02. tbl. 08. árg. 22. - 28. janúar 2026
MEÐAL EFNIS: MIKILVÆGUR LEIKUR ÍBV
AÐ HÁMARKA ÁRANGUR Í ÍÞRÓTTUM
Hafið þið reynslu af því að starfa með íþróttafólki?
Í starfi okkar sem kírópraktorar höfum við unnið mikið með íþróttafólki, allt frá áhugamönnum til afreksíþróttafólks. Í gegnum árin höfum við séð og fundið að áherslurnar hafa breyst þegar kemur að meðhöndlun og eftirfylgni hjá fólki sem er undir líkamlegu álagi marga daga í viku. Hvort sem það er íþróttaiðkun eða vinna þá hefur álag áhrif á okkur öll og með tímanum þá getur álagið farið að hafa slæm áhrif á líkamann okkar og jafnvel hugarfar. Ef það eru einhverjir verkir eða vandamál til staðar þá er fyrsta og mikilvægasta markmiðið að minnka verkina og koma viðkomandi aftur á þann stað að geta æft og unnið af fullum krafti. Í framhaldi þá gerum við okkar besta til þess að ná verkjunum alveg í burtu og gera meðferðaráætlun sem lágmarkar líkurnar á því að vandamálið taki sig upp aftur.
Eru einhver meiðsli algengari en önnur?
Allar íþróttir hafa mismunandi álag á ólíka staði líkamans. Sumar íþróttir eru mjög fjölbreyttar og með marga álagspunkta, aðrar eru einhæfari og álagspunktarnir færri. Ingó hefur spilað badminton í 36 ár og badmintonfólk reynir mun meira á aðra hlið líkamans en hina. Rannver er uppalinn fótboltamaður, varð íslandsmeistari með Breiðablik, og það sama gildir um fótboltann að hann reynir mun meira á annan helming líkamans en hinn. Þetta á við um flestar íþróttir en ekki allar. Þegar við nálgumst meðhöndlun á íþróttafólki þá skiptir miklu máli hvaða íþrótt það stundar, hvar álagið er mest og hvernig meðferðinni er háttað til þess að ná sem mestum árangri hraðast. Algeng vandamál sem íþróttafólk leitar til okkar með eru bak- og hálsverkir, vandamál í mjöðmum, hnjám og ökklum, vöðvaspenna, sinatengd einkenni og álagsmeiðsli.
TÍGULL
Dreifing fer fram á fimmtudögum og er blaðinu dreift inn á öll heimili í Vestmannaeyjum. Einnig er hægt að skoða blaðið á vefsíðunni okkar: www.tigull.is
Tígull kemur út vikulega í Vestmannaeyjum og er dreift frítt inn á öll heimili. Ritstjórar & ábyrgðarmenn: Lind Hrafnsdóttir & Katrín Laufey Rúnarsdóttir Forsíða: Hörður Sigurgeirsson.
Hönnun: Lind Hrafnsdóttir lind@leturstofan.is Auglýsingar: Katrín Laufey katalaufey@tigull.is Prentun: Prentun.is
Auglýsingar sendist á: tigull@tigull.is Skil á auglýsingum er í hádeginu á mánudögum. Vinsamlegast bókið tímalega.
Hvernig er hefðbundin meðhöndlun íþróttafólks hjá kírópraktor?
Meðferð hjá okkur við íþróttameiðslum og álagsmeiðslum byggir fyrst og fremst á nákvæmri skoðun og samtali. Við skoðum hreyfigetu og líkamsstöðu, finnum bólgur og eymsli. Í flestum tilvikum er hægt að fá góða greiningu á vandamálinu þannig. Við heyrum stundum að fólk sé stressað eða jafnvel hrætt við að fara til kírópraktors en það er alveg óþarfi og fyrsti tíminn reynist öllum auðveldur. Í okkar tilfelli meðhöndlum við ekkert fyrr en við erum vissir um það hvað við erum að eiga við og að við getum náð árangri með meðferðinni. Það sem hefur reynst okkur einstaklega vel er að við höfum aðgang að myndum sem hafa verið teknar hjá Domus medica, Orkuhúsinu og Hjartavernd. Hafi einhverjar myndir verið teknar þar þá skoðum við þær og lesum skýrslur sem til eru. Ef að greiningin er óljós, engar myndir hafa verið teknar áður og við teljum að brýn þörf sé á þá getum við tekið röntgenmynd af viðkomandi líkamspart. Mikilvægur þáttur meðferðarinnar er að greina undirliggjandi orsakir vandans, til dæmis ójafnvægi í vöðvastyrk eða takmarkaða hreyfigetu. Með því að taka á þessum þáttum erum við ekki bara að reyna að draga úr einkennum heldur einnig að draga úr líkum á endurteknum meiðslum. Þegar við erum vissir um að vandamálið sé fundið og að við getum hjálpað við að laga það þá hefst meðferðin. Meðferðin miðar að því að auka liðleika, minnka bólgur og auka styrk. Liðlosun, mjúkvefjameðferð, teygjur og sértækar æfingar eru algengar aðferðir sem við notum, það fer eftir þörfum hvers íþróttamanns.
Það er okkar upplifun að sífellt fleira íþróttafólk leiti til kírópraktors reglulega yfir árið til þess að líða betur og fá skoðun á stoðkerfinu. Það er ekki bara að leitast eftir því að losna við verki heldur reyna að fá hjálp og ráðgjöf til þess að forðast meiðsli og hámarka álagið sem það þolir við æfingar. Í okkar starfi finnst okkur eðlilegt að fólk geti komið í skoðun án þess að eitthvað sé að, fengið ráðgjöf og svo meðhöndlun ef og þegar hún á við.
Markviss eftirfylgni getur bæði stutt við bataferli og haft jákvæð áhrif á frammistöðu. Ef stoðkerfið er í sem bestu mögulegu ástandi þá er betra tækifæri fyrir bætingu og hámarksárangur í viðkomandi íþróttagrein.
Hvaða skoðun hafið þið á samvinnu við aðrar heilbrigðisstéttir?
Við erum í samskiptum við og vinnum náið með bæði sjúkraþjálfurum, nuddurum, læknum og styrktarþjálfurum. Við teljum að bestur árangur náist þegar við vinnum í nánu samstarfi við þá aðila sem koma að íþróttafólkinu. Slík teymisvinna tryggir að meðferðin og endurhæfingin styðji hvert annað. Hver
stétt hefur sína styrkleika og hlutverk við að sinna viðkomandi. Þegar allir vinna saman eru meiri líkur á árangri og íþróttamanneskjan getur frekar einbeitt sér að æfingunum og náð hámarksárangri til lengri tíma. Uppi á landi þá störfum við á Kírópraktorstofu Íslands í Kópavogi og sjúkraþjálfarastofunni Tindur í Hveragerði. Þegar við erum í Vestmannaeyjum þá störfum við í Allra heilsa á Strandvegi.
Við bjóðum alla þá sem vilja skoðun á stoðkerfinu velkomna, íþróttafólk og aðra jafnt. Það þarf ekki að bíða þangað til verkirnir og vandamálin eru komin heldur frekar að panta tíma og fá ráðgjöf um það hvernig best er að minnka líkur á verkjum og auka vellíðan og endingu.
Ingólfur Ragnar Ingólfsson D.C. Kírópraktor á Kírópraktorstofu Íslands.
Sælkeri vikunnar HJÖRLEIFUR DAVÍÐSSON
Tígull
TRUFFLUPASTA MEÐ COPPA HRÁSKINKU
Ég þakka vini mínum, Jóni Þór, kærlega fyrir áskorunina og býð upp á ekta ítalskan rétt sem mér fannst viðeigandi eftir dvöl mína þar undanfarna daga. Ég ætla að skora á Þóri Helga Hallgrímsson að koma með ljúffenga uppskrift.
BRUSCHETTA
Hráefni:
Súrdeigsbaguette, skorið á ská í stórar sneiðar
6 bleikir tómatar frá Jörfa
Ferskt basil, saxað eftir smekk
Extra virgin ólífuolía
Bleikt Himalaya-salt
1 tsk hunang
Aðferð:
Skerið tómatana smátt og fjarlægið mjúka innvolsið.
Setjið tómatana í skál og bætið söxuðu basil saman við.
Hellið ólífuolíu yfir eftir smekk, saltið létt og bætið hunangi við.
Blandið varlega saman þar til allt er vel samlagað.
Setjið ríkulega af blöndunni á hverja brauðsneið rétt fyrir framreiðslu.
FETTUCCINE AL TARTUFO CON COPPA
hráefni:
500 g fettuccine pasta (fyrir 4)
Coppa (capocollo) hráskinka, eftir smekk
1 laukur, saxaður
Sveppir, sneiddir
Beikon, smátt skorið (valfrjálst)
Parmesanostur, rifinn
Truffluostur
Smjör til steikingar
Salt og pipar
Aðferð:
Smjörsteikið lauk og sveppi á stórri pönnu þar til mjúkt og ilmandi.
Ef beikon er notað, steikið það með frá byrjun.
Sjóðið fettuccine í vel söltu vatni (um 1 msk salt) í 4–5 mínútur, þar til pastað er al dente.
Skerið coppa-hráskinkuna í litla bita og bætið á pönnuna rétt áður en pastað fer saman við.
Setjið pastað á pönnuna með lauknum og sveppunum.
Hellið sósunni yfir og blandið varlega saman þar til allt er vel hjúpað.
Smakkið til með salti og pipar ef þarf.
Hörleifur er sælkeri vikunnar.
SÓSAN
Hráefni:
200 ml rjómi
100 g rifinn parmesanostur
100 g rifinn truffluostur
3 tsk hvíttrufflu salsa
Aðferð:
Hitið rjómann varlega í potti á lágum hita.
Bætið parmesanosti og truffluosti saman við.
Hrærið stöðugt þar til ostarnir hafa bráðnað og sósan er orðin silkimjúk.
Takið pottinn af hitanum og hrærið hvíttrufflu salsanu saman við.
AÐGENGI AÐ
SÁLFRÆÐIÞJÓNUSTU
MÍN LÍÐAN
í Lyfju appinu
Viltu taka stöðuna? Þá getur stutt samtal við sálfræðing verið nytsamlegt fyrsta skref. Stutt ráðgjöf með sálfræðingi er 15 mínútna persónulegt og markvisst fjarviðtal við löggiltan sálfræðing Mín líðan.
Andleg heilsa er mikilvægur hlekkur í þínu heilbrigði Að líta inn á við og meta eigin líðan er mikilvægt skref
Sækja Lyfju appið
ÞJÓÐHÁTÍÐ - OKKAR ÁBYRGÐ
Þjóðhátíð er eitt stærsta og sterkasta vörumerki Vestmannaeyja. Hún er ekki bara helgi í Herjólfsdal, heldur líka hluti af sjálfsmynd Eyjanna, samstöðu og þeirri ímynd sem við viljum að aðrir hafi af samfélaginu okkar. En sú ímynd verður ekki til af sjálfu sér, hún byggist fyrst og fremst á okkur sjálfum, Vestmannaeyingum.
í fyrra drógst aðsókn á hátíðina töluvert saman. Ýmsar skýringar hafa verið nefndar eins og t.d. verð, veður og samkeppni við aðra viðburði. Allt getur þetta átt við að einhverju leyti.
Mig langar til að koma á framfæri nokkrum ábendingum.
Áður en við beinum sjónum okkar alfarið út fyrir Eyjar verðum við að spyrja okkur einfaldar spurningar, mætum við sjálf?
Ef Vestmannaeyingar ætlast til þess að aðrir leggi leið sína á Þjóðhátíð, þá verðum við sjálf að sýna hátíðinni þann stuðning í verki. Með því að mæta, taka þátt, vera sýnileg og láta aðra sjá að þetta sé viðburður sem skiptir okkur raunverulega máli. Hátíð þar sem heimamenn eru áberandi og jákvæðir þátttakendur sendir sterk skilaboð langt út fyrir Dalinn og Eyjarnar.
Sama á við um verðlagningu varðandi leigu á húsum og íbúðum. Það er skiljanlegt að fólk vilji nýta eignir
sínar, en þegar leiguverð fer úr öllu hófi bitnar það ekki bara á gestum heldur á hátíðinni sjálfri. Of hátt verð dregur úr aðsókn, skapar gremju og skaðar orðspor Þjóðhátíðar til lengri tíma. Hófsemi í þessum efnum er ekki tap, hún er fjárfesting í framtíð hátíðarinnar.
Þjóðhátíð er byggð á sjálfboðavinnu, dugnaði og samstöðu. Hún lifir ekki af nema fólk leggi hönd á plóg, í gæslu, þjónustu, skipulagi og fjölda annarra verkefna. Þar hafa Vestmannaeyingar alltaf staðið sterkir, sem sást heldur betur á síðustu hátíð þar sem margir lögðu hönd á plóg við að hjálpa gestum í vanda. En því má aldrei taka sem sjálfsögðum hlut. Þátttaka okkar er forsenda þess að hátíðin haldi áfram að vera sú Þjóðhátíð sem við erum stolt af, því í grunninn er þetta jú fjáröflun fyrir barna- og unglingastarf ÍBV.
Þjóðhátíð er ekki „þeirra“ hún er okkar.
Þannig að ef við viljum að aðrir mæti og snúi aftur ár eftir ár, þá verðum við fyrst og fremst að mæta sjálf af ábyrgð, gleði og stolti.
Jónas Guðbjörn Jónsson Formaður Þjóðhátíðarnefndar
FARA AÐ SKIPTA UM GÓLFEFNI?
FYRSTA SÆTIÐ ER Í BOÐI Á LAUGARDAGINN
miklu máli. Við hvetjum alla til að mæta!
Nú er komið að sennilega stærsta leik tímabilsins – hvernig hefur veturinn verið hingað til?
Já það er óhætt að segja það, það er virkilega gaman að vera staddur á þeim stað með liðið að við séum að fara í topp slag gegn val þar sem 1. sætið í deildinni er í boði. Það voru ekki margir sem höfðu trú á því fyrir tímabilið að þetta yrði staðan... En stelpurnar eru búnar að vera alveg ótrúlega flottar það sem af er tímabili, mikil samstaða í hópnum og ósvikin stemning sem ég held að smiti út frá sér. Þær eru hrikalega duglegar að æfa! Við Hilmar erum oft á tíðum að reyna að stoppa þær af, slíkur er viljinn. Teymið er að vinna vel saman. Elías styrktarþjálfari, Elísa og Bjartey sjúkraþjálfarar, Unnur og Harpa liðstjórar, Hilmar og undirritaður.
Breytist undirbúningurinn eitthvað þegar svona mikið er undir, eða snýst þetta fyrst og fremst um að halda rútínunni?
Við reynum bara að halda okkar rútínu eins mikið og hægt er. Fókusinn er alltaf bara á næsta verkefni, sem er næsti leikur. Svo undirbúum við okkur eins, alveg sama við hverja við erum
að fara að spila. Við höfum fallið í þá gryfju að undirbúa liðið ekki nægilega vel. Þá duttum við úr bikar og það var sárt og svekkjandi en fór í reynslubankann.
Hvað finnst þér helst einkenna þetta ÍBV-lið?
Auðmýkt, samstaða, ósérhlífni, gleði... Þetta eru orðin sem koma fyrst upp í hugann! Áhorfendur hafa haft orð á því að það sé svo ótrúlega auðvelt að hrífast með liðinu því að stemmningin sé ósvikin. Það gleður okkur að heyra það. Að sama skapi er auðvelt fyrir stúlkurnar að hrífast með stúkunni þegar hún lætur vel í sér heyra.
Margir ungir leikmenn hafa stigið stór skref í vetur, hversu ánægður ert þú með þróun hópsins?
Við erum gríðarlega ánægðir með þróunina á liðinu það sem af er vetri. Þetta er góð blanda af eldri/reyndari leikmönnum í bland við yngri leikmenn sem fengu dýrmæta reynslu á síðasta tímabili hjá Sigga og Hilmari. Þessar stelpur eru svo fyrir vikið tilbúnar til að taka ábyrgð og stíga upp þegar á þarf að halda. Eldri leikmennirnir í liðinu skapa svo þessa umgjörð innan liðsins að öllum í liðinu líður vel. Auðvitað er fullt af hlutum sem við erum að vinna í og værum til í að vera komnir lengra með en þannig er það alltaf í þjálfun. Okkur finnst liðið vera á spennandi vegferð. Hilmar hefur verið lengi með margar af þessum yngri leikmönnum og unnið mjög flott starf!
Hversu mikilvæg er þessi breidd og blanda reynslu og æsku í hópnum?
Þetta er svo ótrúlega mikilvægt, án þessarar blöndu væri mun erfiðara að búa til næstu kynslóð handbolta stúlkna. Það er í raun alveg magnað að vera með einn yngsta meðalaldur í deildinni (fyrir utan Selfoss) en samt að ná á
þann stað sem liðið er á í dag. Það er hlutverk okkar þjálfaranna að vera sífellt að halda leikmönnum á tánum, halda þeim á jörðinni og í fókus.
Finnurðu að leikmenn fái aukna orku þegar húsið fyllist?
Algjörlega, á því leikur engin vafi! Stemningin á okkar heimavelli er einstök, okkar stuðningsfólk mætir á leikinn ef þau mögulega komast og styðja vel við íbv. Leikmenn fá alveg klárlega aukna orku en fyllast jafnframt miklu stolti að vera að spila fyrir íbv (allt fólkið okkar).
Getur stuðningurinn skipt sköpum í svona leik?
Margir af okkar andstæðingum hafa hreinlega farið af taugum þegar stemningin er hve mest. Það má nú alveg nefna "veijarana" sem sitja uppi hægra megin (frá okkur séð). Þeir hafa nú tekið nokkra leikmenn á taugum í gegnum tíðina!
Hvað leggur þú helst áherslu á í ræðunni fyrir leik þegar svona mikið er undir?
Að fara út á gólf og njóta. Það er akkúrat fyrir þessi móment sem við erum í þessu og það eru forréttindi fyrir stúlkurnar að fá að taka þátt í svona sýningu með fólkinu sínu. Gleyma sér í stemmningunni og skilja allt sitt eftir á parketinu.
Að lokum: hvað viltu segja við Eyjamenn og Eyjakonur fyrir sunnudaginn?
Stúlkurnar okkar hafa komið sér í þá stöðu að fá leik þar sem 1.sætið er í boði fyrir sigurvegarann og það á heimavelli. Þeim dreymir um að spila fyrir fullri höll! Við hvetjum alla til að mæta og taka þátt í veislunni, svara kallinu og láta til sín taka. Við hlökkum til að sjá ykkur á vellinum næstkomandi laugardag.
24.01.2025 KL 14:00
Nýfæddir Vestmannaeyingar
ÞORRI ERLENDSSON Tígull óskar fjölskyldunum innilega til hamingju!
Fæðingardagur: 10. febrúar 2025
Foreldrar:
Elísabet Bára Baldursdóttir og Erlendur Ágúst Stefánsson
Þyngd: 3170 g Lengd: 51 cm
HARALDUR ÞÓR HANNESSON
Fæðingardagur: 11. febrúar 2025.
Foreldrar:
Birgitta Dögg Óskarsdóttir og Hannes Haraldsson
Þyngd: 3254 g
Lengd: 52 cm
Móður afi og amma: Óskar Þór Kristjánsson og Bylgja Dögg Guðjónsdóttir
Föður afi og amma: Haraldur Hannesson og Anna Ólafsdóttir
Tígull Kírópraktorstöðin.pdf 1 27.10.2025 23:07:17
Við komum þér til betri heilsu.
Tímabókanir hjá kírópraktor í síma 588-8085.
Stóra systir: Dagný og er 3 ára
Móður afi og amma: Baldur Þór Bragason og Helen Arndís Kjartansdóttir
Föður afi og amma: Stefán Hauksson og Dagný Erlendsdóttir
OPIÐ ALLA DAGA FRÁ KL. 11:30 VERIÐ VELKOMIN Í
KAREN LIND LOGADÓTTIR SÚ HEPPNA
Það voru hressar mæðgur sem mættu í höfuðstöðvar Tíguls í gærmorgun og tóku á móti fallegum gjöfum frá Póley, Heimadecor og Litlu Skvísubúðinni.
En það var hún Karen Lind Logadóttir sem var dregin út úr hóp þeirra barna sem fæddust á árinu 2025 og voru send inn til birtingar á
Tígli. Alls voru það 33 foreldrar sem sendu inn mynd og upplýsingar um börnin sín sem voru birt á síðasta ári. Tígull þakkar þeim fyrir að lofa lesendum okkar að fylgjast með.
Karen Lind fæddist þann 31. maí 2025. Foreldrar: Svala Björk Hólmgeirsdóttir og Logi Snædal Jónsson Þyngd: 3130 gr
Lengd: 49 cm
Stóra systir heitir Jóhanna Björk, 5 ára og stóri bróðir heitir Jón Snædal, 1 árs.
Tígull, Heimadecor, Póley og Litla Skvísubúðin óska Karen Lind og fjölskyldu til hamingju.
Nýfæddir Vestmannaeyingar
Tígull óskar fjölskyldunum innilega til hamingju!
VICTOR ÞÓR LEUNG
Fæðingardagur: 26. Maí 2025
Foreldrar:
Þórunn Jóhanna Viktorsdóttir og Siu Fung Leung
Þyngd: 3215 g Lengd: 49 cm
SIGURBJÖRN FLOSI JÓNSSON
Fæðingardagur: 21. Júní 2025
Foreldrar:
Heiða Björk Andersen og Jón Viðar Óðinsson
Þyngd: 4550 g
Lengd: 54 cm
Móður afi og amma: Cassandra Sveinsdóttir og Peter Skov Andersen
Föður afi og amma: Sóley María Hafsteinsdóttir og Sigurbjörn Hilmarsson
Er janúar þinn skoðunarmánuður?
Frumherji í Eyjum vikuna 26. - 29. janúar
Lokað í hádeginu
Tímapantanir í síma 570 9090
Faxastígur 38
GAMLA MYNDIN
Hörður Sigurgeirsson starfaði sem ljósmyndari í Vestmannaeyjum um og eftir miðja síðuastu öld. Hann skildi eftir sig merkilegt safn bæði mannamynda og mynda úr daglega lífinu. Sonur hans Friðrik hefur haldið utan um safnið og oft hefur hann farið m.a. á Hraunbúðir og verið með myndasýningu fyrir íbúana. Sjálfur byrjaði Friðrik ungur að taka myndir og grunnurinn er það sem hann lærði af föður sínum.
Hörður Sigurgeirsson, ljósmyndari og píanókennari, fæddist á Akureyri 6. maí 1914 og lést í Reykjavík 2. júní 1978 þá aðeins 64 ára gamall. Hann fluttist til Vestmannaeyja 1949 og rak hér ljósmyndastofu frá 1950 til 1965 auk þess að kenna á píanó.
Tígull mun birta myndir eftir Hörð í tölublöðum sínum og gaman verður að heyra hvort að fólk kannsist við þá sem eru á myndunum eða staðsetninguna.
Kannast þú við þessa peyja?
Hressingarganga
Herjólfshöllinni alla daga
08:00 - 12:00
14:00
VÖRUHÚSADEILDIN 2026 KOMIN AF STAÐ
HJÁ PÍLUFÉLAGI VESTMANNAEYJA
34 keppendur skráðir til leiks og ungir pílukappar vekja athygli í fyrstu umferð
Starfið hjá Pílufélagi Vestmannaeyja er komið á fullt skrið og alls eru 34 keppendur skráðir til leiks í Vöruhúsadeildinni 2026. Keppt er í fjórum deildum, þar sem keppni er hörð á öllum stigum.
Hér má sjá úrslit keppenda eftir fyrstu umferð mótsins.
Athygli vekur að Sindri Orrason, sem enn er aðeins í grunnskóla, tryggði sér sæti í fyrstu deild, sem telst frábær árangur miðað við aldur og reynslu. Þórarinn fylgdi þar fast á hæla hans, en Birnir var ekki nema hársbreidd frá því að ná sama árangri.
Í þriðju deild steig Aron Sindrason heldur betur upp og sigraði deildina af miklum krafti. Þá er einnig vert að nefna að Sindri Orra er með þriðja hæsta meðaltal allra keppenda í mótinu, sem verður að teljast algjörlega sturlaður árangur. Tígull mun halda áfram að fylgjast með gangi mála hjá Pílufélagi Vestmannaeyja.
HVER ER EYJAMAÐUR ÁRSINS AÐ
ÞÍNU MATI?
Þess sem vel er gert er vel þess virði að minnast. Tígull leitar því til lesenda sinna eftir tilnefningum á Eyjamanni ársins 2025. Sendu inn þína tilnefningu á Tigull.is eða með því að skanna kóðann hér til hliðar.
