Ko te pukapuka tuarua a Pita UPOKO 1 1 Na Haimona Pita, he pononga, he apotoro na Ihu Karaiti, ki te hunga kua whiwhi tahi nei tatou ki te whakapono utu nui, i runga i te tika o te Atua, o to tatou Kaiwhakaora hoki, o Ihu Karaiti: 2 Kia whakanuia te aroha noa me te rangimarie ki a koutou, i runga i te matauranga ki te Atua, ki a Ihu hoki, ki to tatou Ariki. 3 Na tona kaha Atua hoki i homai ki a tatou nga mea katoa mo te ora, mo te karakia pai, i runga i te matauranga ki a ia, nana nei tatou i karanga ki te kororia, ki te pai. 4 Na konei hoki i homai ai ki a tatou nga kupu whakaari nunui, utu nui: ma enei ka whiwhi ai koutou ki te ahua Atua, i a koutou ka mawhiti mai i te pirau i te ao, ara i to te hiahia. 5 Hei tapiri mo tenei, me whakapau rawa to koutou uaua, honoa iho ano te pai ki runga ki to koutou whakapono; ki te pai te matauranga; 6 Ki runga ki te matauranga ko te pehipehi; ki runga ki te pehipehi ko te manawanui; ki runga ki te manawanui ko te karakia pai; 7 Ki runga ki te karakia pai ko te atawhai ki nga teina; ki te atawhai ki nga teina ko te aroha. 8 Ki te mea hoki kei a koutou enei mea, ki te nui haere hoki, ka meinga koutou kia kaua e mangere, kia kaua e huakore i runga i te matauranga ki to tatou Ariki, ki a Ihu Karaiti. 9 Ko te tangata hoki kahore nei ia ia enei mea, he matapo, he atarua, kua wareware ki te horoinga o ona hara o mua. 10 Heoi, e oku teina, kia puta to koutou uaua ki te whakau i to koutou karangatanga, i to koutou whiriwhiringa: ki te mahi hoki koutou i enei mea, e kore rawa koutou e hinga. 11 Penei hoki ka whakawhiwhia nuitia mai ki a koutou he tomokanga ki te rangatiratanga mutungakore o to tatou Ariki, ara o te Kaiwhakaora, o Ihu Karaiti. 12 Mo reira ano e kore ahau e mangere ki te whakamahara tonu i a koutou ki enei mea, e matau ana raia koutou, kua oti ano te whakau ki runga ki te mea pono, kei a koutou na. 13 Ae ra, ki toku whakaaro he mea tika, i ahau e noho ana i tenei tapenakara, kia whakaoho ahau ia koutou, kia whakamahara; 14 E mohio ana hoki ahau e kore e roa ka mahue tenei tapenakara oku, ka pera ano me ta to tatou Ariki, me ta Ihu Karaiti i whakakite mai ai ki ahau. 15 Ka puta ano hoki toku uaua kia mau tonu to koutou mahara ki enei mea i muri i toku matenga. 16 Ehara hoki matou i te whai i nga korero tito noa, i te whakakitenga atu ki a koutou i te kaha me te haerenga mai o to tatou Ariki, o Ihu Karaiti, engari he kaiwhakaatu matou mo tona nui. 17 I riro hoki ia ia he honore, he kororia na te Atua Matua, i te putanga mai o taua reo ki a ia i roto i te kororia nui rawa, Ko taku Tama tenei i aroha ai, ko taku i ahuareka ai. 18 I rongo ano matou ki tenei reo e puta mai ana i te rangi, ia matou i tona taha i runga i te maunga tapu.
19 Ka u rawa ano te kupu poropiti ki a tatou; he pai ta koutou whakaaro ki tenei, he marama hoki e tiaho ana i te wahi pouri, kia puao ra ano te ra, kia ara ra ano te whetu o te ra i roto i o koutou ngakau. 20 Kia mohio hoki i te tuatahi, kahore he poropititanga o te karaipiture nona ake ona tikanga. 21 Ehara hoki i te mea na te whakaaro o te tangata i puta mai ai te poropititanga i mua, engari he mea whakamahara na te Wairua Tapu i korero ai nga tangata tapu a te Atua. UPOKO 2 1 Otira i mua ano he poropiti teka i mua i roto i te iwi, he pera me nga kaiwhakaako teka e puta ake a mua i roto i a koutou; 2 A he tokomaha e aru ia ratou tikanga whakarihariha; ma ratou e korerotia kinotia te ara o te pono. 3 He apo moni hoki e tito kupu ai ratou kia whai taonga ai ratou ia koutou: nonamata te tukunga mo ratou ki te he, e kore ano e whakaroa; 4 Mehemea kihai i tohungia e te Atua nga anahera i hara, engari i peia ratou e ia ki raro ki te po, he mea herehere i te pouri, he mea tiaki mo te whakawakanga; 5 A kihai i tohungia te ao tawhito, he mea whakaora ia a Noa, te kaikauwhau i te tika, te tokowaru, i tana kawenga mai i te waipuke ki runga ki te ao o te hunga karakiakore; 6 A ka meinga nga pa, a Horoma, a Komora, kia pungarehu rawa, ko tana he, he hurihanga, waiho iho hei tohu ki te hunga e noho karakiakore i muri; 7 A whakaorangia ake e ia a Rota, te tangata tika, me te whakapouri i nga tikanga poke a te hunga kino. 8 (Na taua tangata tika e noho ana i waenganui i a ratou, he titiro, he rongo, i whakapouri i tona wairua tika i tena ra, i tena ra, ki a ratou mahi tutu; 9 E matau ana te Ariki ki te whakaora i te hunga tapu i roto i nga whakamatautauranga, te tiaki i te hunga he mo te ra whakawa, kia whiua; 10 Tera rawa ia tana mo te hunga e whai ana i ta te kikokiko i runga i te hiahia poke, e whakahawea ana ki te rangatiratanga. He hunga whakakake ratou, he ngakau hihiko, kahore e wehi ki te korero kino ki nga rangatira. 11 Tena ko nga anahera, nui ake to ratou kaha, to ratou kaha, kahore e puaki ia ratou he kupu whakatoi mo ratou ki te aroaro o te Ariki. 12 Ko enei ia, rite tonu ratou ki te kararehe whakaarokore maori, i hanga nei hei hopukanga, hei whakangaro, ka korero kino ki nga mea kahore nei e mohiotia e ratou; a ka ngaro i roto i to ratou kino; 13 Ka whiwhi ki te utu o te he; He ira ratou, he kopa, e takaro ana ki a ratou mahi tinihanga ia ratou e hakari tahi ana me koutou; 14 Ko o ratou kanohi ki tonu i te puremu, kahore hoki e mutu to ratou hara; e whakapohehe ana i nga wairua u tonu: he ngakau kua oti te whakamahi ki te apo; tamariki kanga: 15 I whakarerea e ratou te ara tika, kotiti ke ana ratou, whai tonu ana i te ara o Paraama tama a Peoro, i whakapai nei ki te utu o te he; 16 Otira i riria ano ia mo tona he: i korero te kaihe wahangu, no te tangata te reo, pehia ana e ia te wairangi o te poropiti. 17 He puna waikore enei, he kapua e akina ana e te tupuhi; kei a ia nei te kohu o te pouri te wahi kua rite mo ake tonu atu.