der Tarif düre. D Frieda, di Zwöiti vo 1904, hets nid gärn, we me chääret u zigglet, u mit der Dritte, der Martha vo 1909, gits hüüfig Chritz. Der Ärnscht, der Jüngscht, tituliert se aus Gwitterchischte u Gäxnase, si beschimpft ne aus Breimarder u Grotzli. Di zwöi stöh meischtens uf Chriegsfuess. Eigetlech isch d Martha e haube Bueb, aber äbe es Meitschi u drum furchtbar nydisch uf e Jüngschte. Dä darf uf Böim ufegogere, uf em Hosebode d Stäge

abepfure, d Chleider verrysse, luut pfyffe, uf em Leiterwägeli der Stutz ab tschädere – aues Sache, wo sech für Meitschi nid schicke u sträng verbotte sy. Auso stouet sech zwüsche de zwöi Jüngschte e ganze See vou Aggressione. D Rettig, wes wider einisch chnirschet, isch meischtens d Frieda. Sibe Jahr sy d Frieda u der Nachzügler usenang, si häbe zäme wie Päch u Schwäfu. Em Schnuderi chunnt geng öppis i Sinn: de angere Schwoschte d Schue verstecke oder d Bändle heftig verchnüpple, ds Velo lüftele, serigs isch Autag. D Frieda biegt mängs zwäg, aber es klappet nid geng, u de verwandle sech di Betroffene i rasendi Furie, wo ihrer Fingernegu gekonnt a de Arme vom Chlynschte aus Waffe ysetze. Der Storch heig glaueret bym Nachzügler, heig dä arm Bueb im himmlische Magazin vergässe u verspätet usgliferet, auso ersch 1911 la gheie. Das Gschichtli vom Storch überchunnt der Bodesuri vo de Schwöschtere geng z ghöre, si lache ne uus, u d Frieda tröschtet de. Drum hasset är die waggelige Vögu mit de schwarz-wysse Fädere u de länge, orange Bei, wo öppe vor Aare här aaruusche. Ds Chinderläbe isch nar Jahrhundertwändi nid eifach. Me muess sofort aatrabe, we öpper rüeft, muess d Schue am Scharryse rybe, we me vo dusse chunnt, me wäscht d Häng vor em Ässe, me wünscht sech e Guete, me redt nid mit vouem Muu, me isst uus, me leit d Chleider ordeli über e Stuehl am Aabe, me sunndiget sech, we me i d Chiuche geit, me redt nid

wüescht. Es Fueder vo dene blöde «me» macht eim ds Läbe schwär, es wott nid höre. Zum Grüesse git me ds rächte, schöne Handeli, u scho geits wyter mit de Vorschrifte: graad sitze am Tisch, nid dryrede by de Erwachsene, Sorg ha zu de Chleider, nid fräch wärde gäge d Schwoschte, der Brieftreger nid erchlüpfe hinger em Gartetöri u luut brüele, es het kes Änd. Maniere säg me däm auem, wo me müess oder nid dörf, erklärt d Muetter mängisch mit weni Würkig by ihrem Quartett. Es schmürzelet hüüfig tagelang unger de Ching, aber wüu me nid dryschlaat – o eis vo de berüehmte «me» –, gits chlyneri Vorgfächt bym Ässe. Dert redt me nume, we me gfragt wird, aber es git ja Füess u Euböge, u we mes gschickt macht, cha me gäbig usteile. We di unterirdische Gingge auzu heftig wärde, muess me mit sym Täuer i d Chuchi u dert eleini wyterspachtle. D Muetter het ds Choche glehrt u zouberet geng Feins uf e Tisch, es isch e Fröid, zuechezhöckle. We eis Geburtstag het, leit si es Chränzli us Greser u Blüemli um ds Täuer, ds Geburtstagsching darf es Lied wünsche, auso «Der Hansli am Bach» oder «Ha am eene Ort es Blüemli gseh». Wüu aui gärn singe, tönts fröhlech bis i d Buddigg abe. Wunderlig isch niemer bym Ässe, aber we «lapin provençal» uf e Tisch chunnt, isch d Stimmig am Gfrüürpunkt. Schliesslech het me gwüssehaft ds Ämtli wahrgno u guet zu dene Tablarchüe gluegt.

U no by no öppis angerem si sech di zwöi jüngschte Zanggtüüfeli einig u zieh e Lätsch: wes Zunge mit Härdöpfustock a re wysse Sosse git. Dert drin schwümme si ume, die grüene, blöde Chügeli, die Gschoss, wo eim ds ganze Ässe verderbe. Scho wider het me grad mehreri vo dene Dinger entdeckt, abeworgge geit nid, i Stock drücke isch schad für d Härdöpfle, was itze? E liebe Blick zur Frieda, die grüene Gschoss a nes Hüüffeli drücke, das mit der Gable blitzschnäu uf ihres Täuer befördere, si schlückt di gruusigi Ladig abe, u itze cha mes gniesse. Für ihri Kaperehiuf revanchiert sech der Ärnscht u guslet us Friedas Zimmer Spinnele, Müüs u Mugge mit em Bäse füre u pängglet se schwungvou i Garte. D Martha git ere vom Sunndigsdessert drü Löffeli brönnti Creme ab u nes einzigs Brätzeli. No öppis beherrscht der Chlynscht besser aus di grossi Frieda, är cha luut pfyffe u das sogar steigere, we är Zeig- u Mittufinger vo beidne Häng i ds Muu steckt. So tönts no viu durchdringender. D Frieda üebt, aber der Grööggu chas eifach lüter. Na mängem Versuech gratets o ihre. Aber Achtung: «Meitschi pfyffe nid», seit d Muetter sträng. Auso üebe die zwöi bym Stärne obe u mache em Worber Konkurränz, wo dert um e Rank quiitschet. Ja, d Jungmannschaft isch ygspannet u wird bruucht. Drum die cheibe Ämtli: Tisch decke, abwäsche, abtröchne, fuettere, mischte, der Söichübu mit em Charrli ga lääre bym Puur im Thoracher, ir Pflanzig

schaffe, jätte u Steine useläse, enang häufe bym Bette u früsch Aazieh, di sächs Stäge wüsche u mängisch mit Bodewichsi traktiere. Au sächs Wuche gits es riisigs Wärch, di ganzi Wösch. Zersch d Seili spanne zwüsche de Böim, Stäcke derzwüschesteue, so dass nüt a Bode lampet, di dräckigi Wösch yweiche, am schreege Wöschbrätt yseife, Houz nachestosse im Wöschhafe, dert inne di ygseifeti Waar la plodere u tou rüehre mit em Houzpänggu, usezieh, mit em Blächstünggu ds Seifewasser usedrücke, spüele, di suberi Waar i Houzzüber füue, uf ds Eyredercharrli lade, d Wösch mit Gäbeli am Seili ir Hoschtett befeschtige, ei Chrampf, aui häufe mit. Der Jüngscht reckt d Gäbeli us em Buuchsack bym Ufhänke, vo de Grössere isch jedes yteilt by der schwäre Arbeit oder verantwortlech für ds Choche. Me teilt d Arbeit uuf, je nach Auter u Chönne vo de Ching. Villecht schnödet öpper Hüttigs über di damaligi Chinderarbeit, über fählendi Freizyt, über die straff ygspannete Ching, wo mängisch schier e Chnächt ersetze. Achtung, bevor mir Vorurteil uselö, es git zu dere Zyt eigetlech keni Maschine u Huushautgrät, wo ds Läbe erliechtere. Praktisch aues macht me vo Hang. D Familie isch nämlech bis wyt i ds 20. Jahrhundert nid nume e Läbes-, sondern o e Produktionsgemeinschaft. Nötig zum Häufe sy usser de ganz chlyne Stümpe aui, niemer cha sech pfääje. Das giut nid nume by de Puure, sondern o ir Familie z Muri,

es bruucht aui, vom chlyne Handeli bis zur starche Hang. Für d Mithiuf gits mängisch e Belohnig, wo höch im Kurs steit: Ysebahn fahre zu Friedas Gotte mit der Spiez-Erlebach-Zwöisimme-Bahn, wo syt afangs Jahrhundert dür d Cheere rugget. Munichrine isch en Art es Zouberwort für Friedas Familie, es Paradies us Gras u dunkle Tanne, wo me währet der kurveryche Reis mit der ersch grad eröffnete Bahn durchquert. Ruehig drötschgelet si di tuusig Kurve dür ds Simmetal uuf, schnuusset näbe wunderbar zimmerete Puurehüser düre, wahri Meischterwärk vor Zimmermaaskunscht. Das isch äuä ds heimleche Motiv vo Friedas Vatter, emne Höuzige, für immer wider dür d Ränk ufe z gondele. Aui vier Ching hange a de Fänschter, wo me nam Abestosse besser cha useluege, u höckle vergnüegt uf de Houzbänkli. Der Vatter redt nie vo Simmetal, mängisch heissts o Munichrump. Zwüschyne pfyfft d Loki chyschterig u tschäderet dür nes Tunäu, d Manne rouke Tubakpfyffe oder stinkigi Stümpe, Hüser u Schöpfli flüge verby u mängisch ganzi Chüe. Das Fahri isch d Belohnig vo de Eutere für ds Mitmache vo de Ching byr tägleche Huus- u Gartenarbeit. Wohär dä Name Munichrine oder Munichrump? D Gras- u Miuchwirtschaft sicheret d Exischtänz vo mängem Simmetaler. Gärschte u Weize wachse dert chuum, öppe es paar munzigi, suuri Öpfeli. Drum entwicklet sech nam 18. Jahrhundert d Viehzucht u macht ds Tal berüehmt. Die rahne, fyne, rot-wyss

gfläckete u robuschte Tierli erobere nid nume ds Tal, usgwandereti Puure nähme se sogar mit uf Oschtpreusse oder Amerika. Die schöne Chueli sy kener hochzüchtete Miuchfabrigge, sondern si sy bärggängig u chöme o uf stotzigem Gländ guet z Schlag. D Nachfrag nach dene Tier wird gross, es entsteit e ryche Handu, u mänge vo dene Züchter bout sech es bravs Simmetalerhuus, drum ds Inträsse vo Friedas Vatter, em Zimmermeischter. Är rüehmt di graue Schindledecher u di prächtige Flachschnitzereie a de Fassade mit em typische Blockmuschter, das syg schöner aus e Steihuuffe. Wahrschynlech geischteret ihm denn scho sys spetere Feriehuus ar Länk dür e Chopf. Z Oberwil stygt me uus, düüsselet uf em rütschige Wägli ds Bort ab, überquert di tosendi Simme uf der Houzbrügg näb der Wirtschaft «Heideweidli» u pyschtet änenache wider obsi. Das isch sträng. D Ching sammle wyssi Steine oder Schnäggehüsli, der Vatter öigeret nach de brave Hüser mit de Loube linggs u rächts, u nach ere haube Stung isch me bym Silberbüehl. Muetters Schwöschter Elise, Friedas Gotte, wohnt dert mit ihrem Maa Jakob, em Fläckviehzüchter, im ne prächtige Houzhuus. Zersch grüesse, bevor aui a d Brunneröhre hange, när brichte, höckle u natürlech d Waar im Stau bewundere. Villecht e Jass für die Grosse, när e toui Röschti mit chemigröikter Hamme, es Gaffee mit säuber brönntem Chrüter, u de sy d Ching chuum meh z häbe. Itz chunnts uus, jedes zeigt, wie guet dass es scho cha mäuche, o der Vatter

macht mit. Bym Mäuche gits e stränge Comment. Zersch wäscht me d Häng dusse, när seit me der Chue ihre Name, steut sech säuber o vor, strychlet se, aarüschte, uf ds eibeinige Stüehli hocke, vorhär d Finger mit Mäuchfett us em Büchsli yrybe u de ersch – bestimmt, aber ja nid ruuch – a der Zitze zieh, bis der fyn Strau glychmässig i d Mäuchtere fliesst. So u nid angersch, erklärt der Jakob, ds Tier gäb eim ja d Miuch, de müess mes o aaständig behandle. D Frieda u der Vatter hei ihres Mäuchterli geng zersch vou. Der Unggle rüehmt d Frieda, si syg aus Mittuschüelere scho ne haubi Püüri, da lachet si stouz u merkt, mäuche isch würklech es Gä u nes Näh. Ds Läbe dert obe, wo ganz angersch isch aus deheime, gfaut ar Frieda. Mängisch nimmt se der Unggle mit uf e Viehmärit bym Heideweidli. Das isch spannend, är füehrt se y i d Kunscht vom Punktiere, auso z bewärte, was es schöns Tier isch u choschtet. U no öppis Spannends erklärt är, nämlech, wie är isch zu syr Elise cho. Für vo Huus z gah u Lüt lehre z kenne oder sogar e Ehepartner ufzgable gits kes Internet, ke Disco, aber angeri Glägeheite: Tanzsunndige oder Märite. Uf em Viehmärit loufts eso: Me erhandlet nid nume Grosstier, sondern glägetlech o Ehepartner. So geits bym Jakob u byr Elise. Aus Chöchi im Heideweidli gratet si am Viehmärit a ihre zuekünftige Maa. Me gschouet enang, tanzet zäme byr Wirtschaft ar Simme, u ds Ganze ändet

nid nume bym ne Chuehandu, sondern für beidi bym ne Hochzyt. D Elise wird Gotte vor Frieda. Jede Summer geit ds Tandem Ärnscht–Frieda i d Ferie im Munichrump. Wo si euter wärde, häufe si brav mit, zersch bym Höie, när im Stau. D Frieda mäuchet gärn, es gfaut ere, uf em Stüehli zwüsche de warme Tier z sitze u mit de Häng sanft, aber bestimmt der koschtbar Chuesaft usezzieh. Der Brüetsch mischtet, ströit y, aber lieber verhout är Schytter zu fyne Spittli uf em Schyttotze. Geng isch Arbeit ume: Wasser hole am Brunne usse, der schwarz Herd yfüüre für ds Choche, ds Wäsche u der Houzbode z fäge. Änds Jahr schänkt d Elise ihrem Gottemeitschi zur Wiehnacht geng e rächteggige Läbchueche mit gwäueletem Zuckerguss am Rand u emne toue Bär mit roter Zunge ir Mitti. Wichtig sy di glänzige, grosse Münze i aune vier Egge, drum heisst d Elise Füflibergotte. D Ching us der Stadt bestuune i ihrer Chuchi ds offene Chemi mit Rouchwürscht drinne u erläbe i yschchaute Winternächt, we si im Ofegade schlafe, wie sogar der Abwäschlumpe ir Chuchi gfrüürt u a de Fänschterli ir Stube am Morge früech prächtigi Ysblueme prange. Chauti, aber heiteri Tage us Friedas Juget im tief verschneite Oberland.

Si früürt, der Ofe git z weni Wermi. Ir Schlafstube zieht si ds Bruutchleid ab, hänkts a ne Bügu, nuuschet es feschts Jupe u ne warmi Jagge us em Foto: Nicole Philipp

und stellt die Frage, ob es heute besser steht um die Rechte der Frauen in der Schweiz.

Verena Blum-Bruni

Bei Zytglogge erschienen: «Chlyni Grööggeli u gschickti Häng» (2024) «Zwüsche Fröid u Fäudgrau» (2022) «Chüderle u chutte» (2020) «Huufyse mit Gomfi» (2019)

rosarot u pächschwarz

Verena Blum-Bruni

ISBN 978-3-7296-5223-1

9 783729 652231

rosa rot u päch schwarz Ds rächtlose Läbe vor Frieda Rosa

Verena Blum-Bruni: rosarot u pächschwarz