2 Yoh IKYAV I TESE 1 1 Mo tamen, m ngu ngeren hen kwase u i tsough un la kua ônov nav mba ve doom ishima sha mimi la. ka mo tseegh m soom ga, mba ve fe mimi cii kpaa m soo ve; 2 Ka sha ci u mimi u a tem ken a vese shi una lu a vese gbem sha won la. 3 Mrumun u sha mhôôn man mhôônom ma zungwen man bem mba ve dugh hen Aôndo Ter man Yesu Kristu, Wan u Ter, ve̱ lu a ven ken mimi man dooshima. 4 M ember kpishi er m zough ônov ou mbagenev ve lu zenden ken mimi er se ngohol tindi hen Ter nahan yô. 5 Hegen yô, m ngu zamber a we, kwase, m ngu ngeren we tindi u he ga, kpa ka tindi u se lu a mi sha hiihii la mer, se̱ doo ayol a ase. 6 Ka dooshima je ne, ka u se zenden sha atindi a Na. Ka tindi je ne, er ne ungwa sha hiihii la nahan, ka u né zenden sha mi. 7 Gadia mbatsughunior kpishi due shin tar, mba ve pasen er Yesu Kristu va ken iyol i or ga yô. Or ne ka or u tsughun ior shi ka antikristu kpaa. 8 Kuran nen ayol a en sha er akaa a ne er tom sha mi la aa saa ne ga, kpa né zua a injar vough yô. 9 Hanma or u nan per ityesen, nan kera luun ken ityesen i Kristu ga yô, nan ngu a Aôndo ga. Or u nan lu ken ityesen i Kristu her yô, nan ngu a Ter kua Wan kpaa. 10 Aluer or nana va hen a ven man nana va a ityesen ne ga yô, de nyer nen a nan hen ya wen ga, shi de sughun nen nan kpaa ga. 11 Gadia or u nan sugh nan yô, nan ngu nongo a nan ken aeren a nan a bo la. 12 Shin er m lu a akaa kpishi a ngeren ne nahan kpa, m soo u ngeren sha takerada man inki ga, kpa m ngu veren ishima mer me va hen a ven me va lam a ven ishigh a ishigh, sha er iember yase ia iv yô. 13 Ônov mba anmgbian wou u kwase u i tsough un la mba sughun we. Amen.
3 Yoh IKYAV I TESE 1 1 Mo tamen, m ngu ngeren Gayu u doon mo ishima, u a doom ishima sha mimi la. 2 Orwam u doon mo ishima, m ngu eren msen mer, akaa cii a̱ za u iyol shi u lu gbang gbang, er uma wou a lu zan ikyura nahan. 3 Gadia zum u anmgbianev va er shiada sha kwagh u mimi wou, er u lu zenden sha mimi la yô, saan mo iyol kpishi. 4 Aluer m ungwa mer ônov av mba zenden sha mimi yô, kwagh ngu u a hembe saan mo iyol ga. 5 Orwam u doon mo ishima, hanma kwagh u u eren a anmgbianev cii, wea lu mbavannya kpaa, u ngu eren sha mimi; 6 Ve er shiada sha dooshima wou sha ishigh ki tiônnongo, kpa aluer u za a ve sha gbenda u Aôndo yô, u er doo je. 7 Gadia ka sha ci u iti Na ve dugh ye, ve ngohol ma kwagh hen atôatyev ga. 8 Nahan yô, gba u se ngohol ambaaior la doo doo, sha er se lu mba eren tom u mimi a ve imôngo yô. 9 M nger tiônnongo washika, kpa Diotrefe u a soo u lun orhemen ken a ve la, rumun se ga. 10 Sha nahan yô, zum u me va yô, me umbur aeren a na a a lu eren, a lamen sha a vese dang la, kpa kwagh ne kuma un ga, shi un iyol na kpaa ngohol anmgbianev ga, mba ve soo u ngohol ve la kpaa, yangen ve, shi dughun ve ken tiônnongo kera. 11 Orwam u doon mo ishima, de dondon kwagh u ifer ga, kpa dondo kwagh u dedoo. Or u nan eren kwagh u dedoo yô, ka ken Aôndo nan dugh ye, kpa or u nan eren kwagh u bo yô, nan ngu a nenge a Aôndo ga. 12 Ior cii mba eren shiada sha kwagh u Demeteriu, mimi iyol na kpa ngu eren shiada sha kwagh na. man ne fa shiada wase ne ka u mimi. 13 M lu a akaa kpishi a ngeren, kpa m soo u ngeren we sha inki man pen ga. 14 Kpa m ver ishima mer ica a gba ga tsô me nenge a we, sé lam ishigh a ishigh. Bem a lu sha we. Ahuraior ase sugh u. Sugh nen ahuraior ne sha ati a ve kpaa.