Surselva Tourismus AG Glennerstrasse 22a 7130 Ilanz Schweiz
Tel. 0041 81 920 11 00 Fax 0041 81 920 11 01 info@surselva.info www.surselva.info
Communicaziun allas medias dils 01 da fenadur 2026
Via Glion crescha vinavon: Era la siatavla etappa raquenta sias historias Glion, ils 01 da fenadur 2026 La Via Glion survegn in ulteriur capetel: Suenter ch'ins ha equipau igl onn vargau l'emprema etappa denter Glion, Ruschein, Ladir e Siat cun tablas d'informaziun, ei ussa era la siatavla etappa da Riein sur Sevgein e Castrisch a Glion vegnida cumpletada cun historias plein tensiun ed informaziuns. Cunquei ein gia duas dallas totalmein siat etappas dalla Via Glion preparadas sco vias d'aventura culturalas. Las ulteriuras etappas suondan ils proxims onns. Tredisch staziuns plein historia e historias La nova etappa meina dil coc dil vitg da Riein giu a Sevgein e Castrisch entochen a Glion. Tier total tredisch staziuns intervegnan viandontas e viandonts fatgs interessants davart eveniments historics, persunalitads ed atgnadads localas. Las historias muossan a moda impressiunonta con multifara ch'il vargau dils vitgs ei e con stretg ch'els ein colligiai cul svilup dall'entira regiun. Aschia ha Riein fatg atras el 19avel tschentaner enteifer mo treis meins gest dus incendis dil vitg. Giudem il vitg han schizun giu liug fiastas da lutga ils onns 1960. A Sevgein regorda la caplutta da S. Fossa ad in temps nua che tochen 5'000 pelegrinas e pelegrins visitavan il liug. Communablamein cun Laax formava Sevgein plinavon inagada ina dallas 48 vischnauncas giudizialas dil Stadi liber dallas Treis Ligias. Era Castrisch fa surstar cun historias specialas: Il dretg da votar ed eleger communal per las dunnas ei vegnius introducius pér igl onn 1983. E malgrad ch'il scamond d'automobils el Grischun era gia vegnius abolius 1925, stuevan vehichels tras Castrisch aunc vegnir tratgs da cavals ni bovs tochen els onns 1930, perquei ch'il scamond da carrar communal ei restaus. Anna Catrina accumpogna las viandontas ed ils viandonts Sco gia sin l'emprema etappa raquenta Anna Catrina, la feglia fictiva da Glion, sias historias per tudestg e romontsch, mintgamai cun differents cuntegns. Via codes QR san contribuziuns auditivas vegnir cargadas giu. Ellas laian reviver eveniments historics, persunalitads e particularitads per liung dalla senda. Supplementarmein intermediescha mintga vitg in pign crash-cuors da romontsch ed envida d'emprender d'enconuscher a moda ludica lungatg e cultura dalla Surselva. La finiziun dalla tura fuorman Alexi e Marcus plein tempra culla canzun «Al Rein». In project che sesviluppescha pass per pass La Via Glion colligia sin siat etappas tuttas 13 fracziuns dalla vischnaunca Ilanz/Glion e meina per part era sur sendas dallas vischnauncas vischinontas Breil e Lumnezia. La finamira dil project ei d'equipar mintga etappa tec a tec cun tablas d'informaziun ed aschia far resentir la historia, la cultura e l'identitad dils vitgs. «Cun mintga nova etappa crescha la Via Glion vinavon. Ils viandonts scuvieran buca mo cuntradas impressiunontas, mobein emprendan era d'enconuscher la glieud, historias e particularitads da nos vitgs. Aschia sedat pass per pass in'experientscha culturala che fa veseivla la diversitad da nossa vischnaunca», di Alice Bertogg, menadra da products cultura dalla Surselva Turissem SA e responsabla per la realisaziun dil project. In'experientscha culturala cun futur Cun l'emprema e la siatavla etappa ein ussa dus tschancuns dalla Via Glion equipai cun tablas d'informaziun. Ils proxims onns vegnan era las etappas dus tochen sis realisadas. Aschia crescha la Via Glion cuntinuadamein ad ina senda tematica singulara ch'envida indigens, secund-indigens e hosps da scuvierer pass per pass da niev la vischnaunca Ilanz/Glion e d’emprender d’enconuscher sia diversitad culturala.