Communicaziun allas medias dils 29 d’uost 2025
La «primavera» muossa tgei che Glion e contuorn sa!
Glion, ils 29 d’uost 2025
Era igl onn proxim datti a Glion puspei l’exposiziun da commerci e mistregn «primavera». La sonda, ils 11 d’avrel 2026 presentan numerusas fatschentas da Glion e contuorn puspei lur products, purschidas ed innovaziuns. L’occurrenza porscha ina mischeida captivonta denter commerci tradiziunal, fatschentas modernas ed in programm accumpignont attractiv per grond e pign. El center stat denton il brat persunal denter las persunas davos las fatschentas e las visitadras ed ils visitaders.
In sguard anavos sill’ediziun da success dil 2025
L’ediziun dalla «primavera» d’uonn che ha giu liug ils 12 d’avrel 2025 ei stada in grond success. 39 fatschentas ed interpresas ein separticipadas ed han priu aschia la caschun da sepresentar ad in public vast. Sper ils stans d’informaziun e las exposiziuns da products han plirs puncts culminonts procurau per eveniments tut specials. Seigi quei il vehichel electric “Terren” ch’ei vegnius direct dil Museum Svizzer da Transports a Glion, ni la revista da moda creativa cun resti da secund maun, cudischs, accessoirs e fluras, ni il giubileum treidubel dalla fatschenta Caveng - l’exposiziun ha purtau scuvretgas surprendentas Era las pintgas visitadras ed ils pigns visitaders han gudiu la truscha. Ina sablunera surdimensiunala, sminca per affons ni era in’investa unica tiels pumpiers han procurau per egls glischonts.
Bullar, rimnar, gudignar e selegrar
In punct culminont tut special ei era stada uonn la concurrenza da bullar tier la quala ei vegniu rimnau e bullau tut a dubel. Cun ina carta plein buls separticipavan las visitadras ed ils visitaders alla concurrenza cun premis attractivs. Ei deva da gudignar tut en tut sis premis ella valeta da mintgamai 500 francs . Dus da quels eran bons dallas garaschas d’auto da Glion e contuorn. Treis ulteriuras victuras e victurs han retschiert la carta da schenghetgs «Ilanzer Geschenkkarte» ella medema valeta. Ed inaga ei vegniu surdau in premi cumbinau: tschun cartas dil di dallas pendicularas Sursaissa Mundaun ed in abonnament da sesiun per il service da skis tier Menzli Sport. Las victuras ed ils victurs dalla concurrenza 2025 ein: Prisca Cathomen, Remo Solèr, Venanzi Solèr, Vitus Derungs, Ursula Brändli Capaul und Susanne Frei Felber. La surdada dils premis ha giu liug el rom d’ina fiastetta.
In format pil futur
Franca Strasser, presidenta dall’uniun da commerci e mistregn da Glion e contuorn ha plascher dil svilup dall’exposiziun: «La «primavera» ei sesviluppada en cuort temps tier ina plattafuorma impurtonta per nossas fatschentas localas. Oravontut plai a mi co quell’occurrenza promova la coesiun ella regiun. Ils numerus resuns positivs motiveschan da sviluppar vinavon l’exposiziun e da realisar era igl onn proxim ideas novas». Era il 2026 astgan visitadras e visitaders selegrar da scuvierer a moda multifara il commerci da Glion e contuorn. Las fatschentas participontas vegnan puspei a presentar cun dabia engaschi lur lavur e tgirar il brat persunal. La carta da bullar resta part dil concept. Tgi che viseta tschun differentas fatschentas e lai confirmar quei cun in bul, pren part automaticamein alla concurrenza. Cun quella schanza da gudignar bials premis fa il gir tras l’exposiziun dublamein plascher.
Ina fiasta per la regiun
Alice Bertogg, menadra dil biro d’informaziun da Surselva Turissem a Glion accentuescha la valur da quella occurrenza per la regiun: «La «primavera» ei bia dapli ch’ina exposiziun da commerci. Ella rinforza la schientscha per la vastadad regiunala e scaffescha sentupadas che restan en memoria. Ella muossa che nossas fatschentas ein vivas ed innovativas.»
«primavera» 2026
Fatschentas interessadas san gia uss s’annunziar per la proxima ediziun dalla «primavera». Las preparaziuns pils 11 d’avrel 2026 ein lantschadas. Ei resta la finamira da salvar il cumprovau e da sviluppar vinavon l’occurrenza cun novs elements. Ulteriuras informaziuns tier l’exposiziun e l’annunzia datti silla pagina web dall’uniun da commerci e mistregn da Glion e contuorn ni direct via mail ad info@hgv-ilanz.ch.
Contacts per medias:
● Alice Bertogg, menadra biro d’informaziun Surselva Turissem Glion 081 920 11 05, alice.bertogg@surselva.info
● Franca Strasser, presidenta uniun da commerci e mistregn Glion e contuorn (HGVI), 079 385 65 09, strasser@immobilias.ch
Fontauna: Surselva Tourismus AG/ Pieder Cadalbert
Ulteriuras fotografias: hier
La Surselva: Ina destinaziun turistica dominanta dallas Alps orientalas duront igl entir onn
La destinaziun turistica Surselva ha da porscher bia: In bellezia mund alpin, territoris da skis attractivs, plazzas da golf, la Ruinaulta cun in dils tschancuns ils pli attractivs dalla Viafier retica, l'enconuschenta planira aulta dalla Greina, la Val Frisal, la cultura viva ed ils lungatgs singulars dil romontsch sursilvan ed il tudestg dils gualsers, uniuns activas, las grondas occurrenzas culturalas open air Lumnezia ed opera viva, ils bials vitgs autentics ed intacts cun perlas architectonicas, il center regiunal da cumpra a Glion cun siu marcau vegl particular sco er ina populaziun hospiteivla, tier la quala appartegnan ton ils indigens sco era ils segundindigens www.surselva.info