1 VaKorinte CHITSAUKO 1 1 Pauro, akadanwa nokuda kwaMwari kuti ave mupostori waKristu Jesu, naSositeni hama yedu, 2 kukereke yaMwari iri muKorinde, kuna vaya vakaitwa vatsvene muna Kristu Jesu, vakadanwa kuti vave vatsvene pamwe chete navose vari kwose kwose vanodana kuzita raJesu Kristu Ishe wedu, ravo neredu. 3 Nyasha kwamuri nerugare runobva kuna Mwari Baba vedu naIshe Jesu Kristu. 4 Ndinovonga Mwari wangu nguva dzose nekuda kwenyu, nekuda kwenyasha dzaMwari dzamakapiwa muna Kristu Jesu; 5 kuti pazvinhu zvose makafumiswa naye, pakutaura kose, nemuruzivo rwose; 6 Sezvo uchapupu hwaKristu hwakasimbiswa mamuri. 7 zvekuti hamungashaiwi chipo; muchimirira kuuya kwaIshe wedu Jesu Kristu. 8 uchakusimbisaiwo kusvikira pakuguma, musina mhosva pazuva raIshe wedu Jesu Kristu. 9 Mwari wakatendeka, wamakadamwa kubudikidza naye mukudyidzana kweMwanakomana wake Jesu Kristu Ishe wedu. 10 Zvino ndinokukumbirisai, hama, nezita raIshe wedu Jesu Kristu, kuti mose mutaure chinhu chimwe, uye parege kuva nekupatsanurana pakati penyu; asi kuti mubatanidzwe zvakanaka pamurangariro umwe nemukufunga kumwe. 11 Nekuti ndakanyatsoudzwa pamusoro penyu, hama dzangu, nevekwaKirowa, kuti kune makakava pakati penyu. 12 Zvino ndinoreva izvi, kuti umwe neumwe wenyu unoti: Ini ndiri waPauro; uye ini waAporo; uye ini waKefasi; uye ini waKristu. 13 Kristu wakaparadzaniswa here? Pauro wakarovererwa pamuchinjikwa nekuda kwenyu here? Kana makabhabhatidzwa muzita raPauro here? 14 Ndinovonga Mwari kuti handina kubhabhatidza mumwe wenyu, kunze kwaKrispo naGayo; 15 kuti kurege kuva neungati ndakabhabhatidza muzita rangu ndomene. 16 Uye ndakabhabhatidzawo veimba yaStefana; kunze kwaivava handizivi kana ndakabhabhatidza umwe. 17 Nekuti Kristu haana kundituma kuti ndinobhabhatidza, asi kuti ndiparidze evhangeri; kwete nenjere dzemashoko, kuti zvimwe muchinjikwa waKristu ushaiswe maturo. 18 Nekuti shoko remuchinjikwa kuna vanoparara upenzi; asi kwatiri isu tinoponeswa isimba raMwari. 19 Nekuti kwakanyorwa kuchinzi: Ndichaparadza njere dzevakachenjera, nekushaisa maturo kunzwisisa kwevazivi. 20 Uripi wakachenjera? Uripi munyori? Muiti wenharo wenyika ino uripi? Mwari haana kuita uchenjeri hwenyika ino upenzi here? 21 Nekuti muuchenjeri hwaMwari, nyika kubudikidza neuchenjeri hwayo haina kuziva Mwari, zvakafadza Mwari kubudikidza neupenzi hwekuparidza kuponesa vanotenda. 22 Nokuti vaJudha vanoda chiratidzo, uye vaGiriki vanotsvaka uchenjeri. 23 asi isu tinoparidza Kristu wakarovererwa pamuchinjikwa, kuvaJudha chigumbuso, nekuvaGiriki upenzi;
24 asi kune vakadamwa, vose vaJudha nevaGiriki, Kristu isimba raMwari nenjere dzaMwari; 25 Nekuti upenzi hwaMwari hwakachenjera kupfuura vanhu; uye utera hwaMwari hwakasimba kupfuura vanhu. 26 Nokuti tarirai kudanwa kwenyu, hama dzangu, kuti havazi vazhinji vakachenjera panyama, havazi vazhinji vane simba, havazi vazhinji vanokudzwa. 27 Asi Mwari wakatsaura zvinhu zveupenzi zvenyika ino kuti anyadzise vakachenjera; uye Mwari wakatsaura zvinhu zvisina simba zvenyika, kuti anyadzise vane simba; 28 Uye zvinhu zvakazvidzwa zvenyika ino uye zvinhu zvakazvidzwa, Mwari akasarudza, nezvinhu zvisipo, kuti ashayise simba zvinhu zviripo. 29 kuti kurege kuva nenyama ingazvikudza pamberi pake. 30 Asi naye muri muna Kristu Jesu, iye wakatiitirwa isu uchenjeri hunobva kuna Mwari, nokururama, noutsvene, norudzikinuro. 31 Kuti sezvazvakanyorwa zvichinzi: Uyo unozvikudza, ngaazvikudze muna Ishe. CHITSAUKO 2 1 Zvino ini, hama, pandakauya kwamuri, handina kuuya neunyanzvi hwekutaura kana nenjere, ndichiparidza kwamuri uchapupu hwaMwari. 2 Nekuti ndakafunga kusaziva chinhu pakati penyu, kunze kwaJesu Kristu, naiye wakarovererwa pamuchinjikwa. 3 Uye ndakanga ndinemwi muutera nemukutya nemukudedera kukuru. 4 Shoko rangu nokuparidza kwangu zvakanga zvisina mashoko anonyengera ouchenjeri hwavanhu, asi nokuratidza kwoMweya nokwesimba. 5 kuti kutenda kwenyu kurege kuva munjere dzevanhu, asi musimba raMwari. 6 Asi tinotaura uchenjeri pakati pevakakwana, kwete uchenjeri hwenyika ino, kana hwevatongi venyika ino, vanoshaiswa maturo; 7 Asi tinotaura uchenjeri hwaMwari muchakavanzika, hwakavigwa, hwakagara hwagadzwa naMwari nyika isati yavapo hwuve kubwinya kwedu; 8 ihwo hwusina kuzivikamwa neumwe wevatongi venyika ino; nekuti dai vakaziva, vangadai vasina kuroverera Ishe wekubwinya pamuchinjikwa. 9 Asi sezvazvakanyorwa zvichinzi: Izvo ziso zvarisina kuona, nenzeve zvadzisina kunzwa, kana kupinda mumoyo wemunhu, Mwari zvaakagadzirira vanomuda. 10 Asi Mwari wakazvizarurira kwatiri neMweya wake; nekuti Mweya unonzvera zvinhu zvose, kunyange zvinhu zvakadzika zvaMwari. 11 Nekuti ndeupi munhu unoziva zvinhu zvemunhu, kunze kwemweya wemunhu uri maari? Saizvozvo hakuna unoziva zvinhu zvaMwari, kunze kweMweya waMwari. 12 Zvino isu hatina kugamuchira mweya wenyika, asi Mweya unobva kuna Mwari; kuti tizive zvinhu zvatakangopiwa pachena naMwari; 13 zvatinotaurawo, kwete mumashoko anodzidziswa nenjere dzevanhu, asi anodzidziswa neMweya Mutsvene; tichienzanisa zvinhu zvemweya nezvemweya. 14 Asi munhu wechisikigo haagamuchiri zvinhu zveMweya waMwari; nekuti upenzi kwaari; uye haagoni kuzviziva, nekuti zvinonzverwa neMweya. 15 Asi weMweya unonzvera zvinhu zvose, asi iye amene haanzverwi nemunhu.