Pangasinan - The Epistle to Philemon

Filemon KAPITULO 1 1 Siak a si Pablo a priso lapud si Jesu-Cristo, tan say agi tayon Timoteo, nansulat ed si Filemon ya inararo tayo tan kakimeyan tayo. 2 Para met ed inad-aro min si Apia, tan ed si Arquipo a kaiba min sondalo, tan ed iglisia a walad abung mo. 3 Nawalaan kayo komun na bindision tan kareenan a nanlapud Dios ya Ama tayo tan say Katawan a Jesu-Cristo. 4 Misasalamat ak ed Dios ko no sika so bibitlaen ko lawas ed saray pikakasik. 5 Nadngelan mi so nipaakar ed panangaro tan pananisiam ed Katawan a Jesus tan ed amin a totoo na Dios. 6 Gawaen ko pian say pinabang mo ed pananisia et magmaliw a makatulong pian naamtaan moy amin a maabig a bengatla a walad sika diad pikakasakey ed si Kristo Jesus. 7 Ta naliliketan kamin maong tan naliligliwa kami lapud panangarom, lapud narerepreskoan mo ray puso na saray masanto lapud sika, agi. 8 Kanian, anggaman bilang pikakasakey ed si Kristo et makapanpakpel ak a mangiganggan ed sika a manggaway manepeg. 9 Balet lapud aro, mas labay ta kan kerewen ed sika, anta masiken ak lan si Pablo, tan natan et priso ak nisengeg ed si Jesu-Kristo. 10 Mikasi ak ed sika nipaakar ed si Onesimo ya anak ko, ya inanak legan ya apriso ak. 11 Nensaman et anggapoy kakanaan to ed sika, balet natan et makagunggona la ed sika tan siak; 12 Sikato so imbakik lamet: sikato sirin so awaten mo, salanti, say dilin pusok. 13 Labay ko komon ya mansiansian kaibak, pian kasalat mo et sikatoy manlingkor ed siak legan ya apriso ak lapud maong a balita. 14 Balet ag ko labay ya gawaen so antokaman no anggapo so labay mo; pian say pankaabigan mo et ag magmaliw a singa kakaukolanen, no ag ingen mabulos mo. 15 Ta ompan sikatoy insian mo na magano, pian sikatoy nipawil mo ed andi-anggaan; 16 Aliwan singa sakey ya aripen, no ag ingen mas ni nen say sakey ya aripen, bilang inadaro ya agi, nagkalalo la ed siak, balet nagkalalo la ed sika, diad laman tan diad Katawan? 17 Kanian no ipapasen mo ak a kaibam, awat mo a singa siak so awaten mo. 18 No sikatoy nankasalanan ed sika odino walay utang tod sika, bayaran mo itan ed siak; 19 Siak, si Pablo, so angisulat ed saya ed dilin limak: Bayaran ko itan, balet agko ibagad sika no panon so utang mo ed siak anggan say sarilim. 20 On, agi, abuloyan mo ak komon a manliket ed sika lapud Katawan. 21 Lapud matalek ak ya ontulok ka, nansulat ak ed sika, ta amtak a mas ni so gawaen mo nen say kerewen ko. 22 Niarum ni, mangiparaan ka met na panayaman ko, ta maniilalo ak a diad panamegley na saray pikakasi yo et nipawil ak ed sikayo. 23 Manpapakomusta ed sika si Epafras, a kaibak a priso lapud si Kristo Jesus; 24 Si Marco, Aristarco, Demas, Lucas, saray katrabahok. 25 Niwala komon ed sikayo so agnaparaan a kaabigan na Katawan tayon Jesu-Cristo. Amen.