Surselva Tourismus AG Glennerstrasse 22a 7130 Ilanz Schweiz
Tel. 0041 81 920 11 00 Fax 0041 81 920 11 01 info@surselva.info www.surselva.info
Communicaziun allas medias dils 17 da fevrer 2026
La «primavera» 2026 fa ord Glion in marcau primavaun viv Glion, ils 17 da fevrer 2026 Sonda, ils 11 d’avrel 2026 semida Glion dallas 10.00 entochen las 17.00 puspei en in marcau d’eveniments. Varga 40 fatschentas da Glion e contuorn arvan lur portas ed envidan all’exposiziun da primavera. Visitadras e visitaders astgan selegrar d’in viadi aventurus tras las stizuns, la gastronomia e las fatschentas. L’occurrenza stat sut l’enzenna dallas sentupadas persunalas e muossa las purschidas economicas, innovativas e creativas dalla regiun. Ina plattafuorma pil commerci regiunal e sentupadas persunalas. La «primavera» ei s’etablida ils davos onns sco plattafuorma impurtonta pil commerci ed ella unescha ton las persunas indigenas sco era quellas che possedan sescundas habitaziun ni ils hosps dalla regiun. Varga 40 interpresas presentan lur purschidas actualas ed ils survetschs specialisai e dattan investas exclusivas en lur lavur. La paletta ei vasta e meina dalla cussegliaziun cumpetenta el sectur dallas bancas, dallas segiradas, immobilias, la digitalisaziun, l’energia solara ed igl accumpignament da formaziun entochen tier las fatschentas tradiziunalas, las buticas cun bia charme ni tiels survetschs innovativs. Era purschidas da sanadad dall’apoteca, la drogaria, la naturopata ni era dil specialist da physio ni fitness ein dalla partida e dattan informaziuns davart il beinesser e la prevenziun. Attracziuns, moda e divertiment el cor da Glion Las garaschas d’auto da Glion e contuorn vegnan puspei a retrer gronda attenziun culs pli novs models d’auto. Cumplettau vegn quella purschida tras l’exposiziun dils pli novs models da velo e la cussegliaziun professiunala vitier. Ellas localitads dil coworking gest all’entschatta dil Städtli datti inspiraziuns pil di da nozzas ed autras fiastas. La stizun da fluras muossa ils pli novs trends da fluras en creaziuns captivontas ed il salun da coiffeur fa las frisuras adattadas per caschuns specialas. L’exposiziun da curtgin cun grill e mobiglias d’iert arrundescha las purschidas per amaturas ed amaturs da Lifestyle. Era ellas stizuns da moda ed accessoirs arriva la sesiun da primavera. Revistas da moda allas 13.30 ed allas 16.00 avon la Casa Surselva presentan trends ord la papetaria e libraria, la stizun da secund maun ed igl opticher. Quellas revistas vegnan accumpignadas cun musica da DJ Torn e sault dalla gruppa da Line-Dance Surselva Stompers. Daferton delecteschan Clau Maissen e Rees Coray cun lur musica a caschun dil giubileum da 15 onns dad expert surselva. Segirtad, gudiment e purschidas per l’entira famiglia La segirtad e l’organisaziun da survetsch fan medemamein part dil program. Ils pumpiers Ilanz/Glion muossan sin plaz co els ageschan el seracass e la Polizia cantunala dil Grischun informescha sur da prevenziun ed agen schurmetg. Pils hosps giuvens datti sminca per affons e permiez la via stat puspei ina sablunera surdimensiunala. Sil tschancun serrau dalla Via dil Glogn envida ina tenda cun tavolata dil Hotel Rätia da far in paus e star pacific. Denton porscha era la gastronomia da Glion, denter auter la Casa Casutt, da far ina pausa gustusa. Premis attractivs grazia alla carta da bullar La carta da bullar appreziada resta in element central dalla „primavera“. Cun visitar silmeins sis faschentas e rimnar leu mintgamai in bul separticipeschan las visitadras ni ils visitaders alla concurrenza cun premis attractivs. Da gudignar datti in telefonin Samsung S26 Ultra ella valeta da 1300 francs, sponsurau dad expert surselva ensemen culla Swisscom, in abo da skis digl onn 2026/2027