Tiv - The Book of the Prophet Obadiah

Obadia IKYAV I TESE 1 1 Mpase u sha mnenge u Obadia. Ter AÔNDO ngu kaan sha kwagh u Edom nahan; Se ungwa loho hen TER, man i tindi ortyom hen akuraior er: Mough nen, sé mough nen ityav a na. 2 Nenge, M gema u hingir kiriki ken akuraior, u laha u kpishi. 3 Iyolgengese i ken ishima you tsume a we, we u u tem ken atô u akôv a vande, u ijiir you i teman i taven sha la; u a kaa ken ishima na er: Ka an nana gbihim shin inya? 4 Shin wea kende iyol you sha er igyuve nahan, man wea ver iya you hen atô u asan kpaa, Me kende a we shin inya, kape TER A kaa ne. 5 Aluer mbaiv vea va hen a we, mbaiv vea va hen a we tugh yô, vea ii zan zan vea kuma ve ga he? aluer mbasôr atam a wain vea va her a we yô, vea undu atam a wain gaa? 6 Nenge imba er i tôv akaa a Isou sha wono! mba keren akaa a na a myer nena! 7 Ior mba ken mzough wou cii va a we zan zan ar hen kpentar, ior mba ve lu ken bem a we la, ve tsume a we, ve hemba u; mba ve ye kwaghyan wou la, ve wa u ikyav shin inya, mkav ngu ken a na ga. 8 Kape TER A kaa ne, sha iyange la Me tim mbafankwagh ken Edom kera, man mbakavenkwagh mba sha uwo u Isou kpaa gaa? 9 Man mbautyaav ou mba ageegh, we Teman, vea cier ve iyol, zan zan hanma or u nan lu sha uwo u Isou cii nana tim kera. 10 Gadia ipila you i u er anngôu Yakob la, kunya ua cir u, á tim u kera gbem sha won. 11 Sha iyange i u tile vegher ugen la, sha iyange i mbavannya yem a akumautya na uikyangen, mbavannya nyôr ken ihindagar na, ve er ishor sha Yerusalem la, we kpa u lu er môm ken a ve nahan. 12 Kpa ma u ver ishima sha iyange i anmgbian wou sha iyange i a hingir shir la ga; shi ma u ember sha kwagh u ônov mba Yuda sha iyange i mtim ve la kpaa ga; shi yange ma ú ôr kwagh sha iyolgengese sha iyange i ican kpaa ga. 13 Yange ma ú nyôr hen hundagar u ior Av sha iyange i ican ve la ga; een, ma U kenger ican ve sha iyange i mtim ve la ga, ma U kende uwegh sha akaa a ve sha iyange i mtim ve la kpaa ga; 14 Shi ma ú tile sha terankon sha u ú tim mba ve war la ga; shi yange ma u na mba ve lu ken a na mba ve shi her sha iyange i ican la kpaa ga. 15 Gadia iyange i TER mgbôghom sha akuraior cii, er u er nahan, kape á er a we je la, injar you ia hide sha ityough yough. 16 Gadia er ne ma sha icighanwo Wam nahan, kape akuraior cii aa ma kwagh gbem je la, een, aa ma, aa mena, aa hingir er a lu ga nahan. 17 Kpa sha uwo u Shion yô, myom una lu, man icighanmlu una lu her; ya u Yakob kpaa ua ngohol akaa a ve. 18 Tsô ya u Yakob una hingir usu, ya u Yosev kpaa una hingir nomborusu, man ya u Isou di a hingir akôv; or môm ken ya u Isou nana kera shi her ga; gadia TER kaa nahan.” 19 Mba ken imbusutarimese vea ngohol uwo u Isou; man mba ve lu ken toho la yô, ka Mbafiliti, vea ngohol ishule i Eferaim man ishule i Samaria, Benyamin di vea ngohol Gileadi. 20 Mba ve yem a ve uikyangen ken ikyumutya i Mbaiserael ne vea ngohol tar u Mbakanaan zan zan ar sha Sarefati; man mba i yem a ve uikyangen ken Yerusalem, mba ve lu ken Sefaradi la, vea ngohol agar a ken imbusutarimese la. 21 Mbayiman vea kôndo sha uwo u Shion sha u ôron uwo u Isou ijir; nahan tartor kpaa ua hingir u TER.”