Anidaso Nneduafo Anwensɛm Na AWURADE tie ahiafoɔ, na ɔmmu ne nneduafoɔ animtiaa. Dwom 69:33 Ma ɔdeduani no ahomegye mmra w’anim; sɛdeɛ wo tumi kɛseɛ teɛ, kora wɔn a wɔayi wɔn sɛ wɔnwuo; Dwom 79:11 Wɔbɛtwerɛ yei ama awoɔ ntoatoasoɔ a ɛbɛba no, na ɔman a wɔbɛbɔ wɔn no bɛyi AWURADE ayɛ. Na wafi ne kronkronbea no sorokɔ ahwɛ fam; AWURADE fi ɔsoro hwɛɛ asase; Sɛ wɔbɛte ɔdeduani no si apini; sɛ wɔbɛsan wɔn a wɔayi wɔn ama owuo no; Dwom 102:18-20 Fa me kra firi afiase, na meyi wo din ayɛ, ateneneefoɔ bɛtwa me ho ahyia; ɛfiri sɛ wo ne me bedi adɔeɛ. Dwom 142:7 Anigye ne deɛ ɔwɔ Yakob Nyankopɔn sɛ ne boa, n’anidasoɔ wɔ AWURADE ne Nyankopɔn so: Ɔno na ɔbɔɔ ɔsoro ne asase, ɛpo ne emu deɛ nyinaa, ɔkora nokorɛ so daa, ɔbu atɛn ma wɔn a wɔhyɛ wɔn so, na ɔma wɔn a ɔkɔm de wɔn aduane. AWURADE sane nneduafoɔ no: Dwom 146:5-7
Adiyifo Sɛɛ na AWURADE Nyankopɔn, deɛ ɔbɔɔ ɔsoro na ɔtrɛɛ mu no seɛ nie; nea ɔtrɛw asase mu ne nea efi mu ba no; nea ɔma ɔhome ma ɔman a ɛwɔ so no, na ɔma honhom ma wɔn a wɔnantew mu no: Me AWURADE mafrɛ wo trenee mu, na mɛkura wo nsa, na mahwɛ wo so, na mede wo ayɛ ɔman no apam, ama Amanaman mu kanea; Sɛ wobebue anifuraefo aniwa, na wɔde nneduafo afi afiase hɔ, ne wɔn a wɔte sum mu no afi afiase dan no mu. Yesaia 42:5-7 Awurade Nyankopɔn Honhom wɔ me so; ɛfiri sɛ AWURADE asra me sɛ menka asɛmpa nkyerɛ ahobrɛasefoɔ; wasoma me sɛ menkyekyere wɔn a wɔn akoma abubu, na menka ahofadi ho dawuru nkyerɛ nnommum, na afiase no bue nkyerɛ wɔn a wɔakyekyere wɔn; Yesaia 61:1 Wo nso, ɛnam w’apam mogya so asoma wo nneduafoɔ afiri amena a nsuo nni mu no mu. Mo a mowɔ anidasoɔ nneduafoɔ, monsan mo ho nkɔ abankɛseɛ no mu, ɛnnɛ mpo mɛka sɛ mɛtua mo ka mmɔho mmienu; Sakaria 9:11-12
Nsɛmpa Afei Ɔhene bɛka akyerɛ wɔn a wɔwɔ ne nifa so sɛ: Mommra, mo a m’Agya ahyira mo, momfa ahennie a wɔasiesie ama mo firi wiase mfitiaseɛ no nni: ɛfiri sɛ na ɔkɔm de me, na momaa me aduane, na sukɔm dee me, na momaa me anomee: na meyɛ ɔhɔhoɔ, na mode me kɔɔ mu: Da adagyaw, na mohyɛɛ me ntadeɛ: na meyare, na mobɛsraa me: Na mewɔ afiase, . na mobaa me nkyɛn. Ɛnna ateneneefoɔ bɛbua no sɛ: Awurade, da bɛn na yɛhunuu wo sɛ ɔkɔm de wo, na yɛmaa wo aduane? anaasɛ sukɔm dee no, na ɔmaa wo nsuo? Bere bɛn na yehuu wo sɛ ɔhɔho, na yɛfaa wo kɔɔ fie? anaasɛ woda adagyaw, na wohyɛɛ wo ntade? Anaasɛ da bɛn na yɛhunuu wo sɛ woyare anaa woda afiase, na yɛbaa wo nkyɛn? Na Ɔhene no bɛbua na waka akyerɛ wɔn sɛ: Nokorɛ mise mo sɛ, dodoɔ a moyɛɛ me nuanom nkumaa yi mu baako no, moayɛ me. Mateo 25:34-40
1
Afei ɔka kyerɛɛ wɔn sɛ: Ɔman bɛsɔre atia ɔman, na ahenni asɔre atia ahenni: Na asasewosow akɛse bɛba mmeae ahorow, na ɔkɔm ne ɔyaredɔm; na nhumu a ɛyɛ hu ne nsɛnkyerɛnne akɛseɛ bɛfiri soro aba. Na yeinom nyinaa anim no, wɔde wɔn nsa bɛto mo so, na wɔataa mo, de mo akɔ hyia adan mu ne afiase, na wɔde mo akɔ ahemfo ne atumfoɔ anim me din nti. Na ɛbɛdane akɔ mo nkyɛn de adi adanseɛ. Luka 21:10-13
Asomafoɔ Nnwuma Ɛnna ɔsɔfoɔ panin no ne wɔn a wɔka ne ho nyinaa (a ɛyɛ Sadukifoɔ kuo no) sɔre, na wɔn abufuo hyɛɛ wɔn ma, na wɔde wɔn nsa guu asomafoɔ no so de wɔn kɔtoo amansan afiase. Nanso Awurade bɔfoɔ no buee afiase apon no anadwo, na ɔde wɔn baeɛ, na ɔkaa sɛ: Monkɔ na monnyina asɔredan mu nkɔka nkwa yi mu nsɛm nyinaa nkyerɛ nkurɔfoɔ no. Asomafo no Nnwuma 5:17-20 Enti wɔde Petro too afiase, na asafo no nso bɔɔ mpae a wɔannyae brɛɛ Onyankopɔn. Na Herode pɛe sɛ ɔde no ba no, anadwo no ara na Petro ada asraafoɔ mmienu ntam, na wɔde nkɔnsɔnkɔnsɔn mmienu akyekyere wɔn, na awɛmfoɔ a wɔwɔ ɔpon no ano no hwɛ afiase hɔ. Na hwɛ, Awurade bɔfoɔ baa ne so, na hann bi hyerɛn afiase hɔ, na ɔbɔɔ Petro nkyɛn, na ɔmaa no so kaa sɛ: Sɔre ntɛm! Na ne nkɔnsɔnkɔnsɔn no gui firii ne nsam. Na ɔno de ne nsa kyerɛɛ wɔn sɛ wɔnyɛ komm, na ɔkaa sɛdeɛ Awurade yii no firii afiase no kyerɛɛ wɔn. Na ɔkaa sɛ: Monkɔ nkyerɛ Yakobo ne anuanom. Na ɔfirii hɔ kɔɔ baabi foforɔ. Asomafoɔ Nnwuma 12:5-7,17 Na wɔtoo wɔn mpire bebree no, wɔde wɔn guu afiase, na wɔhyɛɛ afiasehwɛfoɔ no sɛ ɔnkora wɔn so dwoodwoo: Ɔno a ɔnyaa ahyɛdeɛ a ɛte saa no, ɔde wɔn guu afiase a ɛwɔ mu no mu, na ɔde wɔn nan sii ntoma no mu. Na anadwo fã no, Paulo ne Silas bɔɔ mpae, na wɔtoo dwom de yii Onyankopɔn ayɛ, na nneduafo no tiee. Na mpofirim ara asasewosow kɛse bi wosow afiase no fapem, na amonom hɔ ara buee apon no nyinaa, na obiara nwoma mu. Na afiase sohwɛfoɔ no nyanee firii ne nna mu, na ɔhunuu sɛ afiase apon no abue no, ɔtwee ne nkranteɛ, na anka ɔpɛ sɛ okum ne ho, na ɔsusuu sɛ nneduafoɔ no aguan. Nanso Paulo de nne kɛse teɛɛm sɛ: Mma wo ho nyɛ bɔne, na yɛn nyinaa wɔ ha. Ɛnna ɔfrɛɛ kanea, na ohuruw baa mu, na ɔde ahopopo baa Paulo ne Silas anim, na ɔde wɔn firii adi kaa sɛ: Mmawuranom, dɛn na ɛsɛ sɛ meyɛ na wɔagye me nkwa? Na wɔkaa sɛ: Gye Awurade Yesu Kristo di, na wo ne wo fie bɛgye wo nkwa. Na wɔkaa Awurade asɛm kyerɛɛ no ne wɔn a wɔwɔ ne fie nyinaa. Na ɔfaa wɔn anadwo dɔnhwerew no ara, na ɔhohoroo wɔn mpire; na wɔbɔɔ no asu, ɔne ne nyinaa, ntɛm ara. Na ɔde wɔn baa ne fie no, ɔde aduane sisii wɔn anim, na ne fie nyinaa gyee Onyankopɔn dii. Asomafo no Nnwuma 16:23-34
Nkrataa a Wɔkyerɛw So wɔyɛ Kristo asomfo? (Mekasa sɛ ɔkwasea) Meyɛ pii; wɔ adwumaden a ɛdɔɔso mu, wɔ nsensanee a ɛboro so mu, afiase ahorow a ɛtaa ba mu, wɔ owu mu mpɛn pii. 2 Korintofoɔ 11:23 Enti me a meyɛ Awurade deduani no, mesrɛ mo sɛ momfata ɔfrɛ a wɔde frɛ mo no, Momfa ahobrɛaseɛ ne odwo nyinaa mu, abodwokyɛre mu, momfa ɔdɔ mu nnyae mo ho mo ho; Yɛbɔ mmɔden sɛ yɛbɛma Honhom no biakoyɛ atra asomdwoe hama mu. Efesofo 4:1-3 Enti mma w’ani nwu yɛn Awurade adansedie ne me ne deduani no ho, na mmom nya asɛmpa no amanehunu mu kyɛfa sɛdeɛ Onyankopɔn tumi teɛ; Ɔno na wagye yɛn nkwa, na ɔde ɔfrɛ kronkron afrɛ yɛn, ɛnyɛ yɛn nnwuma so, na mmom sɛnea n’ankasa atirimpɔw ne n’adom a wɔde maa yɛn wɔ Kristo Yesu mu ansa na wiase refi ase no te, Na afei ɔnam yɛn Agyenkwa Yesu Kristo yii ne ho adi,
2
a watu owu afi hɔ, na ɔnam asɛmpa no so de nkwa ne nkwa a enwu da aba hann mu: Ɛno nti na wɔapaw me sɛ ɔsɛnkafo, ne ɔsomafo, ne ɔyɛ Amanaman mufo kyerɛkyerɛfo. 2 Timoteo 1:8-11 Paulo, Yesu Kristo deduani ne yɛn nua Timoteo, de kɔma yɛn dɔfo dɔfo ne yɔnko dwumayɛni Filemon, Nanso ɔdɔ nti mesrɛ wo mmom, sɛ meyɛ obi a wabɔ akwakoraa Paulo, na seesei mayɛ Yesu Kristo deduani nso. Filemon 1:1,9 Nsuro amanehunu a wobɛhunu no mu biara, hwɛ, ɔbonsam de mo mu binom bɛto afiase, na wɔasɔ mo ahwɛ; na mobɛhunu amanehunu nna du: di nokware kɔsi owuo mu, na mɛma wo nkwa abotiri. Adiyisɛm 2:10
3