Zekaria CHITSAUKO 1 1 Nomwedzi worusere, negore rechipiri raDhariusi, shoko raJehovha rakasvika kuna Zekaria, mwanakomana waBherekia, mwanakomana waIdho, muporofita, richiti, 2 Jehovha akatsamwira madzibaba enyu zvikuru. 3 Naizvozvo iwe uti kwavari, Zvanzi naJehovha wehondo; Dzokerai kwandiri ndizvo zvinotaura Jehovha wehondo neni ndichadzokera kwamuri ndizvo zvinotaura Jehovha wehondo. 4 Regai kuva samadzibaba enyu, nekuti vaporofita vokutanga vakadanidzira kwaari, vachiti, Zvanzi naJehovha wehondo; Dzokai zvino panzira dzenyu dzakaipa napazvakaipa zvamunoita; asi havana kunzwa, kana kunditeerera, ndizvo zvinotaura Jehovha. 5 Madzibaba enyu aripiko? uye vaporofita, vanorarama nekusingaperi here? 6 Asi mashoko angu nemitemo yangu, zvandakaraira varanda vangu, ivo vaporofita, hazvina kubata madzibaba enyu here? vakadzoka, vakati, Jehovha wehondo sezvaakafunga kutiitira, zvakafanira nzira dzedu nezvatakaita, ndizvo zvaakatiitira. 7 Pazuva rechimakumi maviri nemana romwedzi wegumi nomumwe, kureva mwedzi weSebhati, mugore rechipiri raDhariyasi, shoko raJehovha rakasvika kuna Zekariya mwanakomana waBherekia, mwanakomana waIdho muprofita, richiti: 8 Ndakatarira usiku, ndikaona murume akatasva bhiza dzvuku, akamira pakati pemiti yemimirite yaiva mumupata; shure kwake kwakange kune mabhiza matsvuku, ane mavara nemachena. 9 Ipapo ndikati, Aiwa, ishe wangu, zvinyiko izvi? Zvino mutumwa akanga achitaurirana neni akati kwandiri, Ndichakuratidza kuti izvi zvinyi. 10 Murume akanga amire pakati pemiti yemimirite akapindura, akati, Ava ndivo vakatumwa naJehovha kupota-pota nenyika yose. 11 Ivo vakapindura mutumwa waJehovha akanga amire pakati pemiti yemimirite, vakati, Takapota-pota nenyika yose, zvino tarira, nyika yose inyerere, yozorora. 12 Ipapo mutumwa waJehovha akapindura, akati, Haiwa, Jehovha wehondo, mucharamba musinganzwiri nyasha Jerusaremu namaguta aJudha amakatsamwira makore ano ana makumi manomwe kusvikira rinhiko? 13 Ipapo Jehovha akapindura mutumwa akanga achitaurirana neni, mashoko akanaka anonyaradza. 14 Ipapo mutumwa akanga achitaurirana neni, akati kwandiri, Danidzira, uti, Zvanzi naJehovha wehondo; ndine godo pamusoro peJerusarema neZioni negodo guru. 15 Ndakatsamwira kwazvo ndudzi dzavanhu dzakazorora, nekuti ndakanga ndakatsamwa zvishoma, asi ivo vakanyanyisa kuipa. 16 Naizvozvo zvanzi naJehovha, Ndakadzokera Jerusaremu ndine nyasha zhinji; imba yangu ichavakwamo ndizvo zvinotaura Jehovha wehondo uye rwonzi rwokuyera ruchatambanudzirwa pamusoro peJerusaremu. 17 Danidzirazve, uti, Zvanzi naJehovha wehondo; Maguta angu achazotambanudzwazve nomufaro; Jehovha
acharamba achinyaradza Ziyoni, achazvisanangurirazve Jerusaremu. 18 Zvino ndakarinzira meso angu ndikatarira, ndikaona nyanga ina. 19 Ipapo ndikati kumutumwa akanga achitaurirana neni, Zvinyiko izvi? Akandipindura, akati, Ndidzo nyanga dzakaparadzira Judha naIsiraeri neJerusaremu. 20 Jehovha akandiratidza vavezi vana. 21 Ipapo ndikati, Ava vauya kuzobateiko? Akataura, akati, Ndidzo nyanga dzakaparadzira Judha, kusvikira kukasava nomunhu akasimudza musoro wake; CHITSAUKO 2 1 Zvino ndakarinzira meso anguzve, ndikatarira, ndikaona murume akabata rwonzi rwokuyera muruoko rwake. 2 Ipapo ndikati, Unoendepi? Akati kwandiri, kundoyera Jerusaremu, ndione kufara kwaro nokureba kwaro; 3 Zvino tarira, mutumwa akanga achitaurirana neni akabuda, uye mumwe mutumwa akabuda kundosangana naye; 4 akati kwariri, Mhanya, undotaura nejaya iri, uti, Jerusaremu richagarwa semisha isina masvingo, nokuda kwavanhu vazhinji nemombe dzirimo; 5 nekuti ini, ndizvo zvinotaura Jehovha, ndichava kwariri rusvingo rwomoto kumativi ose, ndichava kubwinya kwaro mukati maro. 6 Nhai, imwi tizai panyika yokumusoro, ndizvo zvinotaura Jehovha; nekuti ndakakuparadzirai kumhepo ina dzokudenga, ndizvo zvinotaura Jehovha. 7 Zvirwire, iwe Ziyoni, iwe ugere nomukunda weBhabhironi. 8 nekuti zvanzi naJehovha wehondo; Akanditumira kundudzi dzakakupambai imi, kuti ndiwane kukudzwa; nekuti unokugunzvai imi, unogunzva mboni yeziso rake. 9 nekuti tarirai, ndichazunungusa ruoko rwangu pamusoro pavo, vachava chinhu chakapambwa kuvaranda vavo; ipapo muchaziva kuti Jehovha wehondo ndiye akandituma. 10 Imba, ufare, iwe mukunda weZiyoni; nekuti tarira, ndinouya, ndichagara mukati mako, ndizvo zvinotaura Jehovha. 11 Ndudzi zhinji dzichanamatira Jehovha nezuva iro, vachava vanhu vangu; ndichagara mukati mako; ipapo iwe uchaziva kuti Jehovha wehondo akandituma kwauri. 12 Judha achagara nhaka yaJehovha somugove wake munyika tsvene, achasarudzazve Jerusarema. 13 Nyararai imwi nyama yose pamberi paJehovha; nekuti wamutswa pahugaro hwake hutsvene. CHITSAUKO 3 1 Zvino wakandiratidza Joshua mupristi mukuru, amire pamberi pomutumwa waJehovha, Satani amire paruoko rwake rworudyi, kuti ave mudzivisi wake. 2 Jehovha akati kuna Satani, Jehovha ngaakutuke, iwe Satani; zvirokwazvo Jehovha, wakazvisanangurira Jerusaremu, ngaakutuke; ko ichi hachizi chitsiga chakabvutwa pamoto here? 3 Zvino Joshua akanga akafuka nguvo dzine tsvina, amire pamberi pomutumwa. 4 Akapindura, akataura navakanga vamire pamberi pake, achiti, Bvisai nguvo dzake dzine tsvina. Akati kwaari,