Ndau - The Book of Jude

Judha CHITSAUKO 1 1 Judha, muranda wa Jesu Kristu, munun'una wa Jakobe, kune vakadaidzwa vakacheneswa ndi Mwari Baba, vakangwarirwa muna Jesu Kristu. 2 Nyasha, norunyararo, norudo ngazviwande kwomuri. 3 Vanodikanwa, apo ndakaita simba reshe kuti ndimunyorere ngendaa ye ruponeso rumwe, zvakasisira kuti ndimunyorere, ndimupangidze kuti murwise nge simba nge ndaa ye rutendo rwakapuwa vakacheneswa kamwe chete. 4 Ngokuti varipo vanhu vamweni vakanyengedza mukati mwavo ngokufishika, vakaemeswa kutongwa uku karetu, vanhu vasikadi Mwari, vanotsandura nyasha dzaMwari wedu kuita zvisina kunaka, vechiramba Mambo wedu umwe ega, naMambo wedu Jesu Kristu. 5 Ndizvo ndinoda kumukarakadzisa, kunyazwi mwechizia izvi, kuti Mambo aponesa vanhu kubva munyika yeEgipite, ngesureni wakaparadza avo vasikazi kutenda. 6 Nengirosi dzisikazi kungwarira ndau dzadzo dzekutanga, asi dzakasiya ugaro hwadzo, wakadzingwarira mumaketani asingaperi pasi pechidima metsa pakutongwa kwezuva guru. 7 Kudai nge Sodhoma ne Gomora, nemadhorobha akavatendenedza, vakadzipa kuita upombwe, nokuteera nyama imweni, vakaemeswa kuita muezaniso, vechitambudzwa nge kuunzidzirwa kwo mwoto usikaperi. 8 Ngokudaro ava vanorota vanosvipisa nyama, vanoshora utongi, vanotuka vakuru vanoremeredzwa. 9 Asi Mikhaeri mukuru wengirosi, apo echiphikisana naDhiabhorosi, echiphikisana ngendaa yomuiri waMosi, aazi kushinga kumuitira ndaa inotuka, asi wakati, “Mambo ngaakurambidze.” 10 Asi ava vanotuka ngezviro zvevasikazii, asi ngeizvo zvevanozia ngepanyama, kudai ngemhuka dzisina ungwaru, ndizvo vanodzishaishira. 11 Mune nhamo kwavari! ngokuti vakahamba ngenjira yaKheni, vakarumba ngokukara ngokushaisha kwaBharamu ngendaa yomubairo, vakapera ngokuita kwaKore. 12 Aya mavara ari mumadhiri enyu orudo, apo vanodya nemwi, vechidzifudza vega vasikatyi; miti ine michero yayo inooma, isina michero, yakafa kaviri, yakabviswa nemidzi; 13 Masambudzi omuruandhle anotsamwisa, anobudisa mapundu ekutsveruka kwawo; nyeredzi dzinodzungaira, dzakachengeterwa chidima cherima nokusingaperi. 14 NaEnokiwo, wechinomwe kubva kunaAdhamu, wakaprofeta ngendaa iyi echiti, “Ringirai, Mambo Mwari unouya nezviuru gumi zvevakacheneswa vake. 15 kuti atonge padera pavo veshe, kuti avone veshe vasikadi Mwari pakati pavo ngendaa yezviito zvavo zveshe zvisikadi Mwari zvavakaita, ngemazwi avo eshe akaoma akaereketwa ndiye ngevashaishi vasikadi Mwari. 16 Ava ndivo vanovhuruvhuta, vanovhuruta, vanohamba ngokuemura kwavo; nemiromo yavo inoereketa mazwi makuru akadzikudza, vechiita kuti vandhu vamuyemure ngendaa ye kuzvidakadza. 17 Asi imwimwi, vanodikanwa, karakadzai mazwi akaereketwa ngevapostori vaMambo wedu Jesu Kristu; 18 Vakamuronzera kuti mukuwo wokupeisira kunozoapo vanyepi, avo vanozohamba kudai ngokuemura kwavo kusikadi Mwari. 19 Ava ndivo vanodziparadzanisa, venyama, vasina Mweya. 20 Asi imwimwi, vanodikanwa, mwechidziaka padera pokutenda kwenyu kwakapinda kucheneswa, mwechikumbira muMweya Wakachena. 21 Dzingwarirei murudo rwaMwari, mwechigarira nyasha dzaMambo wedu Jesu Kristu kupona kusikaperi. 22 Nevamweni itanyi nyasha, mwechivasiyanisa; 23 Nevamweni muponese ngokutya, mwechivadhonza kubva mumuriro; kuvenga kunyange nguo yakasvibiswa nenyama. 24 Zvino kunauwo unesimba rekumungwarira kuti musawa, nokumuemesa musina ndaa pamberi pouthende hwake ngokudakara kukurutu; 25 Kuna Mwari umwe ega, Muponesi wedu, ngaakuuzwe uthende no ukuru, kutonga ne simba, zvino nokusingaperi. Ameni.