Nuer - The Epistle to Philemon

Pi-li-mon CIÖT 1 1 Ɣän Puɔl, ram min ca yiɛn kɛ kui̱ Yecu Kritho kɔnɛ dämandan ni Ti-mo-thi, gɔ̱a̱rkɔ warɛgak ɛmɛ Pi-le-mon min nhɔaknɛ kä läät kɛɛl kɛ kɔn. 2 Kä gɔ̱a̱rkɔ warɛgak ɛmɛ nho̱o̱kda min nhɔaknɛ ni A-pia kɛnɛ Ar-ki-päth lathkëëri kɛɛl kɛ kɔ amäni duel Kuɔth in te dhɔru. 3 A puɔ̱th kɛnɛ mal kä Kuoth in la Gua̱a̱ra kɛnɛ Kuäär ni Yecu Kritho tekɛ yɛ. 4 Ɣän la̱rä Kuoth tɛ̈th lɔaac mi cä ji̱ tim gua̱thni diaal rɛy palikä. 5 Kä cä nhökdun kɛ nɛy diaal tin ci Kuoth kɛ lɛy liŋ, kɛnɛ ŋa̱thdun kɛ Kuäär ni Yecu. 6 Ɣän palä kɛ ɣöö ŋa̱th in ci nyuak kɛ naath bɛ ji̱ jakä ŋäci puth diaal tin te rɛydun rɛy Kritho Yecu. 7 Kɛ ɣöö ci nhökdu tekɛ tɛ̈th lɔaac mi di̱i̱t kɛnɛ buɔ̱m lɔaac, kɛ ɣöö jak lo̱c nɛɛni tin ci Kuoth kɛ lɛy jakä gɔaa kɛ ji̱, dämaar. 8 Kɛ kui̱ ɛmɔ, a cäŋ dëë rɔ liak rɛy Kritho ɛn ɣöö dëë ji̱ la̱t min dëë la̱t. 9 Kä duundɛ ɣöö kɛ kui̱ nho̱kä ɣän la̱ŋä ji̱, ɣän ce̱tkɛ Puɔl mi ci dɔŋ, kä täämɛ ɛ ɣän raan yieenä kɛ kui̱ Kritho Yecu. 10 Ɣän la̱ŋä ji̱ kɛ kui̱ gatdä ni O-nɛ-thi-mäth, min ci ɣän a gua̱n, mɛ ta̱a̱ yieenä mɛ. 11 Kɛ gua̱a̱th ëëdan thilɛ jɛ luɔt kä ji̱, kä täämɛ cɛ tekɛ luɔt kä ji̱ amäni ɣä. 12 Kä cä jɛ ja̱k ɛ nyɔk kɛ kui̱ kä ɣöö cu jɛ nyuɔ̱ɔ̱r, min la jicdä pa̱ny. 13 Ɣän göörä ɣöö bɛ te kɛɛl kɛ ɣä, kɛ ɣöö derɛ gua̱a̱thdu lätikä, min ta̱a̱ yieenä kɛ kui̱ thukni ti gɔw. 14 Kä duundɛ ɣöö thilɛ duɔ̱ɔ̱r mi bä la̱t mi /ci ruacdu nhɔk. Kɛ ɣöö /ci luäkdun bi a ji̱ kä ɣöö ba jɛ dhil la̱t kɛ lɔcdun. 15 Kɛ ɣöö dɔ̱ŋ ci Yecu jiɛɛn kä ji̱ kɛ gua̱a̱th mi tɔt, kɛ ɣöö deri jɛ loc amäni cäŋ kɛl. 16 Kä täämɛ /ciɛ kuany, duundɛ ɣöö di̱tni jɛn kä kuany, ɛ dämaar mi nhɔakɛ ɛlɔ̱ŋ kä ɣä, kä di̱t ni jɛn kä ji̱ rɛy ri̱eŋ kɛnɛ rɛy Kua̱r ni Yecu? 17 Mi kuɛrɛ ɣä i̱ ɛ määthdu, nyuɔ̱ɔ̱r jɛ ce̱tkɛ min nyuur ni ɣä. 18 Mi cɛ ji̱ duer duer, kiɛ mi tëëkɛ ŋua̱l kɛ ji̱, gɔ̱ri mɔmɔ piny kɛ ciötdä. 19 Ɛ ɣän, Puɔl, gɔ̱r mɛmɛ kɛ tetdä pa̱ny, bä jɛ cuɔ̱l ji̱, kä /cä ji̱ bi la̱r ɣöö ŋua̱li puɔ̱nydu kɛ ɣä a /ci mɔ a ji̱n ŋua̱l. 20 Ɣɔ̱ɔ̱n, dämaar, jakni ɣä kä tɛth rɛy Kua̱r ni Yecu, jakni lɔcdä kä gɔaa rɛy Kua̱r ni Yecu. 21 Ɣän gɔ̱a̱rä ji̱ warɛgak ɛmɛ, kɛ ɣöö ŋa̱a̱thä ji̱ ɛn ɣöö bi jɛ liŋ, kä ŋa̱cä jɛ ɛn ɣöö bi mi leny min cä thiec la̱t. 22 Kä min dɔ̱ŋ, riali duel ikä kɛ kui̱dä, kɛ ɣöö caarä ɛn ɣöö ba ɣä luɔ̱c yɛ kɛ palkun. 23 Nërkɛ ji̱ ɛn wi̱ni Ɛ-pa-rath, ram min ca yiɛn kɛ ɣä kɛɛl rɛy Kritho Yecu. 24 Ma-räth kɛnɛ A-rith-tar-keth kɛ Dii-mäth kɛnɛ Lu-käth la̱a̱t kɛɛl kɛ ɣä. 25 A puɔ̱th Kua̱ran ni Yecu Kritho tekɛ yiëëdu kɛɛl. A-mɛn.