Joeri CHITSAUKO 1 1 Shoko raJehovha, rakasvika kuna Joeri, mwanakomana waPetueri. 2 Inzwai chinhu ichi, imwi vatana, murereke nzeve dzenyu, imwi mose mugere panyika. Zvakadaro zvakamboitika pamazuva enyu, kana pamazuva amadzibaba enyu here? 3 Udzai vana venyu izvozvo, vana venyu vaudzewo vana vavo, navana vavo vaudze rumwe rudzi runotevera. 4 Zvakasiiwa nomuteteni, zvakadyiwa nemhashu; zvakasiiwa nemhashu, zvakadyiwa negwatakwata; zvakasiiwa negwatakwata, zvakadyiwa negwatakwata. 5 Mukai, imwi zvidhakwa, mucheme; ungudzai, imwi mose munomwa waini, nokuda kwewaini itsva; nekuti wagurwa pamuromo wako. 6 Nokuti rudzi rwasvika panyika yangu, rwakasimba, rusingaverengwi, rune meno meno eshumba, runa meno makuru eshumbakadzi. 7 Rwakaparadza muzambiringa wangu, nokuvhuna muonde wangu; matavi awo akaitwa machena. 8 Chemai semhandara yakazvisunga chiuno namasaga nokuda komurume woujaya hwayo. 9 Chipiriso choupfu nechipiriso chinomwiwa zvabviswa paimba yaJehovha; vapristi, ivo vashumiri vaJehovha, vanochema. 10 Munda waparadzwa, nyika inochema; nekuti zviyo zvaparadzwa; waini itsva yapwa, mafuta apera. 11 Nyarai, imwi varimi; ungudzai, imwi varimi vemizambiringa, nokuda kwezviyo nebhari; nokuti goho reminda raparara. 12 Muzambiringa waoma, muonde waoma; mutamba, nomuchindwe, nomuapuri, nemiti yose yokusango, yaoma, nekuti mufaro wavanhu wapera. 13 Zvisungei zviuno namasaga, mucheme imwi vapristi; ungudzai imwi vashumiri veatari; uyai muvate usiku hwose makapfeka masaga, imwi vashumiri vaMwari wangu; nekuti chipiriso choupfu nechipiriso chinomwiwa zvadziviswa paimba yaMwari wenyu. 14 Tsaurai zuva rokutsanya, danai vanhu kuungano yakatarwa, unganidzai vakuru navose vagere munyika mumba maJehovha Mwari wenyu, mudane kuna Jehovha; 15 Maiwe! nekuti zuva raJehovha rava pedo, richasvika sokuparadza kunobva kuna waMasimbaose. 16 Ko zvokudya hazvina kubviswa pamberi pedu, nomufaro nokufarisisa paimba yaMwari wedu here? 17 Mbeu dzinoorera pasi pamavhinga adzo, matura aparadzwa, tsapi dzaputswa; nekuti zviyo zvaoma. 18 Mhuka dzinogomera sei! Mapoka emombe akanganiswa, nekuti hadzina mafuro; zvirokwazvo mapoka amakwai aparadzwa. 19 Aiwa, Jehovha, ndinodana kwamuri, nekuti moto wapedza mafuro, murazvo wapisa miti yose yokusango. 20 Mhuka dzesango dzinochema kwamuri, nekuti hova dzemvura dzapwa, uye moto wapedza mafuro erenje.
CHITSAUKO 2 1 Ridzai hwamanda paZiyoni, muridze mhere pagomo rangu dzvene; vose vagere panyika ngavadedere, nekuti zuva raJehovha rinouya, nekuti rava pedo; 2 zuva rerima nerokusviba, zuva ramakore nerima guru, samambakwedza akawarirwa pamakomo; vanhu vazhinji vane simba; zvakadai hazvina kumbovapo, uye hazvingazovipo shure kwazvo, kusvikira pamakore amarudzi mazhinji. 3 Moto unoparadza pamberi pavo; murazvo unopfuta shure kwavo; nyika yakaita somunda weEdheni pamberi pavo, uye serenje rakaparadzwa shure kwavo; zvirokwazvo, hakuna chichapukunyuka kwavari. 4 Pakuonekwa kwavo vakafanana namabhiza; uye savatasvi vamabhiza, saizvozvo vachamhanya. 5 Somubvumo wengoro dzichakwakuka pamusoro pamakomo, somubvumo womurazvo womoto unopedza mashanga, savanhu vane simba vakagadzirirwa kurwa. 6 Pamberi pezviso zvavo vanhu vanotambudzika kwazvo; zviso zvose zvichasviba. 7 Vachamhanya semhare; vachakwira rusvingo savarwi; vachafamba mumwe nomumwe nenzira yake, asi havangatsauki pamisara yavo; 8 Hakuna achasundidzira mumwe; mumwe nomumwe anofamba nenzira yake; kana vachiwira pamusoro pomunondo, havangakuvadzi. 9 Vachamhanya vachipota neguta; vachamhanyira parusvingo, vachakwira pamusoro pedzimba; vachapinda napamahwindo sembavha. 10 Nyika ichadedera pamberi pavo; denga richadedera, zuva nomwedzi zvichasviba, nyeredzi dzichabvisa kupenya kwadzo; 11 Jehovha anobudisa inzwi rake pamberi pehondo yake, nekuti hondo yake ihuru kwazvo; nekuti muiti wezvaakataura une simba; nekuti zuva raJehovha iguru, rinotyisa kwazvo; ndiani angatsunga? 12 Naizvozvo zvino, ndizvo zvinotaura Jehovha dzokerai kwandiri nemoyo yenyu yose, nokutsanya, nokuchema nokuungudza; 13 bvarurai mwoyo yenyu, murege kubvarura nguvo dzenyu, mutendeukire kuna Jehovha Mwari wenyu; nekuti ane nyasha netsitsi, anononoka kutsamwa, ane tsitsi zhinji, uye anozvidemba pakuitira zvakaipa. 14 Ndiani angaziva kana akadzoka akatendeuka, akasiya maropafadzo shure kwake; icho chipiriso choupfu kana chipiriso chinodururwa kuna Jehovha Mwari wenyu here? 15 Ridzai, hwamanda paZiyoni, tsaurai zuva rokutsanya, danai vanhu kuungano yakatarwa; 16 kokerai vanhu, natsai ungano, kokerai vakuru, unganidzai vana, navanomwa pamazamu, chikomba ngachibude paimba yacho, nomwenga paimba yake yokuvata. 17 Vapristi, ivo vashumiri vaJehovha, ngavacheme pakati peberere neatari, vati, `Regai vanhu venyu, Jehovha, musapa nhaka yenyu pakushoorwa, kuti vahedheni vatonge pamusoro pavo; Iti pakati pavanhu, Mwari wavo aripi? 18 Ipapo Jehovha achava negodo pamusoro penyika yake, akanzwira vanhu vake tsitsi. 19 Jehovha achapindura, akati kuvanhu vake, Tarirai, ndichakutumirai zviyo, newaini, namafuta, muchaguta nazvo;