2 Иоанн 1-тӥ ГЛАВА 1 Тӧро быръем кышномуртлы но солэн нылпиосызлы, кудъёссэ мон зэмзэ ик яратӥсько; нош мон гинэ ӧвӧл, ваньмыз зэмлыкез тодӥсьёс; 2 Зэмлык понна, кудӥз милемын улэ но пырак дауръёс ӵоже милемын ӵош луоз. 3 Зэмлыкен но яратонэн Инмар Атайлэсь но Атайлэн Пиезлэсь Иисус Христослэсь ӟечлыксэ, гажанжалянзэ но тупаса улонзэ тӥледлы мед сётозы. 4 Мон туж шумпотӥ, тынад нылпиосыд пӧлысь куд-огез зэмлыкъя ветло шуыса, Атаймылэсь куронкосонзэ басьтӥмы шуыса. 5 Нош табере мон тыныд курисько, кышномурт, выль курон-косон гожтӥ кадь ӧвӧл, нош со, кудӥз милям кутсконысеныз ик вал: ог-огмес мед яратомы. 6 Яратон — со Солэн курон-косонъёсызъя улыны. Таиз курон-косон: кызьы тӥ кутсконысеныз ик кылӥды, со улсын мед улоды. 7 Угось дунне вылэ трос пӧяськисьёс лыктӥзы, соос уг верало, Иисус Христос мугорын лыктӥз шуыса. Таиз алдаськись но антихрист. 8 Учкелэ асьтэды, тыршеммес медам ыштэ, тыр дун мед басьтоды шуыса. 9 Кин Христослэн дышетонэзлэсь палэнэ кошке но со бордын уг улы, солэн Инмарез ӧвӧл. Кин Христослэн дышетонэзъя улэ, солэн Атаез но, Пиез но вань. 10 Кин ке тӥ доры лыктӥз но та дышетонэз ӧз вайы ке, сое дорады эн пумиталэ, эн ӟечкылалэ. 11 Уго кин солы ӟечбуръяське, со солэн урод ужъёсаз пыриське. 12Тросэз тӥледлы гожтоно ке но, бумагаен но чернилаен гожтыны ӧй дӥсьты, нош шумпотонмы тырмоз шуыса, тӥ доры лыктыны но синмысь-чам вераськыны оскисько. 13 Быръем сузэредлэн нылпиосыз тыныд салам верало. Аминь.
3 Иоанн 1-тӥ ГЛАВА 1 Тӧро гожтӥсько яратоно Гайлы, кудзэ мон зэм ик яратӥсько. 2 Яратоно пие, ваньмызлэсь азьло тыныд но ӟеч мед луоз, кызьы тынад лул-сюлэмыд азинлыко луэ. 3 Угось мон туж шумпотӥ, куке вын-агайёс лыктӥзы но зэмлык бордын улӥськод шуыса веразы. 4 Мынам нылпиосы зэмлыкъя уло шуыса кылэмлэсь бадӟым шумпотон мыным ӧвӧл. 5 Яратоное, тон оскымон лэсьтӥськод, мар тон лэсьтӥськод вын-агайёслы но, палэнысь адямиослы но; 6 Соос черк азьын тынад яратонэд сярысь веразы, нош тон соосты Инмарлы оскымон сюрес вылэ поттӥд ке, тон умой лэсьтод. 7 Солэн нимыз понна соос мынӥзы, язычникъёслэсь номыр ӧз басьты. 8 Соин ик милемлы сыӵеослы юрттоно, зэмлыклы ӵош ужась-тыршисьёс мед луомы шуыса. 9 Мон черклы гожтэт гожтӥ, нош Диотреф, соос пӧлын вылӥын луыны яратӥсь, милемыз уг пумита. 10Соин ик, мон лыктӥ ке, тодам ваё солэсь ужъёссэ, кудъёссэ со лэсьтэ, милемлы пумит лек кылъёсын вераськыса, но соин уг тырмы, со ачиз но вын-агайёсты уг пумита, мылкыд карисьёсты уг люкеты, соосты черкысь поттэ. 11 Яратоное, уродэз сьӧры эн ветлы, ӟечез сьӧры уйиськы. Ӟеч лэсьтӥсь Инмарлэсь, нош уродзэ лэсьтӥсь Инмарез ӧз адӟы. 12 Ваньмыз Димитрий сярысь ӟеч верало, озьы ик зэмлык ачиз но. нош тӥ тодӥськоды, милям вераммы зэм шуыса. 13 Гожтыны мыным трос вал, нош тыныд чернилаен но ручкаен гожтыны уг поты. 14 Мон оскисько, ӝоген тонэ адӟо шуыса, ми ымысь ыме вераськомы. Тӥледлы тупаса улон мед луоз. Эшъёсмы тыныд салам верало. Эшъёсты нимын-тулын салам вералэ.