uZekariya ISAHLUKO 1 1 Ngenyanga yesibhozo, ngomnyaka wesibini kaDariyo, kwafika ilizwi likaYehova kuZekariya unyana kaBherekiya, unyana kaIdo umprofeti, lisithi, 2 UYehova waye enoburhalarhume obukhulu kooyihlo. 3 Yithi ke kubo, Utsho uYehova wemikhosi ukuthi; Buyelani kum, utsho uYehova wemikhosi; ndibuyele kuni; utsho uYehova wemikhosi. 4 Musani ukuba njengooyihlo, ababebizwa bona ngabaprofeti bamandulo, besithi, Utsho uYehova wemikhosi ukuthi, Yabonani, ndingooyihlo; Khanibuye ezindleleni zenu ezimbi, nasezenzweni zenu ezimbi; ke abaphulaphula, abaphulaphula kum; utsho uYehova. 5 Ooyihlo baphi na? nabaprofeti baya kudla ubomi ngonaphakade na? 6 Kodwa amazwi am, nemimiselo yam, endayimisela abakhonzi bam abaprofeti, ayibafumananga na ooyihlo? Babuya bathi, Njengoko wakucingayo uYehova wemikhosi ukwenza kuthi, ngokweendlela zethu nangokweentlondi zethu, wenjenjalo kuthi. 7 Ngomhla wamashumi amabini anesine wenyanga yeshumi elinanye, oko kukuthi, inyanga enguSebhati, ngomnyaka wesibini kaDariyo, kwafika ilizwi likaYehova kuZekariya unyana kaBherekiya, unyana kaIdo umprofeti, lisithi, 8 Ndabona ebusuku, nanko umntu ekhwele ehasheni elibomvu; ngasemva kwakhe ingamahashe abomvu, nangwevu, namhlophe. 9 Ndathi, Ngoobani na aba, nkosi yam? Sathi kum isithunywa esibe sithetha nam, Ndokubonisa ukuba ziyintoni na ezi zinto. 10 Waphendula umntu obemi phakathi kwemimirtile wathi, Aba ngabathunywe nguYehova, ukuba alihambahambe ihlabathi. 11 Basiphendula isithunywa sikaYehova ebesimi phakathi kwemimirtile, sathi, Silihambahambe ihlabathi, nalo lonke ihlabathi lihleli lizolile. 12 Saphendula ke isithunywa sikaYehova, sathi, Yehova wemikhosi, koda kube nini na ungasikwa yimfesane ngenxa yeYerusalem nemizi yakwaYuda, owayibhavumelayo le minyaka imashumi asixhenxe? 13 UYehova wasiphendula isithunywa esibe sithetha nam, ngamazwi alungileyo, ngamazwi athuthuzelayo. 14 Sathi kum isithunywa esibe sithetha nam, Memeza uthi, Utsho uYehova wemikhosi ukuthi, Yabonani, ndime phambi kwam uYehova wemikhosi; Ndinekhwele ngeYerusalem nangeZiyon, ikhwele elikhulu. 15 Ndinoburhalarhume obukhulu kuzo iintlanga ezihleli ngokonwaba; ngokuba bendinoburhalarhume mna umzuzwana, ke zona zongezelelela ububi. 16 Ngako oko, utsho uYehova ukuthi, Ndibuyele eYerusalem ndinenceba; indlu yam iya kwakhelwa khona, utsho uYehova wemikhosi; ulutya lokulinganisa luya kolulwa phezu kweYerusalem. 17 Phinda umemeze, uthi, Utsho uYehova wemikhosi ukuthi, Imizi yam isaya kuphangalala yodwa; uYehova usaya kuyithuthuzela iZiyon, abuye ayinyule iYerusalem.
18 Ndawaphakamisa amehlo am, ndakhangela, nanzo iimpondo, zine. 19 Ndathi kwisithunywa esibe sithetha nam, Ziyintoni na ezi? Sathi kum, Ezi ziimpondo ezichithachithe uYuda, uSirayeli, neYerusalem. 20 UYehova wandibonisa iingcibi zemithi, zine. 21 Ndathi, Aba baze kwenza ntoni na? Sathetha sathi, Ezi ziimpondo ezichithachithe uYuda, ngokokude kungabikho bani uphakamisa intloko yakhe; ke aba baze kuzoyisa, ukuze bazijule iimpondo zeentlanga, eziphakamise uphondo ezweni lakwaYuda, ukuba zilichithachithe. ISAHLUKO 2 1 Ndaphinda ndawaphakamisa amehlo am, ndakhangela, Nanko umntu ephethe ngesandla ulutya lokulinganisa. 2 Ndathi ke, Uya ngaphi na? Wathi kum, Ndiya kulinganisa iYerusalem, ndibone ukuba bungakanani na ububanzi bayo, bungakanani na ubude bayo. 3 Yabona, naso isithunywa esibe sithetha nam, sephuma, saphuma esinye isithunywa, saya kumkhawulela. 4 Sathi kuso, Gidima, uthethe nalaa ndodana, uthi, IYerusalem iya kuhlala ngokwamaphandle, ngenxa yobuninzi babantu neenkomo eziphakathi kwayo. 5 Kuba mna, utsho uYehova, ndiya kuba ludonga lomlilo kuyo mna ngeenxa zonke, ndibe bubuqaqawuli phakathi kwayo. 6 Sabani ezweni langasentla, utsho uYehova; ngokuba ndiniphangalalisa njengemimoya yomine yezulu; utsho uYehova. 7 Zihlangule, Ziyon, uhleli nentombi yaseBhabheli. 8 Ngokuba utsho uYehova wemikhosi ukuthi, Undithume emveni kozuko ezintlangeni ezanibhunyulayo; ngokuba onichukumisayo, uchukumisa ukhozo lweliso lakhe. 9 Ngokuba, uyabona, ndiya kulingisa ngesandla sam kuzo, zibe lixhoba labakhonzi bazo; nazi ukuba uYehova wemikhosi undithumile. 10 Memelela uvuye, ntombi inguZiyon; ngokuba, uyabona, ndiyeza, ndihlale phakathi kwakho; utsho uYehova. 11 Kuya kuthelela kuYehova iintlanga ezininzi ngaloo mini, zibe ngabantu bam, ndihlale phakathi kwakho; wazi ukuba uYehova wemikhosi undithumele kuwe. 12 UYehova uya kumdla ilifa uYuda, isahlulo sakhe emhlabeni ongcwele, abuye ayinyule iYerusalem. 13 Yithini tu, nyama yonke, phambi koYehova; Ngokuba ephakamile ekhayeni lakhe elingcwele. ISAHLUKO 3 1 Wandibonisa uYoshuwa umbingeleli omkhulu, emi phambi kwesithunywa sikaYehova, uSathana emi ngasekunene kwakhe, ukuba amchase. 2 Wathi uYehova kuSathana, UYehova makakukhalimele, Sathana; akukhalimele uYehova oyinyulileyo iYerusalem; lo akasikhuni esirholwe emlilweni na? 3 UYoshuwa ke ebambethe iingubo ezingcolileyo, emi phambi kwesithunywa sezulu. 4 Saphendula sathetha nabemiyo phambi kwaso, sathi, Zisuseni iingubo ezingcolileyo kuye. Wathi ke kuye, Yabona, ndibususile ubugwenxa bakho kuwe, ndikwambese iingubo zokukhululana. 5 Ndathi ke, Mabambeke unkontsho oluhlambulukileyo entlokweni yakhe. Bambeka ke unkontsho olumhlophe