2 Jean CHAPITRE 1 1 Mbi, mbakoro-koli, mbi tokua mbeti so na mama so Nzapa asoro lo nga na amolenge ti lo so mbi ye ala mingi. Gi mbi oko pepe, me azo kue so ahinga tene-biani, ala ndoye ala nga. 2 Ndali ti tâ tënë so aduti na yâ ti e na so ayeke ngbâ ande na e lakue lakue. 3 Zia kota nzobe, nzoni bê nga na siriri so alondo na Nzapa Babâ ni nga na Seigneur Jésus Christ, Molenge ti Babâ ni aduti na ala, na lege ti tâ tënë nga na ndoye. 4 Mbi yeke na ngia mingi so mbi bâ so ambeni molenge ti mo ayeke tambela na yâ ti tâ tënë, gï tongana ti so e wara commandement so alondo na Babâ ni. 5 Fadeso, wali, mbi voro yanga na mo, mo bâ mo tene mbi yeke sû mbeni fini commandement na mo pëpe, me ti so e yeke na ni ngbene ye na tongo nda ni, ti tene e ndoye terê na popo ti e. 6 So ayeke ndoye: e tambela alingbi na acommandement ti lo. So ayeke commandement so: tongana ti so ala ma tënë ni ngbene ye na tongo nda ni, a lingbi ala sara ye alingbi na ni. 7 Azo ti handango azo mingi alï na yâ ti dunia so, ala so ayeda pëpe so Jésus Christ aga na yâ ti mitele. So ayeke zo ti handango zo nga mbeni wato-ti-Christ. 8 Ala sara hange si ala girisa pëpe aye so ala sara kua ngangu dä, me si ala wara futa ni kue. 9 Zo kue so ayeke hon yongoro si lo ngbâ na yâ ti fango ye ti Christ pëpe, lo yeke na Nzapa pëpe. Zo so angbâ na yâ ti tënë so Christ afa, lo yeke beoko na Babâ ni nga na Molenge ni. 10 Tongana mbeni zo aga na ala si lo ga na tënë so pëpe, ala yamba lo na yâ ti da ti ala pëpe nga ala bara lo pëpe. 11 Teti zo so abara lo ayeke mû mbage na asioni kusala ti lo. 12 Atâa so mbi yeke na aye mingi ti tene na ala, mbi ye ti sû ni na mbeti nga na encre pëpe, me mbi yeke na beku ti si na ala ti sara tënë na ala lê na lê, tongaso si ngia ti e alingbi kue. 13 Amolenge ti ita ti mo ti wali so a soro lo atokua bara na mo. Amen.
3 Jean CHAPITRE 1 1 Mbi, mbakoro-koli, mbi tokua mbeti so na Gaïus so mbi ndoye lo mingi. 2 Molenge so mbi ndoye mo mingi, mbi sambela ti tene na yâ ti aye kue mo duti nzoni nga mo duti na nzoni seni, gï tongana ti so âme ti mo ayeke maï. 3 Tere ti mbi anzere mingi na ngoi so aita aga na ala fa na mbi tënë ti tâ tënë so mo yeke na ni, gï tongana ti so mo ngbâ ti tambela na yâ ti tâ tënë. 4 Ti mä a tene amolenge ti mbi angbâ ti tambela na yâ ti tâ tënë, mbeni ngia ti hon so ayeke dä pëpe. 5 Ita so mbi ndoye mo mingi, mo yeke be-ta-zo na yâ ti aye kue so mo yeke sara na aita, atâa so mo hinga ala pëpe. 6 Ala so asara tënë ti ndoye ti mo na gbele Eglize. 7 Ndali ti so ala gue lani ndali ti iri ti lo, ala mû ye oko na maboko ti azo ti amara pëpe. 8 Tongaso, a lingbi e yamba mara ti azo tongaso nzoni si e lingbi ti sara kua legeoko na ala ndali ti tâ tënë. 9 Mbi tokua mbeti na congrégation, me Diotrèphe, lo so aye ti duti na li ni na popo ti ala, ayeda na tënë ti e pëpe. 10 Ni la, tongana mbi si kâ, mbi yeke dabe ti mbi na akusala so lo yeke sara lani, na ngoi so lo yeke tene asioni tënë na terê ti e. 11 Ita so mbi ndoye mo mingi, mo mû peko ti ye so ayeke sioni pëpe, me mo mû peko ti ye so ayeke nzoni. Zo so asara nzoni, lo yeke zo ti Nzapa. 12 Azo kue ayeke sara nzoni tënë ti Démétrius nga na tâ tënë ni wani. na ala hinga so tënë ti e ayeke taa-tënë. 13 Mbi yeke lani na aye mingi ti sû na mbeti, me mbi ye pëpe ti sû ni na mo na encre nga na stylo. 14 Me mbi yeke na beku so mbi yeke bâ mo hio, na e yeke sara tënë lê na lê. Siriri aduti na mo. Akamarade ti e abara mo. Ala bara akamarade ni na iri ti ala.