100 ÁR A AFMÆLISBLAÐ TAFLFÉLAGS VESTMANNAEYJA
Fyrsta stjórn TV Á stofnfundi Taflfélags Vestmannaeyja 29. ágúst 1926 sem fram fór í húsinu Reyni við Bárustíg 5 voru eftirtaldir kosnir í fyrstu stjórn TV: Formaður Hermann Benediktsson, verkstjóri Godthaab, síðar Stóra -Bergholti Vestmannabraut 67, Kristinn Ólafsson, lögfræðingur, Reyni , þáv. bæjarstjóri í Eyjum, ritari og Magnús Bergsson, bakarameistari Tungu við Heimagötu, gjaldkeri. Stofnendur félagsins voru níu talsins, en en viku eftir stofnfundinn bættust ellefu í hópinn og voru félagsmenn 20 talsins þegar regluleg starfsemi félagsins hófst í byrjun september 1926.
Hermann Benediktsson, fyrsti formaður félagsins.
Íslandsmeistarar TV í úrvalsdeild á Íslandsmóti skákfélaga sem lauk í mars 2026 ásamt nokkrum lykilmönnum í félaginu. Neðri röð frá vinstri, Arnar Sigurmundsson, liðsstjóri b) sveitar og form. afmælisnefndar , Ólafur Hermannsson, liðsstjóri c) sveitar TV, Hallgrímur Steinsson form. TV og í afmælisnefnd, Karl Gauti Hjaltason, í afmælis- og fjáröflunarnefnd, Jóhann Ingvasson í úrvalsdeild, 2. röð f.v., Lúðvík Bergvinsson , fjáröflunarnefnd, Jaime Santos Latasa, úrvaldsdeild og Abihjeet Gupta, úrvalsdeild 3. röð f.v. Guðmundur Gíslason, úrvalsdeild, Helgi Ólafsson, úrvalsdeild, Skákmeistari Vm. 1972 &73, Þorsteinn Þorsteinsson liðsstjóri úrvalsdeildar TV, Örn Leó Jóhannsson, úrvalsdeild, og Jóhann Hjartarson úrvalsdeild. 4. röð frá vinstri, Auðunn Haraldsson stjórnarm. í TV og Björn Þorfinnsson í úrvalsdeildarliði TV. Myndin er tekin í Rimaskóla í mótslok 8. mars 2026 - ljósm. Tómas Tandri Jóhannsson.
Skákin er mögnuð hugaríþrótt Hallgrímur Steinsson formaður TV Nú í lok ágúst 2026 eru 100 ár liðin frá stofnun Taflfélags Vestmannaeyja. Það er erfitt að ímynda sér allar breytingar á samfélaginu og daglegu lífi fólks á síðustu 100 árum. Skákin er eins og með suma hluti, hún breytist ekkert í grunninn og manngangurinn er óbreyttur . Ég gekk í Taflfélagið fyrir um 10 árum þegar ég hætti á sjó, hafði teflt sem krakki og alltaf haft áhuga. Það var skemmtilegt að finna vettvang til að bæta sig og læra að tefla á nýjan hátt. Þetta er alveg sérstakur þjóðflokkur með sitt eigið tungutak í skákinni og talar um kóngsindverja, sikileyinga og fransmenn þannig að fólk sem þekkir ekki reglur og afbrigði í skák ætti erfitt með að skilja nokkurn skapaðan hlut. En það breytist fljótt. Netskákin var og er algjör bylting
Hallgrímur Steinsson, formaður Taflfélags Vestmannaeyja. í skákinni. Nú getur fólk nær fyrirvaralaust teflt við annað fólk hvar sem er í veröldinni sem hefur tengingu á netinu. Auk þess hefur aðgangur að skák og skákmönnum á netinu aukist gríðarlega. Þó að tímarnir hafi breyst þá finnur
áhuginn alltaf sinn farveg. En það er engu að síður skemmtilegast að tefla við skákborðið augliti til auglits. Við í Taflfélaginu höfum verið lánsamir með að fyrirtækin í bænum og bæjaryfirvöld hafa stutt myndarlega við starfsemi TV
í gegnum tíðina. Við höfum haldið úti skákkennslu fyrir skólakrakka í GRV í ákveðnum bekkjardeildum og í skákheimili TV þar sem þau hafa fengið tækifæri til að kynnast þessari mögnuðu hugaríþrótt. Við höfum síðustu áratugi tekið þátt í deildarkeppni taflfélaga - Íslandsmóti skákfélaga sem er í fimm deildum. TV er með átta manna sveit í úrvalsdeild auk liðsstjóra og varamanna og tvær sex manna sveitir í 4. deild auk liðstjóra og varamanna. Það var raunar ótrúlegt að sveit TV í úrvalsdeild varð Íslandsmeistari skákfélaga á 100 ára afmælisárinu í mars 2026 og var það í fyrsta skipti í sögu félagsins. Skákin brúar kynslóðabilið. Á Íslandsmóti skákfélaga sem fram árlega á haustin og vorin með samtals 350-400 keppendum á öllum aldri er örugglega breiðasta aldursbil keppenda á Íslandi. Þeir yngstu eru frá 6 ára og þeir elstu losa 90 árin. Flestir skákmenn hafa einhvern tímann á
ferlinum lent í að steinliggja í skák fyrir mjög ungum andstæðingi og skiptir litlu hvort tapið hafi stafað af augnabliks einbeitingarleysi eða meintri yfirsjón. Þannig er skákin - staðan er jöfn í upphafi og ekki spurt um aldur eða styrkleika. Við gefum út þetta 100 ára afmælisblað til að vekja athygli á starfinu. Skákin er frábært áhugamál til að styrkja einbeitingu, rökhugsun og það er alltaf hægt að bæta sig. Til að fagna 100 ára afmælinu verða einnig haldið sterkt atskákmót á afmælisdaginn 29. ágúst nk. og hraðskákmót sunnudaginn 30. ágúst nk. og fara bæði mótin fram á opna svæðinu í Þekkingarsetri Vestmannaeyja að Ægisgötu 2, 2. hæð. Þar hafa áður verið haldin þrjú fjölmenn atskákmót 2019, 2021 og 2023 og öll aðstaða til fyrirmyndar. Við hvetjum folk á öllum aldri til að taka þátt í starfinu en félagið býður upp á glæsilega aðstöðu í skákheimilinu að Heiðarvegi 9 jarðhæð.
Afmæliskveðja frá Skáksambandi Íslands Skáksamband Íslands óskar Taflfélagi Vestmannaeyja innilega til hamingju með 100 ára afmælið. Að halda úti öflugu og lifandi skákstarfi í heila öld er sannarlega merkilegur áfangi og vitnisburður um þann mikla áhuga, dugnað og fórnfýsi sem félagsmenn hafa sýnt í gegnum tíðina.
Á afmælisárinu náði félagið stórum áfanga þegar Taflfélag Vestmannaeyja varð Íslandsmeistari skákfélaga í fyrsta sinn í sögu félagsins. Það er einstaklega viðeigandi að þessi langþráði titill hafi komið á sama ári og félagið fagnar aldarafmæli. Taflfélag Vestmannaeyja hefur um áratugaskeið verið mikilvægur hluti af íslensku
skáklífi og lagt sitt af mörkum til að efla og þróa skákstarf í Vestmannaeyjum og á Íslandi. Við óskum félaginu og öllum félagsmönnum þess hjartanlega til hamingju með tímamótin og farsældar á komandi árum. Megi skákin halda áfram að blómstra í Vestmannaeyjum og Taflfélag Vestmannaeyja
standa sterkt næstu 100 árin. Til hamingju með 100 ára afmælið og Íslandsmeistaratitilinn! Fyrir hönd Skáksambands Íslands
Jóhanna Björg Jóhannsdóttir forseti Skáksambands Íslands