Waray - The Book of the Prophet Obadiah

Abdias KAPITULO 1 1 An bisyon ni Abdias. Ha sugad hini nasiring an Ginoo nga hi Jehova mahatungud han Edom; Nakabati kita hin sumat tikang kan Jehova, ngan in usa nga embahador iginpadara ngadto ha mga nasud: Buhat kamo, ngan mabangon kita patok ha iya ha pakig-away. 2 Kitaa, ginhimo ko ikaw nga gutiay ha butnga han mga nasud, ngan gintatamay ka gud. 3 An pagpahitaas han imo kasingkasing naglimbong ha imo, Ikaw nga naukoy ha mga guha han bato, Nga an imo urukyan hitaas; nga nasiring ha iya kasingkasing: ¿Hin-o an magdadara ha akon ngadto ha tuna? 4 Bisan kon hitaas ka pariho han agila, Ngan bisan kon magbutang ka han imo salag ha butnga han mga bitoon, tikang didto dadad-on ko ikaw tipaubos,” nasiring hi Jehova. 5 Kon an mga kawatan kumadto ha imo, Kon an mga tikasan ha gab-i, (paonan-o ka gin-uutod!) Diri ba hira mangangawat tubtob nga mabusog hira? kon an mga parag-ani hin ubas kumadi ha imo, diri ba hira magbibilin hin iba nga mga ubas? 6 Gin-uusisa gud an mga butang ni Esau! kon paonan-o ginbibiling an iya mga butang nga tinago! 7 An ngatanan nga kalalakin-an han imo kaupod nagdara ha imo tubtob ha giutan: An kalalakin-an nga nakigmurayaw ha imo naglimbong ha imo ngan nagdaog kontra ha imo; hira nga nakaon han imo tinapay nagbutang hin samad ha ilarum mo: waray bisan hin-o nga sarabotan dida ha iya. 8 Hito nga adlaw, nasiring hi Jehova, diri ko ba bubungkagon an maaramon nga mga tawo tikang ha Edom Ngan an may sarabotan tikang ha kabukiran ni Esau? 9 Ngan an imo magkusog nga mga girriro, O Teman, malilisang, Nga an tagsa nga tawo ha kabukiran ni Esau mamatay pinaagi han pagpatay. 10 Kay an imo kamadarahog kontra ha imo bugto nga hi Jacob an kaarawdan magtatabon ha imo, ngan uutdon ka ha kadayonan. 11 Ha adlaw nga tinindog ka ha luyo nga ligid, ha adlaw nga ginbihag han mga taga-iba nga nasud an iya mga sundalo ngan an mga dayo sinulod ha iya mga ganghaan ngan nagripa ha Jerusalem, nagin pariho ka ha usa ha ira. 12 Kondi diri mo unta sadang kitaon an adlaw han imo bugto ha adlaw nga nagin estranghero hiya; diri ka man unta magmamalipay ha mga anak ni Juda ha adlaw han ira kabungkagan; diri ka liwat angay magyakan hin mapahitas-on ha adlaw han kakurian. 13 Diri ka unta sumulod ha ganghaan han akon katawohan ha adlaw han ira kadaot; oo, waray ka unta magtanaw han ira kasakitan ha adlaw han ira karaotan, o diri ka unta magbutang hin mga kamot ha ira manggad ha adlaw han ira karaotan; 14 Ngan diri ka unta tumindog ha gintataporan nga dalan, basi utdon adton iya mga nakapalagiw; diri mo man unta igtubyan adton iya mga nahibilin ha adlaw han kakurian. 15 Kay an adlaw ni Jehova hirani na ha ngatanan nga nasud: Sugad han imo ginbuhat, ito bubuhaton ha imo: an imo balos mabalik ha imo kalugaringon nga ulo. 16 Kay sugad nga kamo ininom ha akon baraan nga bukid, sugad man an ngatanan nga mga nasud in padayon nga mainom, oo, hira in mainom, ngan hira in maglalamoy, ngan hira in magigin sugad hin waray hira. 17 Kundi ha bukid han Zion magkakaada hin katalwasan, ngan magkakaada hin pagkabaraan; ngan an balay ni Jakob magtatag-iya han ira mga panag-iya. 18 Ngan an panimalay ni Jacob magigin kalayo, ngan an panimalay ni Jose magigin laga, ngan an panimalay ni Esau magigin dagami, ngan hira maglalaga dida ha ira ngan uugtangon hira; ngan waray bisan hin-o nga mahisasalin ha balay ni Esaw; kay hi Jehova nagyakan hini. 19 Ngan an mga taga-sur magtatag-iya han kabukiran ni Esau; ngan hira tikang ha kapatagan an mga Pilisteohanon: ngan hira magtatag-iya han mga uma han Epraim, ngan han mga uma han Samarya: ngan hi Benjamin magtatag-iya han Galaad. 20 An mga bihag hini nga kasundalohan han mga Israelita magtatag-iya han tuna han mga Canaanita, tubtob ha Sarepat. ngan an mga bihag han Jerusalem, nga aadto ha Separad, magtatag-iya han mga bungto ha habagatan. 21 Ngan an mga paratalwas masagka ha Bukid Zion basi hukman an bukid ni Esau; ngan an ginhadian maaada kan Jehova.