Jeremia CHITSAUKO 1 1 Mashoko aJeremiya, mwanakomana waHirikia, mumwe wavaprista vaiva paAnatoti munyika yaBhenjamini. 2 Shoko raJehovha rakauya kwaari pamazuva aJosiya, mwanakomana waAmoni, mambo waJudha, negore regumi namatatu rokubata kwake ushe. 3 Rikauyawo pamazuva aJehoyakimu, mwanakomana waJosiya, mambo waJudha, kusvikira pakupera kwegore regumi nerimwe raZedhekia, mwanakomana waJosiya, mambo waJudha, kusvikira pakutapwa kweJerusaremu nomwedzi wechishanu. 4 Zvino shoko raJehovha rakasvika kwandiri, richiti: 5 Ndakakuziva ndisati ndakuumba mudumbu ramai; ndakakutsaura usati wabuda mudumbu ramai, ndikakugadza kuti uve muporofita wamarudzi avanhu. 6 Ipapo ndikati, Aiwa, Ishe Jehovha! tarira, handigoni kutaura, nekuti ndiri mwanana. 7 Asi Jehovha akati kwandiri, Usati ndiri mwanana; nekuti unofanira kuenda kuna vose vandichakutuma, uye zvose zvandinokuraira unofanira kutaura. 8 Usatya zviso zvavo, nekuti ini ndinewe, kuti ndikurwire, ndizvo zvinotaura Jehovha. 9 Ipapo Jehovha akatambanudza ruoko rwake, akabata muromo wangu; Jehovha akati kwandiri, Tarira, ndaisa mashoko angu mumuromo mako. 10 Tarira, ndichakuisa nhasi pamusoro pamarudzi napamusoro poushe, kuti udzure, nokukoromora, nokuparadza, nokukoromora, kuvaka nokudyara. 11 Shoko raJehovha rakauyazve kwandiri, richiti, Jeremiya, unoonei? Ndikati, Ndinoona danda romuamanda. 12 Ipapo Jehovha akati kwandiri, Waona zvakanaka, nekuti ndichakurumidza kutaura shoko rangu, kuti ndiriite. 13 Zvino shoko raJehovha rakauya kwandiri rwechipiri, richiti, Unoonei? Ndikati, Ndinoona hari inovira; chiso chayo chakatarira kurutivi rwokumusoro. 14 Ipapo Jehovha akati kwandiri, Kurutivi rwokumusoro ndiko kuchabuda zvakaipa zvichawira vanhu vose vagere panyika ino. 15 nekuti zvanzi naJehovha, Tarirai, ndinodana marudzi ose oushe ari kurutivi rwokumusoro; vachauya, rimwe nerimwe richaisa chigaro charo choushe pavanopinda pamasuwo eJerusaremu, napamusoro pamasvingo aro kumativi ose, napamaguta ose aJudha. 16 Ndichareva zvandakatonga pamusoro pavo pamusoro pezvakaipa zvavo zvose, zvavakandisiya, vakapisira vamwe vamwari zvinonhuhwira, vakanamata mabasa amaoko avo. 17 Zvino iwe, chizvisunga chiuno, usimuke, uvaparidzire zvose zvandinokuraira; usavhunduswa nezviso zvavo, kuti ndirege kukuvhundusa pamberi pavo. 18 nekuti tarira, ndakakuita nhasi guta rakakombwa neshongwe, nembiru yedare, namasvingo endarira, unorwa nenyika yose, namadzimambo aJudha, namachinda avo, navapristi vavo, navanhu venyika. 19 Ivo vacharwa newe; asi ivo havangakukundi; nekuti ini ndinewe, kuti ndikurwire ndizvo zvinotaura Jehovha.
CHITSAUKO 2 1 Zvino shoko raJehovha rakasvika kwandiri, richiti, 2 Enda undodanidzira munzeve dzeJerusaremu, uchiti, Zvanzi naJehovha, Ndinokurangarirai hunyoro hwohuduku hwenyu, murudo rwevawana venyu, musi wakanditevera murenje, munyika yakanga isina kudzvarwa. 3 Isiraeri vakanga vari rudzi rutsvene kuna Jehovha, zvibereko zvitsva zvaakazviwanira; vose vanomudya vachava nemhosva; zvakaipa zvichauya pamusoro pavo ndizvo zvinotaura Jehovha. 4 Inzwai shoko raJehovha, imi imba yaJakobho, nemhuri dzose dzeimba yaIsraeri. 5 Zvanzi naJehovha, Madzibaba enyu akawana zvisakarurama zvipiko kwandiri, zvavakaenda kure neni, zvavakatevera zvisina maturo, ivo vamene vakava vasina maturo? 6 Uye havana kuti, Aripiko Jehovha wakatibudisa munyika yeEgipita, akatifambisa murenje, nomunyika yerenje nemakomba, nomunyika isina mvura neyomumvuri worufu, nomunyika yakanga isisina munhu akapfuura napo, uye yakanga isingagari munhu? 7 Ndakakusvitsai munyika ineminda yakaorera, kuti mudye zvibereko zvayo nezvakanaka zvayo; asi makati mapinda, mukasvibisa nyika yangu, mukaita nhaka yangu chinhu chinonyangadza. 8 Vapristi havana kuti, Jehovha uripiko? vaibata murayiro vakanga vasingandizivi; vafudzi vakandidarikira, navaporofita vaiporofitira Bhaari, vachitevera zvisingabatsiri. 9 Saka zvanzi naJehovha, Ndicharamba ndichikakavara nemi, ndichakakavara navana vavana venyu. 10 nekuti yambukirai kuzviwi zveKitimi, muone; tumai vanhu Kedhari, mufungisise zvakanaka, muone kana kwakambovapo chinhu chakadai. 11 Ko rudzi ruripo rwakatsinhanhisa vamwari varwo, ivo vasati vari vamwari here? asi vanhu vangu vakatsinhanisa kukudzwa kwavo nezvinhu zvisingabatsiri. 12 Shamiswa nechinhu ichi, iwe denga rose, utye zvikuru, uvhunduswe kwazvo ndizvo zvinotaura Jehovha. 13 nekuti vanhu vangu vakaita zvinhu zviviri zvakaipa; vakandisiya, ini tsime remvura mhenyu, vakazvicherera mativi, mativi akaputsika, asingagoni kuchengeta mvura. 14 Isiraeri muranda here? Muranda akaberekerwa mumba make here? aparadzwa nei? 15 Vana veshumba vakamuombera, vakarira, nokuparadza nyika yake; maguta ake akapiswa, hakuna unogaramo. 16 Vana veNofi neveTapanesi vakapedza vhudzi romusoro wako. 17 Ko hauna kuzviitira izvozvo here, zvawakasiya Jehovha Mwari wako panguva yaakakufambisa panzira yake? 18 Zvino unondotsvakei panzira inoenda Egipita, kundomwa mvura yeSihori? Unondotsvakei panzira inoenda Asiria, kundomwa mvura yomurwizi here? 19 Zvakaipa zvako zvichakuranga, kudzokera kwako shure kunokutuka; naizvozvo ziva, uone, kuti chinhu chakaipa chinovava, kuti wakasiya Jehovha Mwari wako, uye kuti haundityi, ndizvo zvinotaura Ishe, Jehovha wehondo. 20 nekuti yatova nguva huru yaivhuna joko rako, ndikadambura zvisungo zvako; iwe wakati, Handingatadzi; kana uchidzungaira pachikomo chimwe nechimwe chakakwirira napasi pomuti mumwe nomumwe mutema uchifeva.