1 Samueri CHITSAUKO 1 1 Zvino kwakanga kuno mumwe murume weRamataimuzofimi, wenyika yamakomo yaEfuremu, wainzi Erikana, mwanakomana waJehorami, mwanakomana waErihu, mwanakomana waTohu, mwanakomana waZufi, muEfurata; 2 wakange ana vakadzi vaviri; zita romumwe rainzi Hana, uye zita romumwe rainzi Penina; Penina wakange ana vana, asi Hana wakange asina vana. 3 Zvino murume uyu waisikwira gore rimwe nerimwe achibva kuguta rake kundonamata nokubayira Jehovha wehondo paShiro. Zvino vanakomana vaviri vaEri, Hofini naPinehasi, vaiva vapristi vaJehovha, vakanga varipo. 4 Nguva yakati yasvika Erikana, akapa mukadzi wake Penina, navanakomana vake vose navanasikana vake migove yavo; 5 Asi Hana wakamupa migove miviri; nekuti wakange achida Hana, asi Jehovha wakange azarira chizvaro chake. 6 Zvino muvengi wake Penina akamunetsa kwazvo, kuti azvidye moyo, nekuti Jehovha wakazarira chizvaro chake. 7 Akaita saizvozvo gore rimwe nerimwe, kana achikwira kuimba yaJehovha; naizvozvo wakachema, akasadya. 8 Ipapo murume wake Erikana akati kwaari, Hana, unochemeiko? Sei usingadyi? moyo wako une shungu nei? Ko ini handikupfuuriri vanakomana vane gumi here? 9 Naizvozvo Hana wakasimuka, vapedza kudya paShiro, uye vapedza kumwa. Zvino Eri mupristi wakange agere pachigaro pambiru yetemberi yaJehovha. 10 Zvino Hana wakange ane shungu kwazvo, akanyengetera kuna Jehovha, akachema kwazvo. 11 Iye ndokupika mhiko, ndokuti: Jehovha wehondo, kana mukatarira zvirokwazvo kutambudzika kwemurandakadzi wenyu, mukandirangarira, mukasakanganwa murandakadzi wenyu, asi mukapa murandakadzi wenyu mwana mukomana, ipapo ndichamupa kuna Jehovha mazuva ose eupenyu hwake, uye musoro wake haungaveurwi nechisvo. 12 Zvino wakati achiramba achinyengetera pamberi paJehovha, Eri akacherekedza muromo wake. 13 Zvino Hana wakataura mumoyo make; miromo yake yoga yakanga ichimenyenyedzwa, asi inzwi rake rakanga risinganzwiki; naizvozvo Eri wakafunga kuti wadhakwa. 14 Eri akati kwaari, Ucharamba wakabatwa kusvikira rinhiko? bvisa waini yako kwauri. 15 Hana akapindura akati, Kwete, ishe wangu, ndiri mukadzi ane shungu pamweya, handina kumwa waini, kana zvinobata, asi ndadurura mweya wangu pamberi paJehovha. 16 Musati murandakadzi wenyu mwanasikana wakaisvoipa, nekuti kusvikira zvino ndakanga ndichitaura nokuda kokuchema kwangu kukuru nokutambudzika kwangu. 17 Ipapo Eri akapindura, akati, Enda hako norugare; Mwari waIsiraeri ngaakupe chawakakumbira kwaari. 18 Iye akati, Murandakadzi wenyu ngaanzwirwe tsitsi nemi. Naizvozvo mukadzi akaenda hake, akadya, chiso chake chikasazova neshungu. 19 Zvino vakamuka mangwanani, vakanamata kuna Jehovha, vakadzokera ndokusvika kumba kwavo paRama;
Erikana akaziva mukadzi wake Hana; Jehovha akamurangarira. 20 Nguva yakati yapfuura, Hana akava nemimba, akabereka mwanakomana, akamutumidza zita rinonzi Samueri, achiti: Nekuti ndakamukumbira kuna Jehovha. 21 Zvino murume Erikana navose veimba yake vakakwira kuna Jehovha kundobayira chibayiro chegore rimwe nerimwe, nokumupa sezvaakapika. 22 Asi Hana haana kukwira; nekuti wakati kumurume wake, Handingakwiri kusvikira mwana arumurwa, ipapo ndichaenda naye kuti amire pamberi paJehovha, agarepo nokusingaperi. 23 Erikana murume wake akati kwaari, Ita sezvaunofunga; chimbogara hako kusvikira wamurumura; asi Jehovha ngaasimbise shoko rake. Naizvozvo mukadzi akagara, akayamwisa mwanakomana wake, kusvikira amurumura. 24 Wakati arumumura, akakwira naye ane nzombe nhatu, neefa imwe youpfu, nedende rewaini, akandomuisa mumba maJehovha paShiro; mwana achiri muduku. 25 Zvino vakabaya nzombe, vakaisa mwana kuna Eri. 26 Akati, Ishe wangu, nomweya wenyu mupenyu, ishe wangu, ndini mukadzi wakadeya kumira pano pamberi penyu, ndichinyengetera kuna Jehovha. 27 Ndakanyengeterera mwana uyu; uye Jehovha akandipa chandakakumbira kwaari. 28 saka neni ndamupa Jehovha; mazuva ose okurarama kwake wakapiwa Jehovha. akanamata Jehovha ipapo. CHITSAUKO 2 1 Hana akanyengetera, akati, moyo wangu unofarira Jehovha, Runyanga rwangu rwakakwiridzwa muna Jehovha; Muromo wangu wakashamira vavengi vangu; nekuti ndinofarira ruponeso rwenyu. 2 Hakuna mutsvene wakafanana naJehovha nekuti hakuna mumwe kunze kwenyu; uye hakuna dombo rakafanana naMwari wedu. 3 Musaramba muchitaura muchizvikudza zvikuru; Kuzvikudza ngakurege kubuda pamiromo yenyu, nekuti Jehovha ndiMwari unoziva, Mabasa avanhu anoyerwa naye. 4 Uta hwevanhu vane simba hwakavhunika, Vakanga vachigumburwa vakasungwa zvino nesimba. 5 Vakanga vakaguta vakandobatira zvokudya zvavo; vane nzara vakaguma; naizvozvo mhanje ndokubereka vanomwe; Uye iye wakange ana vana vazhinji woshaiwa simba. 6 Jehovha ndiye unouraya, nokuraramisawo; Ndiye unoburusira kuhwiro, nokukwidzawo. 7 Jehovha ndiye unopa urombo, ndiye unofumisawo, ndiye unodukupisa, nokukwiridzawo. 8 Anosimudza murombo kubva muguruva, uye anosimudza murombo kubva padurunhuru, kuti avagarise pakati pemachinda, uye kuti avagarise nhaka yechigaro cheushe chekukudzwa; nekuti mbiru dzenyika ndedzaJehovha, uye wakaisa nyika pamusoro padzo. 9 Uchachengeta tsoka dzavatsvene vake, asi vakaipa vachanyaradzwa murima; nekuti hakuna munhu achakunda nesimba rake. 10 Vavengi vaJehovha vachapwanyiwa; Uchavatinhirira ari kudenga; Jehovha uchatonga migumo yenyika; Uchapa mambo wake simba, nokukwiridza runyanga rwomuzodzwa wake.