Masaalka Beerreyga Matayos 13:1-23 1 Maalintaas Ciise ayaa guriga ka baxay oo fadhiistay badda agteeda. 2 Dad badan baa u soo ururay, ilaa uu doonni fuulay oo fadhiistay; dadkii badnaa oo dhammuna waxay taagnaayeen xeebta. 3 Markaasuu wax badan masaallo ugu sheegay, isagoo leh, Bal eega, beerrey baa baxay inuu wax beero; 4 Markuu beeray, abuur baa jidka agtiisa ku dhacay, shimbirihiina way yimaadeen oo cuneen. 5 Qaar baa ku dhacay meelo dhagax ah oo aan ciid badan lahayn, oo markiiba way soo baxeen, waayo, dhulka ma ay qoto dheerayn. 6 Markii qorraxdu soo baxday way gubteen, oo xidid ma lahayn, wayna engegeen. 7 Qaar kalena waxay ku dhaceen qodxan, qodxantiina way soo baxday oo ceejisay. 8 Qaar kalena dhul wanaagsan bay ku dhaceen oo midho dhaleen, qaar boqol laab, qaar lixdan laab, qaarna soddon laab. 9 Kii dhego wax ku maqlo leh, ha maqlo. 10 Xertii ayaa u timid oo ku tidhi, Maxaad masaallo ugula hadashaa? 11 Wuxuu u jawaabay oo ku yidhi, Waayo, waxaa laydin siiyaa inaad ogaataan waxyaalaha qarsoon ee boqortooyada jannada, laakiin iyaga lama siiyo. 12 Waayo, ku alla kii wax haysta waa la siin doonaa, wuuna heli doonaa wax ka badan, laakiin kii aan waxba haysan, waa laga qaadi doonaa xataa wuxuu haysto. 13 Sidaa darteed waxaan iyaga kula hadlaa masaallo, waayo, waxay arkaan ma arkaan, oo markay maqlaanna ma maqlaan, mana gartaan. 14 Iyaga waxaa ku rumoobay nebigii Isayos, isagoo leh, Maqal baad maqli doontaan mana garan doontaan, oo arag ayaad arki doontaan, mana garan doontaan. 15 Waayo, dadkan qalbigoodu waa qallafsanaaday, dhegahooduna way dhego beeleen, indhahooduna way xidheen, si aanay mar dambe indhahooda wax ugu arkin, oo aanay dhegahooda wax ugu maqlin, oo aanay qalbigooda wax ugu garan, oo aanay u soo noqon, oo aanan u bogsiin. 16 Laakiin waxaa barakaysan indhihiinna, waayo, way arkaan, dhegihiinnana, waayo, way maqlaan.
1
17 Runtii waxaan idinku leeyahay, Nebiyo badan iyo rag xaq ah ayaa doonayay inay arkaan waxaad aragtaan, mana arkin, iyo inay maqlaan waxaad maqashaan, mana maqlin. 18 Haddaba maqla masaalkii beerreyga. 19 Marka qof maqlo hadalka boqortooyada oo aan fahmin, waxaa yimaada kan sharka leh oo qabsada wixii qalbigiisa lagu beeray. Kanu waa kii jidka ku beeray. 20 Kii lagu beeray meelaha dhagaxa ah, waa kan hadalka maqla oo isla markiiba farxad ku qaata; 21 Xididse isagu ma leh, laakiin wuu sii jiraa wakhti yar; waayo, goortii dhib ama silcin timaado erayga aawadiis, markiiba wuu ka xumaadaa. 22 Kii qodxanta lagu beerayna waa kan hadalka maqla, ka welwelka dunidan iyo khiyaanada maalka ayaa hadalka ceejiya, oo wuxuu noqdaa mid aan midho lahayn. 23 Kii dhulka wanaagsan lagu beeray waa kan erayga maqla oo fahma, oo midho dhala, qaar boqol laab, qaar lixdan laab, qaarna soddon laab.
Markos 4:1-20 1 Markaasuu haddana bilaabay inuu wax ku baro badda agteeda; waxaana u soo ururay dad badan, sidaas darteed wuxuu fuulay doonni, wuxuuna fadhiistay badda; dadkii badnaa oo dhammuna waxay joogeen badda agteeda. 2 Markaasuu wax badan masaallo ku baray, oo markuu wax barayay wuxuu ku yidhi, 3 Dhegaysta; Bal eega, waxaa baxay beerray inuu wax beero. 4 Oo intuu beerayay qaar baa jidka agtiisa ku dhacay, shimbirihii cirkana way yimaadeen oo cuneen. 5 Qaar kalena waxay ku dhaceen dhul dhagax ah oo aan ciid badan lahayn; oo markiiba way soo baxeen, waayo, dhulku ma lahayn qoto dheer. 6 Laakiin qorraxdu markay soo baxday way gubtay, oo xidid ma lahayn, wayna engegtay. 7 Qaar kalena waxay ku dhaceen qodxan, qodxantiina way soo baxday oo ceejisay, oo midho ma ay dhalin. 8 Qaar kalena dhul wanaagsan bay ku dhaceen, oo midho soo baxeen oo koreen, qaarna soddon, qaarna lixdan, qaarna boqol. 9 Markaasuu ku yidhi, Kii dhego wax ku maqlo leh, ha maqlo. 10 Oo markuu keligiis ahaa, kuwii hareerihiisa joogay iyo laba-iyo-tobankii ayaa masaalladii ka weyddiiyey. 11 Markaasuu ku yidhi, Idinka waa laydin siiyaa inaad ogaataan qarsoodiga boqortooyada Ilaah, laakiin kuwa dibadda jooga waxaas oo dhan masaallo loogu sameeyaa. 12 Si ay iyagoo arkaya u arkaan oo aanay u arkin, oo ay maqlaan oo aanay u garan, si aanay mar dambe u soo noqon oo dembiyadooda loo cafiyo. 13 Markaasuu ku yidhi, Miyaydnaan masaalkan garanayn? Haddaba sidee baad masaalladii oo dhan u garan doontaan? 14 Beeralaygu wuxuu beeraa ereyga. 15 Kuwanu waa kuwa jidka agtiisa yaal, meeshii hadalka lagu beero, laakiin markay maqlaan, Shaydaan baa isla markiiba yimaada oo qaada hadalkii lagu beeray qalbigooda. 16 Kuwanuna waa kuwa dhulka dhagaxa ah lagu beeray, kuwaas oo markay ereyga maqlaan, markiiba farxad ku qaata; 17 Xididna isma lihi, laakiin way sii jiraan wakhti yar; dabadeed, markii dhib ama silcin u dhacdo erayga aawadiis, markiiba way ka xumaadaan. 18 Kuwanu waa kuwii qodxanta lagu beeray, kuwa hadalka maqla, 19 Ka welwelka dunidan, iyo khiyaanada maalka, iyo damacyada waxyaalaha kale ayaa soo gala, oo hadalka ceejiya, oo wuxuu noqdaa midho la'aan. 20 Kuwanu waa kuwa dhulka wanaagsan lagu beeray, kuwa hadalka maqla oo aqbala, oo midho soo saara, qaar soddon laab, qaar lixdan laab, qaarna boqol laab. 2
Luukos 8:4-15 4 Markii dad badan isu soo urureen oo magaalo walba uga yimaadeen, wuxuu ku hadlay masaal. 5 Beerreey baa baxay inuu abuurkiisa beero, oo intuu beerayay qaar baa jidka agtiisa ku dhacay, wayna ku tunteen, shimbiraha cirkana way cuneen. 6 Qaar baa dhagax ku dhacay, oo kolkii ay soo baxeenba way engegeen, waayo, qoyaan ma lahayn. 7 Qaar kalena waxay ku dhaceen qodxan, qodxantiina way la soo baxday oo ceejisay. 8 Qaar kalena dhul wanaagsan bay ku dhaceen oo soo baxeen, oo boqol laab ayay midho dhaleen. Markuu waxyaalahan yidhi, ayuu qayliyey, Kan dhego wax lagu maqlo leh ha maqlo. 9 Xertiisii ayaa weyddiisay oo ku tidhi, Waa maxay masaalkan? 10 Markaasuu ku yidhi, Idinka waxaa la idin siiyaa inaad waxyaalaha qarsoon ee boqortooyada Ilaah garataan, kuwa kalena masaallo ayay ku gartaan, si aanay iyagoo arkaya u arkin, oo aanay maqlin u garan. 11 Haddaba masaalku waa kan: Abuurku waa ereygii Ilaah. 12 Kuwa jidka agtiisa jooga waa kuwa maqla, markaasaa Ibliisku yimaadaa oo hadalka ka qaadaa qalbigooda, si aanay u rumaysan oo u badbaadin. 13 Kuwa dhagaxa ku jira waa kuwa markay maqlaan hadalka farxad ku qaata, kuwaasuna xidid ma leh, kuwaas oo in yar rumaysta, wakhtiga jirrabaaddana way iska noqdaan. 14 Kuwa qodxanta ku dhacayna waa kuwan, kuwaas oo markay maqlaan, baxa oo waxaa ceejiya welwelka iyo hodantinimada iyo raaxaysashada noloshan, oo aan midho kaamil ah soo bixin. 15 Laakiin kuwa dhulka wanaagsan jooga waa kuwa, iyagoo qalbi wanaagsan oo wanaagsan ku haysta, markay ereyga maqlaan, oo dulqaadasho ku dhala midho.
3