Artist : Hilda Lalremtluangi Central Corps, Central South Division, Division, India Eastern Territory
Kristaa ka unaunu duhtak te, International Women's Ministries Bible studies chhuah tawh panga zinga pathumna chu lawm takin kan rawn tichhuak leh thei ta a. He Bible zirna hian kan thinlunga Pathian thuin hmun tam zawk a luahkhah nan te, Krista hnungzuitu rinawm tak kan nih theihna tur atan leh rawngbawlna kan kalpui mek naah thinlung leh tihtakzet a ke pen turin a puih ngei che u ka beisei. General Brian Peddlea’n International Salvation Army Rawngbawl tura Kohna a siamah chuan, Sipai tinte tun huna indona atana inpeih turin min cho a. “Tun huna mamawhna hi kan hriatthiam a tul”, tiin a ziak a ni. Kan ruahmanna te kan puitlin hunah chauh nilo, vawiinah ngei hian khawvelin Krista a mamawh a ni. Rawngbawlna kan kalpui mek lai hian, indona bei chungin kan thang mek zel a, tun huna indona aia nasa hmachhawn turin kan intichak mek a ni. Chu chona chhanlet a hmalakna atan chuan he Bible zirna, thlarau indona beih dan tur hi buatsaih a ni. Kan thupui ‘Hnehtu aia Ropui’ tih hian kan rinna chu Kristaah a ni tih a tarlang a ni (Rom 8:35-39). Ephesi 6:12, “Kan buante hi tisa leh thisen an ni si lo, lalnate leh, thuneihnate leh, he thim chunga khawvel roreltute leh, van hmunahte thlarau sualho awm te an ni zawk e”, ti a Paulan a lo sawi angin, he Bible zirna hi indona hmachhawn tura inbuatsaih te tan hmanraw tangkai tak a ni. He ‘Hnehtu aia Ropui’ Bible zirna hi Hmeichhe 23 khawvel hmun hrang hrang a Chhandamna Sipai Pawlin indona a kalpui mek na ram amite buatsaih ani a. Heng hmeichhia te hian thlarau indona nasa tak hnuaiah kan awm a ni tih an hmu in an hria a ni. Kan chhehvel leh khawvel zau
zawk kan thlir chuan, kan inchhung, kan khawpuiah leh kan hnam ah te hian thlarau indona nasa tak a awm a ni tih kan hre thei a. Thlarau Thianghlim thltihtheihna leh chakna hmangin heng indona te hi kan hmachhawn anga, hneh ni lova hnehtu nun chu kan chang thei dawn a ni. ‘Hnehtu aia Ropui’ kan tih hian, bawhbeh nih hnua tho leh tura beihna emaw, thil danglam thlen tir tura hmathlir duan lam a ni lo. Keimahni lam sawina a tello! Paula chuan Rom 8:37 ah, “Min hmangaihtu avang chuan ropui taka ngamtu kan ni”, a lo ti a. ‘Hnehtu aia Ropui’ nihnaah hian Isua chu indona hmun harsa berah pawh kan kiangah a awm a, a tanpuina avang chauh a thawk leh tang thei kan ni. Lal Isua hi kan buainaa min dawm kang zel turin a thutiamah a ding nghet a, milian tak, fiahna leh harsatna phena hnehna awm chu min hmuhtir a ni. Pathian hian a mite a thlahthlam lo. Kan mihring puite chuan min ti lungngaiin min hlamchhiah thei, mahse Pathian chuan a thu ah min kalsan dawnlo tih min tiam a ni. Min dinpui reng dawn. Isaia 43:1 ah chuan, “Hlau suh u, ka tlan tawh che u hi; in hmingin ka ko che u a, ka ta in ni asin”, tiin min hrilh a ni. Pathianin min kalsan dawnlo, thlipui karah pawh kan kiangah a awm reng dawn! Meia kan kaltlang lai pawhin kan kang lovang a; mei alhin min tialh lovang. Kan hnenah a awm zel ang. Luite kan dai kai lai pawhin min chim pil lovang, kan hnenah a awm zel ang. Kan nun a harsatna chi hrang hrang a lo thlen lai pawhin, kan hnenah a awm zel dawn. Natna leh tawrhna karah pawh, kan hnenah a awm zel ang. Pathian chu kan lamah a tang a, amah ngei chuan hnehna min chanpui dawn a ni. Kum zabi 21 naa ‘Hnehtu aia Ropui’ nunah hian Lalpan enge a duh? Amah hnaih tlat a, indona hmachhawn tura inpeih turin min duh. Indona hi keini indona ni lovin Pathian kuta awm a ni a, rinna indona tha chu kan bei ang. Indona chu Lalpa indona a ni a, amah tan pui tura sawm kan ni. Hnehna pawh a ta a ni! Lal Isuan, “Khawvelah hian hreawmin in awm thin; nimahsela, thlamuang takin awm rawh u, keiin khawvel ka ngam ta (Johana 16:33)”, a ti a ni.
Rom 8:31 a inziak angin, “Pathian kan lama a tan chuan, tuin nge min do thei ang?”. Thiante u, Pathian thiltihtheihna chu kan lamah a tang a ni, chuvangin, he indona hi Thlarau Thianghlim thiltihtheihna leh huaisenna hmangin lo zawm ang che! Sual hnathawh chak tak te tih mih theih dan kawng tha ber a ni. He Bible zirna hmang apiang te hian Pathian chenpuina mak leh ropui tak an dawn theuh hi ka tawngtaina a ni. He zirlai hi hmeichhiate ziah nimahse, hmeichhe rawngbawlna huamchhung ami te tan chauh a tih a nilo. Mi tute tan pawha siam leh duan a ni a, hnam hrang, tawng hrang leh mipa, hmeichhia, tupawhin an hmang thei a ni. He hmanrua hi kan rin leh beisei aia nasa in Pathianin hmang se tih chu kan tawngtaina a ni. Thlarau Thianghlim tihchakna leh huaisenna chuan he zirtirna hmanrua kaltlang hian thim lal kulh chu bei a thiat turin tanpui theuh che u rawh se. Pathianin he Bible zirna hi a hming chawimawi nan leh a ropuina puanchhuah nan hmang mawlh rawh se. Thutak, Hnehtu aia Ropui kan nihna hian min hmangaihtu chu chawisang mawlh rawh se.
I Chronicles 5:18-22 hian Reuben ho te, Gad ho te, Manase hnam zatvete chanchin min hrilh a. Heng hnamte hian indo thiam mi huaisen rual mi 44760 hmangin Hagar ho te, Jetur ho te, Naphis ho te leh Nodab ho te an do a ni. Pathiana rinna nghatin a hnenah an tawngtai a, an hnenah Pathian a awm avangin indonaah chuan hnehna an chang ta a ni. Ringtu zawng zawngte hian Pathiana rinna nghah hi kan tihmakmawh a ni a; kan Lalpa thiltihtheihna chu ring tura koh kan ni. A hmangaihna tawp chin neilo chu kan chakna hnar a ni. A fapa Isua Krista avangin hnehna chu kan ta a ni a, a fate kan nih angin Pathian hian amah ring tlat turin min duh a ni tih pawh hriat a pawimawh hle mai. Kan remhriatna te, kan tawnhriatte leh finna ringawt chuan indona kan hmachhawn thei lova; engkimah puih leh kaihhruai mamawh kan ni. Indona hi tisa indona ni lovin thlarau indona a ni a, hemi ah hian engkimtithei kan Pathian chuan a hun takah kan hmelma te hneh turin min pui dawn a ni. Amaherawhchu, kan chapona leh duhamnate avang hian Pathian kan hawisan fova, kan chaklo fo thin. Pathian hruaina nghak lovin mihring theihnaah kan innghat a, mahniin kan bei fo thin a ni. Tupawh mai hian harsatna leh buaina kan tawk thin a, Pathian thu in min hrilh angin heng hunte hi lo thleng ve reng tura ngaih a ni – “Heng thu hi in hnenah ka sawi tawh hi, keimahah hian in thlamuanna turin. Khawvelah hian hrehawmin in awm thin; nimahsela, thlamuang takin awm rawh u, keiin khawvel ka ngam ta, a ti a” (Johana 16:33). Keini pawh hian a khawngaihna zarah heng harsatna te hi kan pumpelh thei a ni. Pathian thu chuan, “Nimahsela, amah lawm apiang chu, an hnenah Pathian fate nih theihna tur a pe, a hming ringtute chu;” (Johana 1:12) a lo ti a. Pathian fate kan nih avangin, min tichaktu Krista kaltlangin hnehtu kan lo ni ve ta a ni. Ka unau duhtak te u, kan harsatnaah te, thlipuiin min nuai chang te, natnaah emaw tawrhnaah pawh nise, Pathian dah hmasak kan thlan tlat chuan kan beisei aia nasain min thawhsak ngei ang.
Thil thalo engpawh lo thleng sela, Lalpa a rawn inrawlh dawn vangin, I mangang lovang u. Tawngtaia Pathian kan belh chuan min ngaithla thin a, engkim a duhdan anga kan tih a, amah nen kan inzawm tlat chuan Pathianin a hna chu a rawn thawk mai dawn a ni. Kan Pa Pathianin a duh ber chu engkima hnehna kan chan hi a ni a, mahse chu hnehna chu amah hmangaihtute, nun thianghlima nungte leh sual te kalsana an nuna Pathian lal tir tute tan a ni. HNEHNA HI PATHIAN TA A NIH AVANGIN PATHIANAH CHUAN TUPAWH HNEHTU KAN NI THEI A NI. I Samuela 30 a kan hmuh angin Davida leh a miten Ziglag an rawn thlen chuan Amalek mite chuan khua chu an lo run a, an nupuite, an fapate leh an fanute chu salah an lo man tawh a ni tih an hmu a. Davida leh a hnena awm te chu aw rawl tawpin, an tah hleihtheihloh thlengin an tap a ni tih kan hmu a. Mahse, Davida chu Lalpaah chuan a intichak a, Lalpa a rawn a, a hote nen Amalek mi ten an laksak zawng zawng chu la let turin an thawkchhuak a, hmelma te chu hnehin engkim an la let leh vek a ni. He chanchin atang hian hnehna chu Lalpa ta a ni tih kan hmu a. Amah kan biak a, a tanpuina kan dil chuan indona min beihsak thin. Pathian kan dah hmasak chuan, hnehna kan chang anga, hmelma in min ruk sak zawng zawng chu kan nei let leh dawn a ni. Davida chuan, “Chungho chu um ila ka la umpha angem le?” tiin Lalpa a zawt a. Lalpa chuan, “Um rawh, I umpha ngei ngei ang”, tiin a chhang a ni. Hei hian Pathianin engkim a hmu vek a ni tih a nemnghet a, Davida pawhin Pathian chakna rinchhanin hnehna a chang a ni tih kan hria. An nuna Pathian thiltihtheihna leh ropuizia hrefiah thiam apiang te, engkima Pathian dah hmasa a, thlarau thianghlimin a hruai apiang te chu hnehtu an ni. Harsatna kan tawhin, tunge kan pan thin? Reuben ho te, Gad ho te leh Manasea hnam zatvete; indo mi sing tam tak nena thawkchhuak khan Pathian an au a, anin a tanpui a ni. Kan kawng hruaitu atan Pathian kan rin a, a hman atan kan in phal phawt chuan hnehtu kan ni vek thei a ni. Sual leh min tichhe thei zawng zawng te kan kalsan hi a duh a, chumi ni tur chuan Pathianin amah ring tlat turin min kova, min tanpui a tiam a ni. Kan zavai hian amah kan belh a, Pathian nena kan inzawmna te kan tih that reng a ngai a ni.
Tawngtaina: Ka Pa, misual, khawngaihna avanga chhandam kan ni a, I hnenah kan intulut e. Hnehna chu I ta a ni tih kan theihnghilh fo avang te, kan hriatna leh chaknaa kan kal fo thin avangin min ngaidam ang che. Kan hmaa harsatna a lo awm chang pawhin min pui la, kan hma min hruaisak la, nangmahah chauh rinna nghata huaisenna nei turin min tanpui ang che. Isua Krista hmingin lawmthu kan sawi e. Amen.
CAPTAIN VERONICA LIZETE BENGUI Angola Command Veronica hi Ricardo nen in nei in fa pali an nei a.Luanda Central Corps ah Corps Officer niin, Angola a mihring hmanga sumdawnna dona kawnga mawhphurtu ani bawk.
“Pathian kan hmangaihna chu hei hi a ni, a thupekte kan zawm hi; a thupekte chu a khirh si lova. Pathian hrin tawh phawt chuan khawvel a ngam zel si a; hei hi a ni khawvel hneha ngamna chu, kan rinna hi.” (I Johana 5:3,4)
Ka pasal nen hian eisiam nuam kan ti em em a, a bikin chhang ur hi nuam kan ti a. Oleg-a hi chokaah chuan mi themthiam tak a ni. Ei siam kaihhruaina bu te hi chu amah tiphurtu ang chauh an ni a. A eisiam te hming a phuah loh leh thlalak mawi tak a nei thin a mahse, a siamdan erawh chu a zawm tha lem lova. A telh tur dik tak a hmuh loh chuan a anpui emaw a teuh thei ang ber a hmang mai thin a. “Bawnghnute a awmloh chuan cream ka telh anga emaw apple a awmloh chuan balhla ka hmang mai ang”, tiin a ngaihtuah thin. A chang chuan chhang tui tak a siam a, a changin eitur danglam tak min hlui bawk a. Mahse a thilsiam reng rengah hian kimlo hi a awm tlat thin a, telh tur zat diktak a telh lo ni hian ka hre ber (a chang phei chuan a siam dan tur kaihhruaina hi a zawm meuhlo). Eisiam dan tur kaihhruaina zawm dik thlap a, a telh tur dik taka telh te, a ur hun chhung leh sat zawng te, engmah tidanglam lova siam chuan a tui dan a dang thin a. A tirah chuan, chhang ur kaihhruaina engkim dik thlap a zawm a, a teh dan tur thlapa teh chuan hun a la a, thleng te pawh a bal hnem viau thin, mahse, kan duh ang takin a lo chhuak dawn a, kan chhang duh ang tak, tui tak kan ei mai dawn a ni. Bultanna atan chuan siam awlsam te te in han tan ila, hun a lo rei a, a harsa deuh te siam chhoh zelna turah inrintawkna kan lo nei thin. Kan duhsak leh hmangaih tak te tana eitur tuihnai tak buatsaihsak hi a nuamin a hlimawm a ni. Ka tan chuan, Pathian thupek zawm hi chhang siamna kaihhruaina zawm ang hi a ni a. Ei siam bu siamtu chuan lehkhabu lei a, lehkhabu bawma rem leh mai atana a ziah a ni lova. Hmang tangkai a, kan siam lai leh kan ei hun pawh a hlimpui em em turin min duh a ni. Pathian chuan kan hmangaihzia kan sawi mai hi a duhtawk lova, eisiam kaihhruaina bu kan zawm thin angin a thupekte zawm turin min duh a ni. He kan nun kaihhruaina tur, khawvel puma kan hman theih tur chu Bible ah a awm a ni. Mi zawng zawng hnenah Pathian kan hmangaih thu hi hrilh mai a tawk lo. Kan inzawmnaa thil pawimawh tak ni mahse, a pawimawh ber a nilo a ni. Kan zawng zawng a kan lantir hi a pawimawh a, thu mai ni lova kan nun puma kan
lanchhuahtir a ngai a ni. Pathian kan hmangaihna lantir dan tha ber chu a thupek kan zawm hian a ni. Bible ah hian inkaihhruaina leh thupek hrang hrang tam tak a awm a. Thuthlung hluiah chuan thu sawm pek leh Leviticus bu kan nei a ni. Chawlhni ah Biakinah kal tur kan nih kan inhria a, rukruk leh tualthah loh tur tih pawh kan hria. Chutih mek lai chuan Lal Isua lo pianna hian thupek tam takah danglamna a siam a. Pharisaite zawhna a chhannaah khan thupek ropui ber chu kan hmu a ni. Matthaia 22:37-39 ah “Tin ani chuan a hnenah, ‘Lalpa I Pathian chu I thinlung zawng zawngin, I thlarau zawng zawngin, I rilru zawng zawngin I hmangaih tur a ni’ tih hi. Chu chu thupek ropui leh pawimawh ber a ni. Tin, a dawttu, a anpui chu hei hi a ni, ‘Nangmah I inhmangaih angin I vengte pawh I hmangaih tur a ni,’ tih hi.”Kan rinna hi heng thupek pawimawh tak te ah hian a innghat a ni. PATHIAN THUPEK ZAWM HI CHHANG KAN UR DAWN A KAN THIL PAWLH TUR IN DAWT A KAN TELH A NGAI ANG HIAN THA TAK A KAN ZAWM A NGAI A. EISIAMNA BU SIAMTUTE HIAN AN LEHKHABU ZIAH CHU LEISAK A, A REMNA A REM THA RINGAWT TURIN MIN DUH LO A, HMANG TANGKAI A A HLUTNA TE HMANG CHHUAKA, A KAIHHRUAINA ANG TAK ZUIIN, CHHANG TUI TAK EI TUR IN MIN DUH A NI. Thupek hmasa zawk, Pathian hmangaih tur tih hi Kristiante tan chuan a pawimawh hle a. Pathian hi kan tan a pawimawh lutuk a, kan hmangaih awm reng pawh a ni. Kan chakna zawng zawngin kan hmangaih tur a ni a, thupek pahnihna in a sawi angin mahni kan inhmangaih angin kan vengte pawh kan hmangaih tur a ni. Kan thinlungah hian Pathian hmangaihna kan nei theuh a, chu mai piah lamah chuan hmangaihna chuan min luahkhatin chetzia a lanchhuah tir turin min pui bawk a, midangte pawh hmangaih turin chakna min pe a ni. Kan thinlung chauha Pathian kan hmangaih theih ang bawk hian kan vengte pawh thinlung chauhin hmangaih a awl khawp mai. Miin eitur min dil se, ‘Ka hmangaih che a, ka tawngtaipui ang che’, kan tih mai a thiang lova. Kan tihtur chu eitur pek a ni. Miin min biak duh changin be lovin kan kalsan mai ngai lova, kan tih tur chu min mamawh tu nena hun hman a ni. Pathian hmangaihna tak tak atang chuan kan tanpuina mamawh em em tute hi kan hlamchhiah thei lova, Hmangaihna chu midangte tana thil tha tih hmangin kan
lantir thei a, chu hmangaihnaah chuan phurrit a inngaihtawnna te pawh a kiang thei a ni Pathian nena inzawm tlatte tan chuan a duhzawng tihpuitlin hi a harsa lo. Isua Kristaah chuan hnehna kan chan tawh avangin Pathian nung kan rinna chuan khawvel eng ni turin min buatsaih zawk a. Pathian duhzawnga kal chu thil harsa a lo ni tawh lova, midangte tan pawh entawntlak kan lo ni thin a ni. Chu tih mek lai chuan, thu a awlsam tak anga lang hi a takah chuan a lo harsa thin a. A chang chuan thupek thenkhatte chu awmze neilo ang maia ngaih theih a ni a, Chanchintha avanga chona kan hmachhawnte chu puitlin a harsa thin. Chung chu Pathian nena kan inzawmna that tawk loh vang pawh a ni thei ang. Mahse, tlai luat a awm lova, Pathian kan hmangaihna chu theihtawpin kan lantir thei a ni. Lalpa hian amah kan hmangaihna chu thanglian deuh deuh turin a duh a ni. Lalpan kan harsatna te min sutkiansak thei tih hi hre reng ila, a tanpuina leh kaihhruaina I dil fovang u.
Tawngtaina: Lalpa, I thupekte zawm a hlim taka awm thei turin min pui la, nangmah ring tlat chunga khawvel thilte ka hawisan theih nan leh ka hnaih zel theih nan che min pui ang che. LIEUTENANT DOMINIKA DOMANSKA Germany, Lithuania and Poland Territory Lieutenant Dominika hi nupui leh fanu hmeltha tak tana nu a ni mek a. Warsaw, Poland a Corps Officer a ni a. Zin veivah leh lehkhabu chhiar te nuam a ti em em a, a bik in Scandinavian thawnthu chhiar nuam a ti hle a ni.
Pathian thu zir hona kan neih tawh atang leh a bikin Rom Bung riat kan zir atangte khan kan thupui kaihhnawih leh Pathian thu tak ze hrang hrang kan zirchhuah ngei kan beisei tlat a. Kan thlarau nun hi thang mek zel leh in chawm tawn a, thang reng tur a nih avangin thinlung tlawm leh ngaihtuahna fim tak hmangin, midang nun chu in teh nan a hmang lovin, Pathian thu zawk hmangin thlarau thianghlim aw ngaithla chungin keimahni theuh I lo in enfiah ang u. A hnuaia bible changte hi ngun takin i han ngaihtuah tlang teh ang: “Hmangaihnaah chuan hlauhna reng a awm lo; hmangaihna famkimin hlauhna a hnawt chhuak zawk thin a ni.” I John 4:18 Thuk zawka mahni in enfiahna tur: ‘Hmangaihna chuan famkimna kawng a zawh tlat avangin, thinlung thianghlim min neihtir thin a. Pathian hmangaihna ropui leh chhen fakawm zia miin a hriat chinah chuan, Pathian mi hriat ama hmangaih nih tlat duhna chu a thinlungin khel lovin a chak reng thin a ni.’RichardFoster. Mahni theuh in zawhna tur: Ka nun hi engin nge tithlamuang lo va, manganna min thlen thintu chu eng nge ni? Ka thlarau nun hi chutiang mangannate hneh zel tur chuan hma a sawnin a thang em? Pathian min hmangaihna hi chutiang mangannate min hnehpui tur chuan engtin nge kan hman thin? A hnuaia bible changte hi ngun takin i han ngaihtuah tlang teh ang: “Chung thuah chuan eng nge kan sawi ang le? Pathian kan lama a tan chuan tuin nge min do thei ang? Ama Fapa ngei pawh zuah lova kan za a aia petu chu, thil zawng zawng pawh a thlawnin min pe tel lovang em ni? Pathian mi thlante chu tuin nge hek ang? Thiam chantir tu kha Pathian a ni si a; tuin nge thiam loh
chantir ang? Thia kha Krista Isua chu a ni si a; a ni, tho leh ta zawka, Pathian ding lama awma min sawisaktu bawka kha a ni. Krista hmangaihna ata chu tuin nge min then ang? Hreawmna in emaw, lungngaihna in emaw, tihduhdahna in emaw, tamin emaw, saruakna in emaw, hlauhawmna in emaw, khandaihin emaw min then angem ni? “ Nangmah avangin nilengin thahin kan awm thin; Beram talh turte anga ngaih kan ni,” tih ziak ang khan. Then suh e, chung zawng zawngah chuan, min hmangaihtu avang chuan ropui taka ngamtu kan ni. Thihnate, nunnate, vantirhkohte, lalnate, thilawmsate, thil lo la awm tur te, thiltihtheihnate, sannate, thuknate thilsiam dang reng reng te pawhin, kan Lalpa Krista Isua a awm Pathian hmangihna ata chu min then thei lo vang tih dik takin ka hre si a.” - Rom 8:31-39 Thuk zawka mahni in enfiahna tur: ‘Indona a hnehtute chuan anmahni ngeiin an bei thin a. nimahsela, hnehtu aia ropui zawk i nihna chu Krista’n I tana a beiha a hnehsak tawh zawkna che hi a ni. Chumi avang erawh chuan, muangin i thu mai mai tur a ni lo…….inpeih la, thawk zel zawk ang che.’ IsraelmoreAyivor. Mahni theuh in zawhna tur: Pathian thu zirna kan neih chhung hian eng nge ka hlawkpuina? A takin ka nunpui em? Ka nunah hian hnehtu aia ropui zawk ka nihna hi fiahna a awm reng em? A hnuaia bible changte hi ngun takin i han ngaihtuah tlang teh ang: “Pathian thutiamte chu engzat pawh ni se, amahah chuan, “ A ni,” tih chu a awm si a; chutichuan, amah avang pawhin “ Amen” tih chu a awm a ni, keimahni avanga Pathian ropuina turin.” - II Korinth 1:20 Thuk zawka mahni in enfiahna tur: “Isua hi mamawh chhanna ropui ber Pathian ata chhuak a ni, amahah chuan Pathian thutiam zawng zawng chu hlen chhuahin a awm si a. Chuvangin, Pathian hriat tlat hi a thutiam te hlentir tura thiltihtheihna ropui tak chu a ni; Pathian chu a thutiamah te chuan a nghing ngai si lo va”.
“Chhanna a lo thlen hma hauh pawhin, Pathian a kan innghahna chu nitin tihthar zel tur a ni.” - C.S Lewis. Mahni theuh in zawhna tur: Ka nunah Pathian thutiam tawnhriat ka nei em? Chung Pathian thutiam chu chang theih turin engtin nge hma ka lak? Pathian rinnaah leh a hnena ka thutiamah te hian ka thang em? Nge, ka thlarau nun ka in duhtawkna hian min tihnufum zawk?
Tawngtaina: “Aw Lalpa, ka chakna, ka hmangaih a che. Lalpa chu ka lungpui leh ka kulhpui leh, mi chhanhimtu a ni; Ka Pathian, ka lungpuinghet tak a ni a, amahah chuan rinna ka nghat ang; Ka phaw leh, ka chhandamna ki leh, ka kulh bing sang a ni.” Sam 18 :1-2