Glennerstrasse 22a
7130 Ilanz info@surselva.info Schweiz www.surselva.info
Communicaziun allas medias dils 12 da mars 2026
Nova guida sonora: «Glion tuna e resuna – der Klang der Surselva»
Glion, ils 12 da mars 2026
Surselva Turissem SA schlargia sia purschida culturala e lantschescha ina nova guida tematica a Glion. La guida sonora «Glion tuna e resuna – der Klang der Surselva» ei dedicada alla tradiziun reha dil cant e la musica dalla regiun e colligia historia, lungatg e tun ad in’experientscha speciala per indigens e hosps. La nova guida fa part dalla purschida culturala mira!cultura. Sut quei tetg datti en Surselva gia varga 20 differentas guidas tematicas. Culla nova guida sonora metta la Surselva in element central da sia identitad culturala el center.
Ina regiun che conta Il cant ha da vegl enneu in plaz fix ella veta culturala en Surselva. Il cant da chors, enragischaus profundamain ella tradiziun romontscha, caracterisescha la regiun entochen oz. In proverbi enconuschent porta quei bein sil punct: «Sche dus Romontschs s’entaupan, fundeschan els in chor da quater vuschs.»
La nova guida culturala tschaffa quellas ragischs musicalas. Duront il tur tras Glion intervegnan las participontas ed ils participonts buca mo raquents e fatgs historics davart il cant en Surselva, mobein audan era il tun musical Cun exempels auditivs, investas ella tradiziun da cant locala e cun cantar communablamein vegn l’ierta culturala dalla Surselva percepida a moda viva e sensitiva. «Culla nova guida sonora vulein nus mussar als hosps ina vart particulara dalla Surselva. Cant e musica s’audan dapi tschentaners tier l’identitad da nossa regiun. Cun historias, suns e cant communabel daventa quella tradiziun viva», di Alice Bertogg, responsabla per la cultura tier Surselva Turissem SA.
Staziuns sonoras tras Glion
Il tur entscheiva tier la fontauna silla Plazza Cumin el center da Glion. Da leu meina la ruta en differents loghens ch’ein colligiai culla historia dalla musica e dalla cultura regiunala. Las staziuns ein denter auter la baselgia parochiala catolica da Glion, la riva dil Rein, igl areal dalla staziun sco er la baselgia reformada da sontga Margreta cun siu clutger tut aparti.
In ulteriur punct culminont ei la viseta dil Museum Regiunal Surselva. La nova exposiziun permanenta che vegn aviarta ils 21 da zercladur 2026 sededichescha denter auter medemamein alla tematica dalla musica e dil cant en Surselva. Leu vegn tratg igl artg dallas canzuns popularas tradiziunalas sur il cant ecclesiastic entochen tier la musica romontscha moderna.
Invitaziun alla guida cun las medias
Venderdis, ils 20 da mars 2026, ha liug l’examinaziun dalla nova purschida. En quei connex vegn la guida presenta l’emprema ga cumpleinamein. Surselva Turissem SA envida cordialmein las redacziuns dallas medias a quella guida, aschia ch’igl ei pusseivel da survegnir in’investa dalla nova guida sonora
Liug da sentupada ei allas 13.45 silla Plazza Cumin a Glion. La guida cuoza rodund 90 minutas. Nus supplichein da s’annunziar entochen mesjamna, ils 18 da mars 2026 per mail a alice.bertogg@surselva.info
Glennerstrasse 22a
7130 Ilanz
info@surselva.info Schweiz www.surselva.info
Contacts per medias:
• Ann-Cathrin Uhl, communicaziun e marketing 081 552 02 03, ann-cathrin.uhl@surselva.info
• Alice Bertogg, responsabla per la cultura 081 920 11 05, alice.bertogg@surselva.info
Maletgs: qua
Fontauna: Surselva Turissem SA
La Surselva: Ina destinaziun turistica dominanta dallas Alps orientalas duront igl entir onn.
La destinaziun turistica Surselva ha da porscher bia: In bellezia mund alpin, territoris da skis attractivs, plazzas da golf, la Ruinaulta cun in dils tschancuns ils pli attractivs dalla Viafier retica, l'enconuschenta planira aulta dalla Greina, la Val Frisal, la cultura viva ed ils lungatgs singulars dil romontsch sursilvan ed il tudestg dils gualsers, uniuns activas, las grondas occurrenzas culturalas open air Lumnezia ed opera viva, ils bials vitgs autentics ed intacts cun perlas architectonicas, il center regiunal da cumpra a Glion cun siu marcau vegl particular sco er ina populaziun hospiteivla, tier la quala appartegnan ton ils indigens sco era ils segundindigens.
www.surselva.info
mira!cultura, ina noda-casa per purschidas culturalas
Il num «mira!cultura» vul dir ton sco: «Mira, cheu capeta cultura!». Sut quei label vegnan purschidas dapi igl onn 2015 guidas culturalas ed ei vegn era scolau novs guids da cultura (guides). Igl onn 2020 ei vegniu fundau cull’uniun AMAS (Associaziun dils museums ed archivs culturals Surselva) ina nova societad purtadra che disponeva dallas cumpetenzas necessarias per segirar las purschidas. Dapi la stad 2024 ei mira!cultura integrada ell’organisaziun turistica Surselva Turissem SA ed ensemen cun ina gruppa accumpignonta che consista da representantas e representants dils museums ed archivs culturals dalla regiun vegnan las purschidas sviluppadas vinavon. www.miracultura.ch