2 Johan CHAPTER 1 1 Isor okoeye bachao akade uni maejiu ar uniren hoponko ṭhen iń murubi do noa ciṭhiń oletʼkana. Eken ińiń dulạṛetʼpea ona do baṅ, menkhan okoe sạriakʼtetʼko baḍae akatʼ onko sanamkoge apeko dulạṛetʼpea. 2 Ona sạriakʼtetʼ do abore tahenkana ar jaejug hạbicʼ abo sãore tahena. 3 Isor Baba ar uniren Hopon Jisu Mạsi ṭhen khon sạriakʼ ar dulạṛte daya, mãyã ar suluk ape tulucʼ tahenma. 4 Baba okaṭakʼe hukumakatʼlea, onkage amren adom gidrạko do Isorakʼ sạri horte calakʼiń ńeletʼkote ạḍiń rạskạkʼ kana. 5 E maejiu, ńitokʼ iń nehõram kana, mitʼṭen nawa hukum do baṅ, menkhan pạhil khon oka hukum bon ńamkan onageń oletʼ kana. 6 Dulạṛ do noage, jemon uniakʼ hukum leka bon taṛam. Pạhil khon okaṭakʼ hukum reakʼ kathape ańjom ạguakatʼ onkage ape do noa horte taṛam idipe. 7 Aema bhulạkoge dhạrtiteko seṭer akana one okoe do bako aṅgoceda je Jisu Mạsi do manwa lekateye hecʼlena mente. Nui doe dhokaicʼ kana ar Mạsi birudre kanae. 8 Onate apeakʼ kạmi lạgitʼpe kạmi akatʼ ona do alope atʼakana, bickom purạ kuṛạipe ńam. 9 Jãhãege Mạsiakʼ ona cecetʼakʼe bạgi akatʼ ar uniakʼ cecetʼakʼre bae tahen khan uni do Isor bae ńam akada. Okoe ona sikhnạtre ṭarhao akan uni ṭhen do Baba ar Hopon banarge menakʼkinạ. 10 Jãhãege ape ṭhen hecʼkate noa cecetʼakʼ bae ạgu lekhan uni do oṛakʼre alope ataṅea ar uni do alope joharaea. 11 Ente okoe uni hoṛe joharadea uni do uniakʼ bạṛicʼakʼ kạmireye hạṭińetʼ kana. 12 Ape ṭhen aema katha ol reakʼ menakʼtińre hõ kagoc ar mạlite do bạń ol sanayeda, menkhan ape ṭhen senkate muṭhạn muṭhạn galmarao reakʼ iń asokʼ kana, jemon aboakʼ rạskạ do purạukʼ tabona. 13 Amren bachao akan boeharen gidrạko amko joharam kana. Amin
3 Johan CHAPTER 1 1 Iń murubi do noa ciṭhiń oleda dulạṛiạ Gayus, okoe do sạriakʼteń dulạṛ edekan. 2 Dulạṛiạ boehako, iń doń koejoṅ kana jemon sanamakʼre hõ bhagete tahen ar nifuṭokʼpe. 3 Ente aema boehako hecʼkate amakʼ sạriakʼtetʼ reakʼ gohako emketʼte iń do ạḍiń rạskạyena. 4 Ińren gidrạko sạri tulucʼko calakʼ kana mente ańjomte noa khon maraṅ rạskạ do bạnukʼtińạ. 5 Dulạṛiạ boehako, am do boehako lạgitʼ okaṭakʼem kạmietʼkan ona do pạtiạr lekatem kạmi kana. 6 Onko do manḍer samaṅre amakʼ dulạṛ reakʼ gohako emkeda. 7 Ente onko do Jisu ńutumteko calaolena, boṅgan hoṛ jạtrenko ṭhen khon cetʼge bako hataoleda. 8 Onate sạriakʼre abo sãote sapʼdapʼko hoyokʼ lạgitʼ nonkan hoṛko bon ataṅ ạgu ocokʼ lekkoa. 9 Iń do manḍerrenko ṭhen ona ciṭhiń olakada, menkhan okoe do manḍerrenko talare maraṅicʼe khojkan Diotrephes do ale bae ataṅetʼlea. 10 Onate iń hecʼlenre uniakʼ kạmi hõń disạ dohoea, uni do abo birudre ạḍi bạṛicʼ kathae roṛetʼkan tahẽkana. 11 Dulạṛiạ boehako, bạṛicʼakʼ do alom pańjaea, menkhan bhageakʼge pańjae me. Okoe bhageakʼe calakʼkan uni do Isorren kanae, menkhan okoe bạṛicʼakʼe calakʼkan uni do Isor bae ńel akadea. 12 Demetrius do sanam hoṛkoakʼ bhage gohae emkeda ar ona sạriakʼtetʼ hõ uniakʼ gohae emkeda. Ar ape dope baḍaegea, aleakʼ goha do sạrigea. 13 Iń ṭhen aema katha ol lạgitʼ menakʼtińa, menkhan kạlim ar kạlamte am ṭhen do bạń ol sanayeda. 14 Menkhan ińiń asokʼ kana, usạrage am sãoteń ńapamokʼa ar met́h́ ã mẽtʼtebon galmaraoa. Ape ṭhen suluk hoyokʼma. Aleren gate ko do amko joharam kana. Gate koak̕ ńutum te johar.