Nuer - The Book of the Prophet Obadiah

Ö-bɛ-dɛ̈-yaa CIÖT 1 1 Nyuuth O-bɛ-dia. Nɛmɛ laar Kuäär ni Kuoth Nhial ɛ, kɛ kui̱ Ɛ-dɔm. Kɔn cakɔ ruac liŋ kä Kuoth Nhial, kä ca jääk ja̱k rɛy döör i̱, “Jiɛcɛ rɔ̱, kuanɛ jɛ wä ko̱o̱r.” 2 Nɛnɛ, cä ji̱ jak kä kuiy rɛy dööri, ca ji̱ ya̱r ɛlɔ̱ŋ. 3 Ci liak lɔaacdu ji̱ mɛt, ji̱n ram in ci cieŋ rɛy ɣɔ̱ɔ̱kni päämni ti bär. min laar kɛ lɔcdɛ i̱, “Ɛŋa mi bi ɣä yuɔr piny?” 4 Cäŋ mi ci rɔ kap nhial ce̱tnikɛ kuec, kä mi ci nyuurdu la̱t rɛy ciɛr, ɣän bä ji̱ naŋ piny ɛn wi̱ni,” ruac ni Kuoth Nhial. 5 Mi ci kual ben kä ji̱, kä mi ci ma̱a̱c nath ben kɛ wäär, (ca ji̱ kulɛ däk i̱di!) /cikɛ dee kual amäni mi cikɛ ro̱ŋ? mi wä ji̱ gɔ̱ɔ̱li dɛy wal ben kä ji̱, /cikɛ tha̱a̱ŋ dɛy wal ba̱ny piny? 6 Kä kua nyin E-thɔ lɛ ŋa̱c i̱di! kä ŋɔakkɛ tin ca tɛ̱̈ɛ̱̈ görkɛ i̱di! 7 Ci ji̱ bunädu ji̱ naŋ amäni pe̱k wecdu, ci nɛy tëë tekɛ maar kɛ ji̱ ji̱ mɛt, kä cikɛ ji̱ joc. nɛy tin camkɛ mi̱ethdu cikɛ buɔ̱t la̱th pinydu, thilɛ ca̱r rɛydɛ. 8 Ci Kuoth Nhial ɛ lar i̱, “Cä nɛy tin pɛl ji̱ Ɛ-dɔm kɛnɛ ti pɛl bi däk rɛy päämni E-thɔ ɛn cäŋ ɛmɔ? 9 Kä bi rɛmku tin buɔ̱m buɔ̱ɔ̱m ji̱ Tɛ-man dual, amäni nɛy diaal tin te wi̱i̱ pa̱a̱m E-thɔ ba kɛ näk.” 10 Ruacdu kɛ dämuɔɔr ni Je-kɔb bi pöcdu kum, kä ba ji̱ cu däk piny amäni cäŋ kɛl. 11 Kɛ cäŋ ëë ci cuŋä kui̱c ɔ, cäŋ ëë ci Jur rɛmkɛ pɛc ala pɛ̈ɛ̈c, mëë ci Jur coth thuknikɛ kä cukɛ gaakni yuɔr kɛ kui̱ Jɛ-ru-tha-lɛm, ji̱n cu ce̱tkɛ ram kɛl kä kɛ. 12 Kä duundɛ ɣöö /ci cäŋ dämuɔɔr bi guic kɛ cäŋ ëë wëë kä juɔ̱r. Kä /ci lɔcdu dee tɛɛth kɛ gaat Juda kɛ cäŋ däkädiɛn. kä /cu bi ruac kɛ liak kɛ cäŋ rikä. 13 Kä /ci dee wä kɛ thok nɛɛnikä kɛ cäŋ rikädiɛn. Ɣɔ̱ɔ̱n, /ciɛ bi guic ni rikkiɛn kɛ cäŋ rikädiɛn, kiɛ /ci bi tetku la̱th wi̱i̱ kuaknikiɛn kɛ cäŋ rikädiɛn; 14 Kä /ci rɔ bi cuɔ̱ŋ guäth jiaath in gɛɛr naath, kɛ ɣöö bi nɛɛkɛ tin ci kään däk. Kä /ciɛ bi thöp nɛy tin ci duɔth kä ji̱kɛ kɛ cäŋ rikä. 15 Kɛ ɣöö ci cäŋ Kuɔth Nhial thia̱k kɛ döör diaal, ce̱tnikɛ min cia la̱t, ba jɛ lät kä ji̱ bä, bi mucdu luny jɔkdu.” 16 Ce̱tkɛ min cia maath wi̱i̱ pa̱a̱mdä min rɛl rɔ, bi döör diaal maath ni ciaŋ, ɣɔ̱ɔ̱n, bikɛ maath kä bikɛ roc, kä bikɛ ce̱tnikɛ mi /kenkɛ met te thi̱n. 17 Duundɛ ɣöö wi̱i̱ Pa̱a̱m Dha-yɔn bi naath luäk, kä bi gua̱a̱th mi rɛl rɔ thi̱n. Kä bi ji̱ dhɔaar Je-kɔb nyinkiɛn ka̱n.” 18 Bi dhɔr Je-kɔb a mac, kä bi dhɔr Jo-thɛp a lew, kä bi dhɔr E-thɔ a nyon, kä bikɛ pɛt rɛydiɛn kä waŋkɛ kɛ. Kä thilɛ ram mi bi duɔth kä ji̱ thuɔk duëël E-thɔ. Ci Kuoth Nhial ɛ lar.” 19 Kä bi nɛy tin te kui̱c cuëëc pääm E-thɔ ka̱n. Kä bi ji̱ Pi-li-thɛt tin cieŋ rɛy tɔ̱ɔ̱cä ka̱n, kä bikɛ ka̱a̱k Ɛ-pa-rim kɛnɛ ka̱a̱k Tha-mɛ-ria ka̱n, kä bi Gil-yad ka̱n ɛ ji̱ Ben-ya-min.” 20 Kä nɛy tin ca pɛ̈ɛ̈c kä ji̱ I-thɛ-rɛl ti̱ti̱, bikɛ mun ji̱ Kɛ-naan ka̱n amäni Dhar-pɛth. Kä bi ji̱ Jɛ-ru-tha-lɛm tëë ca pɛ̈ɛ̈c kä Thɛ-pa-rad wec kui̱c Nɛ-gɛb wec. 21 Bi ji̱ luäk ben wi̱i̱ Pa̱a̱m Dha-yɔn, kɛ ɣöö ba Päm E-thɔ luk. Kä bi kuäär cua duŋ Kuɔth Nhial.”