Surselva Tourismus AG Glennerstrasse 22a 7130 Ilanz Schweiz
Tel. 0041 81 920 11 00 Fax 0041 81 920 11 01 info@surselva.info www.surselva.info
Communicaziun allas medias dils 17 da zercladur 2026
Success per la «primavera» 2026 e cumiau dil comite d’organisaziun Glion, ils 17 da zercladur 2026 L'exposiziun «primavera» dils 11 d'avrel 2026 ha danovamein mussau a moda impressiunonta con multifara, innovativa e viventa ch’il commerci e mistregn ei a Glion e contuorn. Numerusas visitadras e visitaders han nezegiau la caschun d'emprender d'enconuscher interpresas localas, da survegnir investa captivonta e da tgirar il brat persunal cullas persunas davos ils menaschis. Succes per la «primavera» tier aura da stad La «primavera» 2026 ha astgau beneventar numerusas visitadras e numerus visitaders a Glion cun aura splenduronta. L'occurrenza ei sesplegada senza incaps ed ha purschiu inagada dapli ina plattafuorma attractiva per il mistregn regiunal. Ils menaschis participai ein sepresentai cun bia engaschi ed han procurau per ina purschida varionta. Cunzun legreivel ei staus il resun positiv sils novs puncts da program. Las ideas da nozzas presentadas per l'emprema gada han cattau grond interess ed inspirau biaras visitadras e biars visitaders. Era il giubileum da 15 onns d'expert surselva ei sesviluppaus ad in liug da sentupada popular e vegnius festivaus andantamein. La mischeida gartegiada d'ideas cumprovadas e novas ha contribuiu essenzialmein al success dalla «primavera» d'uonn. Surdada dils premis allas victuras ed als victurs La surdada festiva dils premis dalla concurrenza dalla «primavera» ei succedida venderdis, ils 12 da zercladur 2026 ellas localitads dad expert surselva. Organisau la surdada ha il comite d'organisaziun partent. Il premi principal sponsuraus dad expert surselva e la Swisscom, in Samsung S26 Ultra ella valeta da frs. 1'300, ei ius a Beatrice Wenzin. D'in abo stagiunal 2026/27 dallas Pendicularas Breil ha Samuel Rudin astgau selegrar. Dus bons dallas garaschas d'autos participontas ella valeta da mintgamai CHF 500 ein i a Merita Demiraj e Viola Sommer. Las duas «Ilanzer Geschenkkarten» ella valeta da mintgamai frs. 500 ein vegnidas surdadas a Susanne Frei e Bernadette Coray. La concurrenza gauda dapi onns gronda popularitad e motivescha las visitadras ed ils visitaders da scuvierer activamein la diversitad dils menaschis participonts. Cun varga 300 cartas da participonts valeivlas han ins saviu nudar uonn in niev record. En cumparegliaziun cugl onn vargau cun strusch 250 cartas inoltradas sutlingiescha quei il grond interess dalla populaziun per l'exposiziun da primavera ed ils menaschis participonts. Cumiau d'in comite d'organisaziun engaschau L'ediziun d'uonn marca il medem mument la fin d'in impurtont capetel ella historia dalla «primavera». Suenter tschun ediziuns organisadas cun success seretila igl entir comite d'organisaziun dalla planisaziun e realisaziun activa dall'occurrenza. Al comite d'organisaziun han Franca Strasser, anteriura presidenta dall'Uniun da commerci e professiun Glion e contuorn (HGVI), Roman Derungs, anteriur commember dalla suprastonza dil HGVI, Fabienne Dick, menadra dalla swidro drogaria alpina Glion, Martin Caduff, menader da mandat tier Confidar Treuhand & Immobilien a Glion, sco era Alice Bertogg, menadra dil post d'informaziun Glion da Surselva Turissem, fatg part. Cun grond engaschi, creativitad ed anim han els formau e sviluppau cuntinuadamein la «primavera» duront ils davos tschun onns. Ord in'exposiziun locala da mistregn ei naschida ina plattafuorma etablida che catta attenziun lunsch sur ils cunfins communals ora. «Suenter tschun ediziuns astgein nus dir cun luschezia che la primavera ei madirada. L'occurrenza ha anflau siu plaz fix el calender d'occurrenzas regiunal e vegn appreziada dalla populaziun sco era dils menaschis participonts», di Franca Strasser.