Zvakazarurwa CHITSAUKO 1 1 Zvakazarurwa zvaJesu Kristu, zvaakapiwa naMwari, kuti aratidze kuvaranda vake zvinhu zvinofanira kukurumidza kuitika; akatumira nomutumwa wake achiratidza kumuranda wake Johani. 2 wakapupura shoko raMwari, neuchapupu hwaJesu Kristu, nezvinhu zvose zvaakaona. 3 Wakaropafadzwa uyo unoverenga, neavo vanonzwa mashoko echiporofita ichi vachichengeta izvo zvakanyorwa mazviri, nekuti nguva yava pedo. 4 Johwani kukereke nomwe dziri paAsia: Nyasha kwamuri, nerugare zvinobva kuna iye uripo, uye wakange aripo, neuchazouya; nekuMweya minomwe iri pamberi pechigaro chake cheushe; 5 nekuna Jesu Kristu, chapupu chakatendeka, dangwe revakafa, mutungamiriri wemadzishe enyika. Kuna iye wakatida akatisuka pazvivi zvedu neropa rake; 6 akatiita madzimambo nevapristi kuna Mwari naBaba vake; kwaari ngakuve kubwinya nesimba kusvikira rinhi narinhi. Ameni. 7 Tarirai, unouya pamwe nemakore; uye ziso rose richamuona, naivo vakamubaya; nemarudzi ose enyika achachema nekuda kwake. Zvakadaro, Ameni. 8 Ndini Arifa naOmega, kutanga nekuguma, ndizvo zvinotaura Ishe, uripo, wakange aripo, neuchazouya, Wemasimbaose. 9 Ini Johwani ndiri hama yenyuwo, nemufambidzani pakutambudzika, nemuushe, nekutsungirira kwaJesu Kristu, ndakange ndiri pachiwi chinonzi Patimosi nekuda kweshoko raMwari nekweuchapupu hwaJesu Kristu. 10 Ndakanga ndiri muMweya nezuva raShe, ndikanzwa shure kwangu inzwi guru, seraiva rehwamanda; 11 achiti: Ndini Arifa naOmega, wekutanga nekupedzisira; uye: Zvaunoona, nyora mubhuku ugozvitumira kukereke nomwe dziri paAsia; nepaEfeso, nepaSimina, nepaPergamo, nepaTiatira, nepaSadhisi, nepaFiradhefia, nepaRaodhikia. 12 Zvino ndakatendeuka kuti ndione inzwi rakataura neni. Zvino ndatendeuka ndakaona zvigadziko zvemwenje zvinomwe; 13 nepakati pezvigadziko zvemwenje, mumwe akafanana neMwanakomana wemunhu, akafuka nguvo yakasvikira kutsoka, akazvisunga chiuno chake nebhanhire rendarama. 14 Musoro wake nemavhudzi zvakanga zvakachena semakushe amakwai, semagada echando; uye meso ake akaita semurazvo wemoto; 15 tsoka dzake dzakange dzakafanana nendarira inopenya, sedzinenge dzakapiswa muvira; nenzwi rake senzwi remvura zhinji. 16 Uye wakange ane muruoko rwake rwerudyi nyeredzi nomwe; zvino mumuromo make makabuda munondo unopinza unocheka mativi maviri; uye chiso chake chakaita sezuva rinopenya musimba raro. 17 Zvino ndakati ndichimuona, ndakawira patsoka dzake sewakafa; akaisa ruoko rwake rwerudyi pamusoro pangu, achiti kwandiri: Usatya; ndini wekutanga newekupedzisira; 18 Ndini mupenyu, uye ndakanga ndakafa; zvino tarira, ndiri mupenyu kusvikira rinhi narinhi, Ameni; uye ndine kiyi dzegehena nedzerufu.
19 Nyora zvinhu zvawaona, nezvinhu zviripo, nezvinhu zvichazovapo shure kwaizvozvi; 20 Chakavanzika chenyeredzi nomwe dzawaona muruoko rwangu rwerudyi, nezvigadziko zvemwenje zvinomwe zvendarama. Nyeredzi nomwe ndivo vatumwa vekereke nomwe; nezvigadziko zvemwenje zvinomwe zvawaona ndidzo kereke nomwe. CHITSAUKO 2 1 Nyorera mutumwa wekereke iri paEfeso; Zvanzi naiye akabata nyeredzi nomwe muruoko rwake rworudyi, unofamba pakati pezvigadziko zvemwenje zvinomwe zvendarama; 2 Ndinoziva mabasa ako, nokushingaira kwako, nokutsungirira kwako, uye kuti haugoni kutsungirira vakaipa; 3 ukatsungirira, ukava nemoyo murefu, ukashingaira nekuda kwezita rangu, ukasaneta. 4 Asi ndine pandinopokana newe, kuti wakasiya rudo rwako rwekutanga. 5 Naizvozvo rangarira pawakawa, uye utendeuke ugoita mabasa ekutanga; kana ukasadaro, ndichauya kwauri nekukurumidza, ndigobvisa chigadziko chako chemwenje panzvimbo yacho, kunze kwekuti watendeuka. 6 Asi ichi unacho, kuti unovenga mabasa avaNikoraiti, andinovenga iniwo. 7 Une nzeve ngaanzwe zvinoreva Mweya kukereke; Unokunda ndichapa kuti adye zvemuti weupenyu, uri pakati peParadhiso yaMwari. 8 Nyorera mutumwa wekereke iri paSimina; Zvinhu izvi ndizvo zvinotaura wekutanga newekupedzisira, wakange akafa uye mupenyu; 9 Ndinoziva mabasa ako nedambudziko neurombo (asi uri mufumi), nekunyomba kwaivo vanoti vaJudha, ivo vasiri ivo, asi vari sinagoge raSatani. 10 Usatya zvinhu izvo zvauchatambudzika nazvo; tarira, dhiabhorosi woda kuisa vamwe venyu mutirongo, kuti muidzwe; uye muchava nedambudziko mazuva gumi; iva wakatendeka kusvikira parufu, uye ndichakupa korona yeupenyu. 11 Une nzeve ngaanzwe zvinoreva Mweya kukereke; Unokunda haangakuvadzwi nerufu rwechipiri. 12 Nyorera mutumwa wekereke iri paPegamo; Izvi ndizvo zvinotaura une munondo unopinza, unocheka kumativi maviri; 13 Ndinoziva mabasa ako, uye paunogara, ndipo pane chigaro chaSatani; uye wakabatisisa zita rangu, uye hauna kuramba kutenda kwangu, kunyange napamazuva Antipasi aiva chapupu changu chakatendeka, akaurawa pakati penyu, apo Satani. anogara. 14 Asi ndine zvinhu zvishoma zvandinopokana newe, nekuti unavo ipapo vanobatisisa dzidziso yaBharami, wakadzidzisa Bharaki kuisa chigumbuso pamberi pevana vaIsraeri, kuti vadye zvakabayirwa zvifananidzo nekuita upombwe. 15 Saizvozvo newe unavo vanobatisisa dzidziso yevaNikoraiti, chinova chinhu chandinovenga. 16 Tendeuka; kana zvikasadaro, ndichakurumidza kuuya kwauri, ndigorwa navo nemunondo wemuromo wangu. 17 Une nzeve ngaanzwe zvinoreva Mweya kukereke; Unokunda, ndichapa kwaari kuti adye kubva pamana yakavanzwa, uye ndichamupa ibwe jena, nepabwe iro zita