2 Yahya BAB 1 1 Ambo, pamimpin jamaat, surek kabake Mandeh nan dipiliah dek Allah, sarato jo anak-anaknyo. Indak hanyo ambo sajo nan mangasiahi, tapi kasadonyo urang nan lah mangatawui kabanaran nan bana tu, inyo pun mangasiahi pulo. 2 Dek karano kabanaran tu, lah ado di dalam diri kito, sarato tatap ado di diri kito salamo-lamonyo. 3 Mudah-mudahan Allah Bapak, sarato jo Anak-Nyo Isa Almasih, dibari angku-angku barakaik, rahmaik, sarato jo aman santoso. 4 Ambo sangaik basukocito, dek karano ambo tawu, babarapo urang anak angkau, iduik manuruik kabanaran, bakcando nan lah diparentahkan dek Allah Bapak kabake kito. 5 Kiniko ambo sabana mamintak, oih Bundo, supayo kito samo-samo mangasiahi. 6 Mangasiahi ba aratinyo: Kito iduik manuruik parentah-parentah Allah. Ikolah parentah nan lah angku-angku danga sajak samulo, supayo angku-angku musti iduik manuruik paratuaran Allah. 7 Sambuah urang-urang nan mangicuah, nan lah manyebar di dunia ko. Inyo adolah panipu, sarato musuah Isa Almasih. 8 Ingek-ingeklah, supayo angku-angku jan ka ilangan apo nan lah angku-angku usawokan. 9 Urang nan indak patuah kabake pangajaran Isa Almasih, sarato malangkah dari sagalo pangajaran Isa Almasih, mako urang tu indak mampunyoi Allah. Urang nan lai tatap iduik dalam ajaran Isa Almasih, mako inyo punyo Bapak, sarato jo Anak. 10 Jikok ado urang nan tibo kabake angku-angku, sarato indak mambawok pangajaran nan di ajakan kabake angkuangku, mako janlah ditarimo inyo di rumah angku-angku, sarato janlah mambari salam kabake inyo. 11 Dek karano, siya nan mambari salam kabake urang tu, ba arati inyo sato pulo mangarajokan karajo-karajonyo nan jahek. 12 Biyapun banyak parkaro nan ka ambo katokan kabake angku-angku, tapi ambo indak niyo doh mambuweknyo jo karateh atau jo tinta doh. 13 Anak-anak dari sudaro angkau nan lah dipiliah, bakirin salam kabake angkau. Amin.
3 Yahya BAB 1 1 Sudaro dari ambo, pamimpin jamaat, sudaro Gayus nan ambo kasiahi. 2 Oih sudaro nan tacinto, ambo badowa, mudah-mudahan dalam sagalo parkaro angkau dapek sihaik, sarato sihaiksihaik. 3 Sangaik sanang ati ambo, kutiko babarapo urang sudaro nan Kristen, bi tibo, sarato mambari pangakuan kabake ambo, baraso angkau tatap iduik manuruik pangajaran nan bana. 4 Indak ado doh nan labiah manggadangkan hati ambo, daripado mandanga, baraso anak-anak ambo iduik manuruik pangajaran Allah. 5 Oih sudaro nan tacinto, angkau sabana satiya, jikok angkau mangarajokan karajo-karajo angkau, kabake sudarosudaro urang Kristen, biyapun angkau indak bakatawuan. 6 Urang-urang tu lah mambarikan pangakuan di adok-an jamaat, baraso angkau mangasiahi urang-urang tu. 7 Dek karano, urang-urang tu bi payi marantau, untuak malayani Isa Almasih. 8 Dek karano itu, kito musti manarimo urang-urang nan bakcando itu, supayo kito dapek sato samo-samo malayani kabanaran Allah. 9 Ambo lah mambuwek surek kabake jamaat-jamaat, tapi si Diotrefes, nan suko manjadi pamimpin di antaro jamaatjamaat, indak namuah namuah manarimo kato-kato kami. 10 Dek karano itu, jikok ambo datang kamari, ambo ka mangana, apo nan lah dipabuweknyo dek inyo, iyolah katokato nan jahek kabake kami. 11 Oih sudaro-sudaro nan tacinto! Urang nan babuwek baiak, adolah anak Allah, tapi, urang nan babuwek jahek, alun tawu jo Allah. 12 Kasadonyo urang mangaku kabake Demetrius, baitu pulo dek kabanaran Allah sandiri. Angku-angku tawu pulo, baraso pangakuan kami tu batua. 13 Sambuah parkaro nan ka ambo surek, tapi, ambo indak namuah doh mambuweknyo kabake angkau. 14 Ambo ma arokkan, sabanta lai ambo ka basuwo jo angkau, sudah tu kito ka mangecek sacaro lansuang. Assalamu'alaikum. Kanti-kanti kami bakirin salam kabake Angku. Salamlah ka kawan-kawan jo namo-namonyo.