2 Juan KAPITULO 1 1 Tikang ha pinili nga babaye ngan ha iya mga anak, nga akon hinigugma hin tinuod; diri la ako an nahigugma, kondi an ngatanan liwat nga nasayod han kamatuoran; 2 Tungod han kamatuoran nga aada ha aton ngan magpapadayon ha aton ha kadayonan. 3 Maada unta ha iyo an grasya, kalooy ngan kamurayawan tikang han Dyos nga Amay ngan han Ginoo JesuCristo nga Anak han Amay, upod an kamatuoran ngan gugma. 4 Nalipay ako hin duro nga hin-agian ko an pipira han imo mga anak nga nagkikinabuhi ha kamatuoran, sugad han iginsugo ha aton han Amay. 5 Ngan yana ginhahangyo ko ikaw, Senyora, nga maghigugmaay kita ha usa kag usa, diri sugad hin bag-o nga sugo, kondi amo an nakarawat naton tikang pa ha tinikangan. 6 Ngan ini an gugma, nga magkinabuhi kita uyon ha iya mga sugo. Amo ini an sugo, nga sugad han iyo hinbatian tikang pa ha tinikangan, kinahanglan magpadayon kamo ha paglakat hini. 7 Kay damo nga mga paralimbong an nagsarang ha kalibutan, nga diri natug-an nga hi Jesu-Kristo inmabot nga tawo. Ini in paralimbong ngan antikristo. 8 Pagbantay kamo basi diri mawara ha iyo an mga butang nga iyo ginpangalimbasogan, kondi makarawat niyo an bug-os nga balos. 9 An bisan hin-o nga naglalabay ngan diri nagpapadayon ha pagturon-an ni Cristo waray han Dyos. Hiya nga nagpapabilin han pagturon-an ni Kristo may-ada hiya han Amay ngan han Anak. 10 Kon may kumadi ha iyo ngan diri magdara hini nga pagturon-an, ayaw hiya karawata ha iyo balay, ngan ayaw hiya pangumustaha. 11 Kay an bisan hin-o nga nangungumusta ha iya nakikigbahin han iya magraot nga mga buhat. 12 Bisan kon damu an akon igsusumat ha iyo, diri ko ito karuyag igsurat gamit an papel ngan tinta. 13 Nangungumusta ha imo an mga anak han imo pinili nga bugto nga babaye. Amen.
3 Juan KAPITULO 1 1 Tikang han tigurang han singbahan ngadto han hinigugma ko nga hi Gayo, nga akon hinigugma hin tinuod. 2 Hinigugma ko nga sangkay, nag-aampo ako nga mag-uswag ka ha ngatanan nga mga butang ngan magin mahimsog, sugad la nga nag-uuswag an imo kalag. 3 Kay nalipay gud ako han inabot an kabugtoan ngan nagpamatuod mahitungod han imo kamatuoran, sugad han imo paglakat uyon ha kamatuoran. 4 Waray na ako labaw nga kalipay kay han akon pakabati nga an akon mga anak naglalakat uyon ha kamatuoran. 5 Hinigugma nga sangkay, matinumanon ka ha bisan ano nga imo ginbubuhat ha kabugtoan, bisan ha mga estranghero. 6 Nagpamatuod hira ha atubangan han singbahan mahitungod han imo gugma. 7 Kay tungod han ngaran ni Jesus kinadto hira, nga waray kumarawat hin bisan ano tikang ha mga Hentil. 8 Salit kinahanglan karawaton naton an sugad nga mga tawo, basi magin mga igkasi kita ha pagbuhat han kamatuoran. 9 Nagsurat ako ngadto han singbahan, kundi hi Diotrepes, nga karuyag magin panguna ha ira, waray kumarawat ha amon. 10 Salit kon kumadto ako, hinunumdoman ko an iya mga buhat nga nagyayakan hin magraot nga mga pulong kontra ha amon. 11 Hinigugma ko nga sangkay, ayaw pagsubad han maraot, kondi pagsubad han maopay. An nagbubuhat hin maopay tikang ha Dios; 12 Ginpapamatud-an hi Demetrio han ngatanan nga mga tawo ngan han kamatuoran mismo. ngan kamo maaram nga an amon pagtestigo in tinuod. 13 Damo pa an akon igsusurat, kundi diri ko ini karuyag igsurat ha imo pinaagi hin tinta ngan pluma. 14 Naglalaom ako nga diri mag-iiha makikita ko ikaw, ngan magkakaistorya kita hin bayhon. An kalinaw maada ha imo. Nangungumusta ha imo an amon kasangkayan. Kumustaha an mga kasangkayan pinaagi han ira ngaran.