2 Yohane NDIMA YA 1 1 Nṋe muhulwane ndi ṅwalela mufumakadzi o nangwaho na vhana vhawe vhane nda vha funa vhukuma. A si nṋe ndi ndoṱhe ane a mu takalela, u dovha a mu takalela vhoṱhe vhane vha ḓivha ngoho. 2 Nga nṱhani ha ngoho ine ya dzula kha riṋe nahone ine ya ḓo dzula i na riṋe lini na lini. 3 Ngavhe vhuthu vhuhulu, khathutshelo na mulalo zwi bvaho ha Mudzimu Khotsi na Murena Yesu Kristo Murwa wa Khotsi zwi tshi vha na inwi, nga ngoho na lufuno. 4 Ndo takala zwihulu nge nda wana vhaṅwe vha vhana vhau vha tshi khou tshimbila ngohoni, samusi ro laedzwa nga Khotsi. 5 Zwino ndi a u humbela mufumakadzi, a thi khou u ṅwalela ndaela ntswa, fhedzi ndi ye ra vha ri nayo u bva mathomoni, ya uri ri funane. 6 Lufuno ndi uri ri tevhedze ndaela dzawe. Mulayo ndi wone we na u pfa u bva mathomoni uri ni tshimbile nga nḓila yeneyo. 7 Ngauri ho ḓala vhafhuri vhanzhi shangoni vhane vha sa tende uri Yesu Kristo o ḓa e muthu wa ṋama. Hoyu ndi mufhuri na mulwa-na-Kristo. 8 Ni ṱhogomele uri ni si xelelwe nga zwithu zwe ra zwi shumela, fhedzi ni ḓo wana malamba o fhelelaho. 9 Muṅwe na muṅwe ane a pfuka pfunzo ya Kristo nahone a si dzule khayo, ha na Mudzimu. Ane a dzula kha pfunzo ya Khristo u na Khotsi na Murwa. 10 Arali ha ḓa muthu a sa ḓisi yeneyi pfunzo, ni songo mu ṱanganedza nḓuni yaṋu nahone ni songo mu lumelisa. 11 Ngauri ane a mu lumelisa u ṱanganela kha mishumo yawe mivhi. 12 Naho ndi na zwithu zwinzhi zwine nda ṱoḓa u ni ṅwalela zwone, a thi ṱoḓi u zwi ṅwala nga bammbiri na inki, fhedzi ndi fulufhela u ḓa kha inwi ra amba ro livhana zwifhaṱuwo, uri dakalo ḽashu ḽi ḓale. 13 Vhana vha khaladzi au o nangwaho vha a u lumelisa. Amene.
3 Yohane NDIMA YA 1 1 Nṋe muhulwane wa tshivhidzo ndi ṅwalela Gayo ane nda mu funa ngangoho. 2 Mufunwa, ndi rabela uri zwithu zwoṱhe zwi u bvelele nahone u vhe na mutakalo wavhuḓi samusi muya wau u tshi khou bvelela. 3 Ngauri ndo takala zwihulu musi vhaṅwe vhahashu vha tshi ḓa vha ṱanziela nga ha ngoho yau, samusi u tshi khou tshimbila ngohoni. 4 A hu na dakalo ḽi fhiraho ḽa u pfa uri vhana vhanga vha khou tshimbila ngohoni. 5 Mufunwa, u a fulufhedzea kha zwoṱhe zwine wa zwi itela vhahashu naho vhatsinda; 6 Vho ṱanziela phanḓa ha tshivhidzo nga ha lufuno lwau, fhedzi arali wa vha ṱuwisa lwendoni lwavho u ya nga maitele a Mudzimu, u ḓo vha wo ita zwavhuḓi. 7 Ngauri vho ṱuwa vha tshi itela dzina ḽawe, vha songo dzhia tshithu kha vha dzitshaka. 8 Nga zwenezwo, ri fanela u ṱanganedza vhathu vho raloho, uri ri kone u shuma navho kha mafhungo-ngoho. 9 Ndo ṅwalela tshivhidzo vhurifhi, fhedzi Diotirefe ane a funa u vha murangaphanḓa vhukati havho ha ri ṱanganedzi. 10 Nga zwenezwo, arali nda ḓa, ndi ḓo humbula mishumo yawe ye a i ita musi a tshi ri pomoka nga maipfi a luvhi, fhedzi ho ngo fushea nga zwenezwo, ha ṱanganedzi vhahashu, na u thivhela vhane vha ṱoḓa u ṱanganedza na u vha pandela tshivhidzoni. 11 Mufunwa, u songo edzisa vhuvhi, fhedzi edzisa zwivhuya. Ane a ita zwivhuya u bva ha Mudzimu, hone ane a ita zwivhi ha athu vhona Mudzimu. 12 Demetrio u na vhuṱanzi havhuḓi nga vhathu vhoṱhe na nga ngoho yone iṋe. nahone ni a zwi ḓivha uri vhuṱanzi hashu ndi ha ngoho. 13 Ndo vha ndi na zwithu zwinzhi zwine nda ṱoḓa u zwi ṅwala, fhedzi a thi ṱoḓi u u ṅwalela nga inki na peni. 14 Fhedzi ndi fulufhela uri ndi ḓo u vhona hu si kale, ra amba ro livhana zwifhaṱuwo. Mulalo u vhe na iwe. Khonani dzashu dzi a ni lumelisa. Ni lumelise dzikhonani nga madzina.