2 Juan KAPITULO 1 1 Sayan masiken so nansulat ed pinilin bii tan saray anak to, a peteg ya inad-arok; tan aliwa a siak labat, no ag ingen amin met na saray akapikabat ed katuaan; 2 Nisengeg ed katuaan a manayam ed sikatayo tan mansiansia ed sikatayo ya anggad angga. 3 Niwala komon ed sikayo so agnaparaan a kaabigan, panangasi, tan kareenan a nanlapud Dios ya Ama tan say Katawan a Jesu-Cristo ya Anak na Ama, diad panamegley na katuaan tan aro. 4 Malikeliket ak ta aromog kon wala ray anak mo a manaakar ed katuaan, unong ed ganggan ya inawat tayo na Ama. 5 Natan et kerewen ko ed sika, bii, aliwan singa balon ganggan so isusulat ko ed sika, no ag ingen samay wala lad sikatayo manlapud gapo, a manaaroan itayo. 6 Tan saya so kabaliksan na aro, a manbilay itayo unong ed saray ganggan na Dios. Saya so ganggan, unong a nadngel yo la nanlapud gapo, nepeg a manbilay kayo ed sikato. 7 Ta amayamay a managpalikdo so linmoob ed mundo, ya ag mangibabagan si Jesu-Kristo et linma a too. Saya et managpalikdo tan anticristo. 8 Manalwar kayo pian ag yo nabalang iray bengatlan nansagpotan yo, no ag ingen naawat yoy nagnap a tumang. 9 Siopaman ya onlampas ed bangat nen Cristo tan ag mansiansia ed bangat to, anggapoy Dios to. Say mansiasiansia ed bangat nen Cristo et walad sikato so Ama tan say Anak. 10 No walay onla ed sikayo tan agto awiten yan bangat, ag yo aawaten ed abung yo, tan ag yo met ibabano. 11 Ta samay mangibano ed sikato et mibibiang ed saray mauges a gawa to. 12 Anggano dakel so labay kon isulat ed sikayo, agko labay ya isulat ed papel tan tinta, balet maniilalo ak a makaonla ak ed sikayo tan makapitongtong ak a arap-arapan, pian nasumpal so liket tayo. 13 Manpapakomusta ed sika iray anak na agim a bii a pinili. Amen.
3 Juan KAPITULO 1 1 Siak a masiken, nansulat ak ed si Gayo ya inad-arok a peteg. 2 Inad-arok ya agagi, pikakasik ya onaligwas ka komon tan mabiskeg so laman mo, a singa say kamarerwam. 3 Ta aliketan ak a maong sanen sinmabi ray agagi tan tinasian da so katooran mo, tan say panaakar mo ed katuaan. 4 Anggapoy babaleg a liket ko nen say pakadngel ko a saray anak ko et manaakar ed katuaan. 5 Inad-arok ya kaaro, matoor kan manggagawa ed amin ya gagawaen mo ed saray agagi tan saray sangkaili; 6 Saraya so nantasi ed arap na iglisia nipaakar ed panangarom. 7 Ta nisengeg ed ngaran nen Jesus et linma ra ya anggapoy inala ra ed saray Hintil. 8 Nepeg tayo sirin ya asikasoen iray ontan, pian makapibiang itayon mankikimey ed katuaan. 9 Nansulat ak ed iglisia, balet ag kami awaten nen Diotrefes, a labalabay toy magmaliw a manunaan ed sikara. 10 Kanian, no onla ak diman, nonoten ko ray gagawaen to, a mansasalita na mauges sumpad sikami, tan ag to la kontentoen itan, tan ag to met awaten iray agagi, tan papaekalen to ra ed iglisia. 11 Inad-arok ya agagi, ag mo tutumboken so mauges, no ag ingen say maong. Say manggagawa na maong et kien na Dios, balet say manggagawa na mauges et ag to anengneng so Dios. 12 Maong so ibabaga na amin a totoo nipaakar ed si Demetrio tan say katuaan a mismo. et amta yo a tua so pantasi mi. 13 Dakel so labay kon isulat, balet ag ko labay ya isulat ed sika so panamegley na tinta tan pluma. 14 Balet maniilalo ak a magano ta kan nanengneng, tan makapansalita itayon arap-arapan. Say kareenan so walad sika. Manbabano ed sika iray kakaaro mi. Ibano yo ray kakaaro ed ngaran da.