2 Yone SHAPITA 1 1 Meme mukulu kudi mamu musungula ne bana bandi, bandi munange mu bulelela; ki n’anyi nkayanyi, kadi kabidi bonso bakamanya bulelela; 2 Bualu bua bulelela budi bushikame munda muetu ne nebuikale netu tshiendelele. 3 Ngasa ne luse ne ditalala bikale nenu bia kudi Nzambi Tatu ne kudi Mukelenge Yezu Kristo Muana wa Tatu mu bulelela ne mu dinanga. 4 Ngakasanka bikole bua nakusangana bamue bana bebe benda mu bulelela, bu mutuvua bapete dî dia kudi Tatu. 5 Kadi katataka ndi nkusengelela, mamu mukaji, tshiena nkufundila mukenji mupiamupia, kadi eu utuvua nende katshia ku tshibangidilu ne: Tunangangane. 6 Bualu ebu budi dinanga, bua tuende mu mikenji yende. Eu udi mukenji ne, Anu bu munuakumvua katshia ku tshibangidilu, bua nuendelemu. 7 Bualu bena mashimi ba bungi bakubuele pa buloba, badi kabayi bitabuja ne, Yezu Kristo wakalua mu mubidi wa muntu. Eu udi muena dishima ne mufuilakanyi ne Kristo. 8 Nudimuke bua kanujimiji bintu bitudi benze, kadi bua nupete difutu dionso. 9 Muntu yonso udi usambuka, kayi ushala mu diyisha dia Kilisto, kena ne Nzambi. Muntu udi ushala mu dilongesha dia Kristo, udi ne Tatu ne Muana. 10 Bialua muntu kunudi, kayi mulue ne diyisha edi, kanumuakidile mu nsubu yenu, kanumuedi muoyo ; 11 Bualu bua muntu yonso udi umuela muoyo udi ubuelakana mu bienzedi biende bibi. 12 Bu mundi ne malu a bungi a kunufundila, tshiena musue kuafunda ne dibeji ne mukanda to, kadi ndi mutekemene bua kulua kunudi, bua kuyukila nenu mpala ne mpala, bua disanka dietu dikumbane. 13 Bana ba muanenu wa bakaji musungula badi bakuela muoyo. Amen.
3 Yone SHAPITA 1 1 Meme mukulu kudi munanga Gayo, undi munange mu bulelela. 2 Munanga, ndi nsengelela bua wikale ne diakalengele ku malu onso ne wikale ne makanda a mubidi anu bu mudi anyima webe wenda diakalenga. 3 Bualu bua ngakasanka bikole pakalua bana betu, bakamba bua bulelela budi munda muebe, bu muudi wenda mu bulelela. 4 Tshiena ne disanka dipite dia kumvua ne: bana banyi badi benda mu bulelela. 5 Munanga, malu onso audi wenzela bana benu ne benyi, udi wenza ne lulamatu; 6 Bobu bakajadika dinanga diebe ku mêsu kua ekeleziya, ne wewe mubaye nabu mu luendu luabu mu mushindu udi utshina Nzambi, newenze bimpe; 7 Bualu bua bakaya bua dina diandi, kabayi bangate tshintu kudi bisamba bia bende. 8 Nunku tudi ne bua kuakidila bantu ba mushindu’eu, bua tuikale benzejanganyi ba mudimu ba bulelela. 9 Ngakafundila ekeleziya mukanda, kadi Diotelefe, udi musue kuikala mutambe bunene munkatshi muabu, kena utuitaba. 10 Nunku, bingikala mulue, nenvuluke bienzedi biende biandi wenzaye, udi utubanda ne mei mabi : kayi musankidile bualu ebu ; 11 Munanga, kulondi malu mabi, kadi londa malu mimpe. Muntu udi wenza malu mimpe udi ufumina kudi Nzambi, kadi udi wenza malu mabi kêna mumone Nzambi. 12 Demetelio udi ne lumu luimpe kudi bantu bonso, ne kudi bulelela mene. ne nudi bamanye ne, bujadiki buetu mbulelela. 13 Nakadi ne malu a bungi a kufunda, kadi tshiena musue kukufundila ne kalani ne kaleta ; 14 Kadi ndi ngela meji ne: Nenumone mu katupa kîpi emu, netuyukile mpala ne mpala. Ditalala dikale kuudi. Balunda betu badi bakuela muoyo. Ela balunda muoyo ku mêna abu.