O Le Mamoe Na Leiloa, O Le Tupe Na Leiloa, ma le Atalii Faamaumauoa Luka 15:1-32 1 Ona faalatalata atu lea ia te ia o le au ao lafoga uma ma e agasala, e faalogologo ia te ia. Ona muimui lea o le au faresaio ma le au tusiupu, ua faapea ane, Ua talia e lenei tagata tagata agasala, ma ua aai faatasi foi ma i latou. 3 ‘Ona fetalai atu lea o ia ‘iā te i latou i lenei fa‘ata‘oto, ‘ua fa‘apea atu, 4 O ai ea so outou e ana mamoe e selau, afai e leiloa le tasi, e le tuua ea e ia le ivagafulu ma le iva i le vao, a e alu e saili i le ua leiloa, seia maua? 5 A maua e ia, ona faafuata lea i ona tauʻau ma le olioli. 6 A oo atu i lona fale, e faapotopoto e ia ana uo ma ona tuaoi, ma fai atu ia te i latou, Ia tatou olioli faatasi ma aʻu; auā ua ou maua laʻu mamoe na leiloa. 7 Ou te fai atu ia te outou, e faapea foi ona tele o le olioli i le lagi i le tagata agasala e toatasi e salamo, i lo le toaivagafulu ma le toaiva o e amiotonu e le manaomia ona salamo. 8 O ai ea fo‘i le fafine e ana tupe siliva e sefulu, a leiloa e ia le tasi tupe, e lē tutu ea se moli ma tafi le fale, ma matuā saili se‘ia maua? 9 A maua e ia, ona faapotopoto lea e ia ana uo ma ona tuaoi, ma fai atu, Ia tatou olioli faatasi ma aʻu; auā ua ou maua le tupe na leiloa ia te aʻu. 10 Ou te fai atu fo‘i ‘iā te ‘outou, e fa‘apea fo‘i ‘ona i ai le ‘oli‘oli i luma o agelu a le Atua, ‘ona o le tagata agasala e to‘atasi ‘ua salamō. 11 ‘Ua fetalai atu o ia, “E to‘alua atali‘i o le tasi tagata. 12 ‘Ua fai atu le uii i lona tamā, ‘Tamā e, ‘ia e aumai ‘iā te a‘u le vaega o le ‘oloa e tatau ‘iā te a‘u.’ ‘Ona vaevaeina lea e ia o ana mea ‘iā te i lā‘ua. 13 E leʻi tele ni aso, ona faapotopoto lea e le uii mea uma, ua alu ese i le nuu mamao, ua faamaʻumau ai ana mea i le soona fai. 14 Ina ua uma ana mea uma, ona tupu ai lea o se oge tele i lea nuu, ma ua amata ona mativa o ia. 15 Ua alu o ia ma faigaluega i se tasi o tagata o lea atunuu, ma auina atu o ia i ana fanua e fafaga puaa.
1
16 Ua manaʻo o ia e faʻamalie lona manava i atigi meaʻai na ʻaina e puaʻa, a e leai se tasi na avatu iā te ia. 17 Ona mafaufau lea o ia, ua faapea ifo, E toatele ea auauna a lo’u tamā ua lava a latou areto, a o a’u nei ua ou oti i le fia ‘ai! 18 O le a ou tulaʻi ma alu i loʻu tamā, ma ou fai atu iā te ia, ‘Loʻu tamā e, ua ou agasala i le lagi atoa ma ou luma. 19 Ua ou lē toe aogā ona taʻua o lou atalii; ia e avea aʻu e pei o se tasi o au auauna.” 20 Ona tulai lea o ia, ua alu i lona tamā. A ua iloa mamao atu o ia e lona tamā, ona alofa mutimutivale lea o ia, ua momoe atu, ua fusi ia te ia, ma sogi ia te ia. 21. ‘Ua fai mai le atali‘i ‘iā te ia, ‘Lo‘u tamā e, ‘ua ‘ou agasala i le lagi, ‘atoa ma ou luma, ‘ua ‘ou lē toe aogā ‘ona ta‘ua o lou atali‘i.’ 22 A ua fai atu le tamā i ana auauna, ‘Aumai ia le ofu e sili ona lelei, ma faaofu ia te ia; ma tuu se mama i lona lima, ma seevae i ona vae.’ 23 Aumai ia le tama’i povi peti, ma fasi; tatou te ‘a‘ai ma fiafia; 24 Auā o lo‘u atali‘i lenei na oti, a ua toe ola mai; na leiloa o ia, a ua maua.” ‘Ona amata lea ‘ona latou ‘oli‘oli. 25 Sa i le fanua lona atalii matua; ua sau o ia ma ua latalata mai i le fale, ona faalogo ai lea o ia i musika ma siva. 26 ‘Ua vala‘au atu o ia i le tasi ‘au‘auna, ‘ua fesili atu po o le ā le uiga o nei mea. 27 Ua fai atu o ia iā te ia, ‘Ua sau lou uso, ua fasi fo‘i e lou tamā le tama‘i povi peti, auā ua toe fo‘i mai o ia ma le manuia.’ 28 Ona ita ai lea o ia, ua le mafai ona ulufale; ona alu atu lea o lona tamā i fafo, ma aioi atu ia te ia. 29. ‘Ona tali atu lea o ia, ‘ua fa‘apea atu i lona tamā, ‘Fa‘auta, o tausaga e tele ‘ua ‘ou ‘au‘auna ai ‘iā te oe, e leai lava sau poloa‘iga ‘ua ‘ou solia; a ‘e te le‘i ‘aumai lava se tama‘i ‘oti ‘iā te a‘u, matou te ‘oli‘oli ai ma a‘u uō. 30 A o lou atalii lenei, ua sau o ia, sa na faauma au mea faatasi ma fafine talitane, ua e fasi le tamai povi peti mo ia. 31 ‘Ua fai atu o ia ‘iā te ia, ‘Lo‘u atali‘i e, ‘ua e fa‘atasi pea ma a‘u, o a‘u mea uma fo‘i o āu ia.’ 32 Ua tatau ona tatou fiafia ma olioli, auā o lou uso lenei na oti, a ua toe ola mai; na leiloa fo‘i, a ua maua.
2