Tiv - The Book of Jude

Yuda IKYAV I TESE 1 1 Yuda, wanakiriki u Yesu Kristu man anmgbian u Yakobu, ngu sughun ne mba Aôndo Ter A tsegh ne, a koso ne ken Yesu Kristu. 2 Mhôônom ma zungwen man bem man dooshima ve̱ seer a seer. 3 Ne mbadoon mo ishima, er yange m nôngo sha afatyô wam cii mer me nger ne kwagh u myom u se zough a mi imôngo la nahan kpa, lu hange hange u me nger ne me taver ne ishima sha u nôngon nen ityav kpoghuloo sha ci u jighjigh u nan u i ne uicighanmbaiorov kwa môm la. 4 Gadia ior mbagenev nyôr ken a vese myer, i vande veren ve sha ibo ne ngise je, ka ior mba ve vende Aôndo yô, mba geman mrumun u sha mhôôn u Aôndo wase hingir ijimbagh, mba nyiman Ter wase u a lu Aôndo tswen la, ka Ter wase Yesu Kristu kpaa. 5 Shin er ne fe kwagh ne nahan kpaa, m soo u umbur ne mer, zum u Ter yima ior ken tar u Igipiti kera yô, ken masejime yô, A tim mba ve na jighjigh ga la. 6 Mbatyomov mba Shaav mba yange ve kura mlu ve u hiihii la ga, kpa ve undu ijiir ve i teman la kpaa, A kôr ve ken mshir u tsôron ken ime i ime, sha ci u ijirôron i sha iyange i vesen la. 7 Kape Sodom man Gomora kua agar a a kase ve la kpa, ve er idya shi ve zende sha iyol i kpehen kpen kpen je la, i ver ve sha u ve lu ikyav i tesen, ve ya ican sha usu u tsôron. 8 Kape mbamnyam mba hôngor mban kpa ve hôngor a iyol ve je la, ve laha tahav mbu ve lu a mi la, shi ve tuhwan mba ve lu a icivir la kpaa. 9 Kpa zum u Mikael, ortyom u tamen lu nôngon num a Diabolo shi lu nôngon num a na sha kwagh u ikom i Mose la, a cihi u ôron un ijir i dang ga, kpa a kaa ér: “TER A̱ yange u.” 10 Kpa mban yô, mba lamen sha akaa a ve fe ga la dang, kpa akaa a ve fe sha gbaaôndo, er inyamtoho i i fe kwagh ga nahan la, ka sha akaa shon ve vihin ayol a ve ye. 11 Kwagh á tser ve! gadia ve dondo gbenda u Kain, ve dondo mtsum u Balaam sha hua sha ci u injar, ve tim sha ihyembeato i Kor. 12 Mban ka avav ken uiniongo enev mba dooshima, zum u ve lu yan kwaghyan a ven imôngo yô, mba koson ayol a ve a mciem shio. ka ikyon i atam a i a use, i lu a atam ga, i kpe kwa har, i wuhe i sha amise kera yô; 13 Ka agôndoamnger a zegemnger a a lu torough torough, a kunya ve ayol a ve; ka asan a zenden zenden, a i koso ime ime sha ci ve gbem sha won yô. 14 Shi Enoki, wan u sha utaankaruhar hii sha Adam la kpaa ôr kwaghôron u profeti sha kwagh ve, a kaa er: Nenge, Ter ngu van a uicighanmbaiorov Nav udubu pue; 15 Una va ôr ior cii ijir, shi una pase mba ve vende Aôndo la cii ibo sha aeren a ve a shami ga a ve eren la cii, man sha akaaôron a ve a dang a mbaasorabo mba ve vende Aôndo la ve ôr sha a na la cii. 16 Mban ka mbagbanahon, mba gban ahon, mba zenden sha asaren a ve ayol a ve; man zwa ve ka u ôr akaa a doon tsung, ve kenger ior sha ishigh ki ve sha ci u mtsera ve. 17 Kpa ne mbadoon mo ishima, umbur nen akaaôron a mbaapostoli mba Ter wase Yesu Kristu vande ôron ne la. 18 Yange ve kaa a ven ér, sha ayange a masejime yô, mbanahantar vea due, mba vea zende sha asaren a ve a a lu shami ga la yô. 19 Ka mba ve pav ayol a ve la, ka mba iyolough, mba a Jijingi ga. 20 Kpa ne yô, mbadoon mo ishima, maan nen ayol a en sha icighanjighjigh wen u nan, eren nen msen ken Icighan Jijingi. 21 Lu nen ken dooshima u Aôndo, keghen mhôônom ma zungwen ma Ter wase Yesu Kristu sha u nan ne uma u tsôron. 22 Shi zungwe nen mbagenev mhôônom, wase nen ve; 23 Mbagenev yô, yima nen ve sha mciem, dughun nen ve ken usu kera; ve kôr ikyondo i i vihi sha iyol la je kpaa ihyom. 24 Un u A fatyô u kuran ne sha er ne gba ga, shi Una fatyô u veren ne sha ishigh ki iengem Na a acôghor iyol ga, a iember i vesen yô. 25 Icivir man iengem man tor man agee a lu a Aôndo tswen, Oryiman wase, hegen zan zan gbem sha won. Amen.