IGenesis ISAHLUKO 1 1Ekuqaleni uThixo wadala izulu nehlabathi. 2 Ke ehlabathini kwakusenyanyeni, kuselubala; kwakumnyama phezu kwamanzi enzonzobila. Waza uMoya kaThixo wafukama phezu kwamanzi lawo. 3 Wathi uThixo, Makubekho ukukhanya. 4 Wakubona ke uThixo ukukhanya ukuba kulungile, wahlula uThixo phakathi kokukhanya nobumnyama. 5 Wathi uThixo ukukhanya yimini, wathi ubumnyama buBubusuku. Kwahlwa, kwasa: yangumhla wokuqala. 6 Wathi uThixo, Makubekho isibhakabhaka phakathi kwawo amanzi, sibe ngumahlulo wokwahlula amanzi kumanzi. 7 Wawenza uThixo isibhakabhaka, wawahlula amanzi angaphantsi kwesibhakabhaka kuwo amanzi angaphezu kwesibhakabhaka. 8 Wathi uThixo isibhakabhaka ngamazulu. Kwahlwa, kwasa, yaba ngumhla wesibini. 9 Wathi uThixo, Amanzi angaphantsi kwamazulu makahlanganiselwe ndaweni-nye, kubonakale okomileyo. 10 Wathi uThixo okomileyo ngumhlaba; wathi intlanganisela yamanzi ziilwandle. Wabona uThixo ukuba kulungile. 11 Wathi uThixo, Umhlaba mawuphume uhlaza, imifuno evelisa imbewu, nemithi yeziqhamo, eyenza iziqhamo ngohlobo lwayo, embewu ikuyo, emhlabeni. 12 Umhlaba waphuma uhlaza, nemifuno evelisa imbewu ngohlobo lwayo, nemithi eyenza iziqhamo, embewu ikuyo, ngohlobo lwayo. Wabona uThixo ukuba kulungile. 13 Kwahlwa, kwasa, yaba ngumhla wesithathu. 14 Wathi uThixo, Makubekho izikhanyiso esibhakabhakeni samazulu, zibe ngumahlulo wokwahlula imini kubusuku; zibe zezemiqondiso, zibe zezamaxesha amisiweyo, zibe zezemihla, neminyaka; 15 Kwaye mazibe zizikhanyiso esibhakabhakeni samazulu, zikhanyise emhlabeni. 16 Wenza uThixo izikhanyiso ezikhulu zazibini; esona sikhanyiso silawule imini, esona sikhanyiso sincinane ukuba silawule ubusuku; wenza neenkwenkwezi. 17 Wazibeka uThixo esibhakabhakeni samazulu, ukuba zikhanyise ehlabathini; 18 nokuba zilawule imini nobusuku, zahlule ukukhanya kubumnyama; wabona uThixo ukuba kulungile. 19 Kwahlwa, kwasa, yaba ngumhla wesine. 20 Wathi uThixo, Amanzi la makanyakazele inyakanyaka, imiphefumlo ephilileyo; 21 Wadala uThixo oominenga mikhulu, nayo yonke imiphefumlo ephilileyo enambuzelayo, awanyakazela ngayo amanzi ngohlobo lwayo, neentaka zonke ezinamaphiko ngohlobo lwazo. Wabona uThixo ukuba kulungile. 22 Wazisikelela uThixo, esithi, Qhamani, nande, niwazalise amanzi aselwandle; 23 Kwahlwa, kwasa, yaba ngumhla wesihlanu. 24 Wathi uThixo, Umhlaba mawuphume imiphefumlo ephilileyo ngohlobo lwayo: izinto ezizitho zine, nezinambuzane, nezinto eziphilileyo zomhlaba ngohlobo lwazo.
25 Wenza uThixo izinto eziphilileyo zomhlaba ngohlobo lwazo, nezinto ezizitho zine ngohlobo lwazo, nazo zonke izinambuzane zomhlaba ngohlobo lwazo. Wabona uThixo ukuba kulungile. 26 Wathi uThixo, Masenze umntu ngokomfanekiselo wethu ngokufana nathi; 27 Wamdala ke uThixo umntu ngokomfanekiselo wakhe; wadala indoda nenkazana. 28 Wabasikelela uThixo, wathi kubo uThixo, Qhamani, nande, niwuzalise umhlaba, niweyise, nibe nobukhosi ezintlanzini zolwandle, nasezintakeni zezulu, nasezinambuzaneni zonke ezinambuzelayo emhlabeni. 29 Wathi uThixo, Yabonani, ndininikile yonke imifuno evelisa imbewu, ephezu komhlaba wonke, nayo yonke imithi eneziqhamo zomthi ovelisa imbewu; yoba kukudla kuni. 30 Nezinto zonke eziphilileyo zomhlaba, neentaka zonke zezulu, nezinambuzane zonke ezisemhlabeni, ezinomphefumlo ophilileyo, ndizinike yonke imifuno eluhlaza ukuba ibe kukudla. Kwaba njalo. 31 Wakubona uThixo konke akwenzileyo, nanko, kulungile kunene. Kwahlwa, kwasa: yangumhla wesithandathu. ISAHLUKO 2 1 Agqitywa ke amazulu nehlabathi, nawo wonke umkhosi wezo zinto. 2 Wawugqiba ke uThixo ngomhla wesixhenxe umsebenzi wakhe awawenzayo; waphumla ngomhla wesixhenxe kuwo wonke umsebenzi wakhe awawenzayo. 3 Wawusikelela uThixo umhla wesixhenxe, wawungcwalisa; ngokuba waphumla ngawo kuwo wonke umsebenzi wakhe awawudalayo uThixo, wawenza. 4 Yiyo le ke inzala yamazulu nehlabathi ekudalweni kwezo zinto, mini wenza uYehova uThixo ihlabathi namazulu; 5 Yonke imifuno yasendle ingekabikho emhlabeni, nayo yonke imifuno yasendle ingekahluli; kuba uYehova uThixo ebengekanisi mvula emhlabeni; kwaye kungekho mntu wokuwusebenza umhlaba. 6 Kwaye kunyuka inkungu iphuma ehlabathini, yawunyakamisa wonke umhlaba. 7 UYehova uThixo wambumba umntu ngothuli lwasemhlabeni, waphefumlela emathatheni akhe impefumlo yobomi; umntu ke waba ngumphefumlo ophilileyo. 8 UYehova uThixo watyala umyezo e-Eden ngasempumalanga; wambeka khona umntu abembumbile. 9 UYehova uThixo wantshulisa emhlabeni yonke imithi enqwenelekayo ngokukhangeleka, nelungele ukudliwa; nomthi wobomi esazulwini somyezo, nomthi wokwazi okulungileyo nokubi. 10 Kwaphuma umlambo e-Eden wokuwunyakamisa umyezo; wahluka apho, waba ziimbaxa ezine. 11 Igama lowokuqala yiPishon; nguwo lowo ujikeleze lonke ilizwe laseHavila, apho kukho igolide. 12 Igolide yelo lizwe intle, ikhona ibhedolaki nelitye lebherilo. 13 Igama lowesibini umlambo yiGihon; nguwo lowo ujikeleze lonke ilizwe lakwaKushi. 14 Igama lowesithathu umlambo yiHidekele; nguwo ocanda ngasempumalanga kwaseAsiriya. Owesine umlambo ngumEfrati.