Te Aroha o te Atua me te Tangata
He atawhai a Ihowā, he atawhai hoki, he puhoi ki te riri, ā, he nui tana mahi tohu. Waiata 103:8 Kia atawhai koutou, kia pera me to koutou Matua e atawhai ana. Ruka 6:36
Pentateuka Ā, i a ia e whakaroa ana, ka hopukia tōna ringa e aua tāngata, me te ringa o tana wahine, me ngā ringa o āna tamāhine tokorua; he tohu hoki nā Ihowa i a ia: a kawea atu ana ia e rāua ki waho, ka waiho ki waho o te pā. Kenehi 19:16 Nana, kua manakohia nei tāu pononga e koe, kua whakanuia ano e koe tōu aroha i whakaputaina mai nei e koe ki ahau, i a koe i whakaora nei i tōku wairua; e kore hoki e taea e ahau te rere ki te maunga, kei mau ahau i tetahi kino, a ka mate ahau. Kenehi 19:19 A ka mea ia, Kia whakapaingia a Ihowa, te Atua o toku ariki, o Aperahama, kihai nei i whakarērea toku ariki i tona aroha me tona pono: i ahau hoki i te ara, na Ihowa ahau i arahi ki te whare o nga teina o toku ariki. Kenehi 24:27 Kāore rawa ahau e tika kia whiwhi ki ngā aroha katoa, ki te pono katoa hoki i whakaputaina mai e koe ki tāu pononga; i whiti mai hoki ahau me taku tokotoko i tēnei Horano; ā, kua rua nei aku rōpū. Kenehi 32:10 Otirā i a Hohepa a Ihowa, ka puta tōna aroha ki a ia, ā ka meinga ia kia manakohia e te kaitiaki o te whare herehere. Kenehi 39:21 A kia tukua mai e te Atua Kaha Rawa ki a koutou kia arohaina mai e taua tangata, kia tonoa mai ai e ia to koutou teina, raua ko Pineamine. Ki te mea ka pania aku tamariki, ka pania ahau. Kenehi 43:14 Nā tōu atawhai i arahina mai ai e koe te iwi kua hokona nei e koe; i runga i tōu kaha i arahina ai rātou e koe ki tōu nohoanga tapu. Ekoruhe 15:13 E whakaputa aroha ana hoki ki ngā mano tini o te hunga e aroha ana ki ahau, e pupuri ana i aku ture. Ekoruhe 20:6 Me hanga anō e koe he taupoki ki te koura parakore: kia rua whatīanga me te hawhe te roa, kia kotahi whatīanga me te hawhe te whānui. Me hanga anō e koe kia rua ngā kerupima ki te koura, he mea patu te mahi e hanga ai aua mea, mō ngā pito e rua o te taupoki whakamarie. Me hanga hoki tetahi kerupi ki tetahi pito, me tetahi kerupi ki tetahi pito: me hanga nga kerupima ki te taupoki, ki ona pito e rua. A ka roha whakarunga nga parirau o nga kerupima, me te hipoki i te taupoki ki o ratou parirau, ka anga ano o ratou mata tetahi ki tetahi; ka anga ki te taupoki nga mata o nga kerupima. Ā, me whakatakoto e koe te taupoki whakamarie ki runga ki te aaka; me hoatu anō hoki ki roto i te aaka te whakaaturanga e hoatu e ahau ki a koe. Ā, ka tūtaki ahau ki a koe ki reira, ka kōrero atu hoki ahau ki a koe i runga i te taupoki whakamarie, i waenganui i ngā kerupima e rua i runga i te aaka o te whakaaturanga, mō ngā mea katoa e whakahaua atu e ahau ki a koe mō ngā tama a Iharaira. Ekoruhe 25:17 -22