Hiperu UPOKO 1 1 Na te Atua, he maha nga wa, he maha nga tikanga i korero ai ia i mua, he mea korero na nga poropiti ki nga tupuna, 2 I enei ra whakamutunga na tana Tama tana korero ki a tatou, ko tana hoki i mea ai mana nga mea katoa, nana nei i hanga nga ao; 3 Ko ia te kanapatanga o tona kororia, te tino ahua o tona tinana, e tautoko ana i nga mea katoa ki te kupu o tona kaha, ka oti i a ia ake te horoi o tatou hara, ka noho ki te ringa matau o te Nui i runga rawa; 4 A meinga ana ia kia pai ake i nga anahera, kia pera me te ingoa i riro ia ia he nui atu i to ratou. 5 Ki a wai hoki o nga anahera tana meatanga i mua, Ko koe taku Tama, nonaianei koe i whakatupuria ai e ahau? Me tenei ano, Ko ahau hei Matua ki a ia, ko ia hei Tama ki ahau? 6 I tana kawenga mai ano hoki i te whanau matamua ki te ao, ka mea ia, Kia koropiko nga anahera katoa a te Atua ki a ia. 7 Ko tana kupu ia mo nga anahera, Meinga ana e ia ana anahera hei wairua, ana minita hei mura ahi. 8 Mo te Tama ia, i ki ia, Pumau tonu tou torona, e te Atua, ake, ake: ko te hepeta o te tika te hepeta o tou rangatiratanga. 9 I arohaina e koe te tika, i kinongia e koe te hara; no reira nui atu i to ou hoa te whakawahinga a te Atua, a tou Atua, i a koe ki te hinu o te hari. 10 Me tenei ano, Nau, e te Ariki, i te timatanga i whakatakoto te turanga mo te whenua; he mahi ano nga rangi na ou ringa. 11 Ka ngaro ratou; engari ka noho tonu koe; a ka tawhitotia katoatia me he kakahu; 12 Ka pokaitia e koe, ano he kakahu, ka whakaputaia ketia: ko koe tonu ano koe, kahore hoki he mutunga o ou tau. 13 Ki tehea hoki o nga anahera tana meatanga i mua, Hei toku matau koe noho ai, kia meinga ra ano e ahau ou hoariri hei turanga waewae mou? 14 He teka ianei he wairua minita ratou katoa, he mea tono mai hei minita mo te hunga mo ratou nei te ora? UPOKO 2 1 Na, ko te tikanga tenei, kia kaha ake to tatou whakaaro ki nga mea kua rangona, kei pahuhu atu ia tatou. 2 Mehemea hoki te kupu i korerotia e nga anahera i pumau, a he tika tonu te utu i whakahokia mo nga pokanga ketanga katoa, mo nga mahi tutu; 3 Me pehea ka mawhiti ai tatou ki te paopao tatou ki tenei ora nui; i timataia nei te korero e te Ariki, a kua whakaukia mai ki a tatou e te hunga i rongo ki a ia; 4 Me te whakaatu ano te Atua ki a ratou i runga i nga tohu, i nga mea whakamiharo, i tona tini o nga merekara, i nga homaitanga ano hoki o te Wairua Tapu, he pera ano me tana i pai ai? 5 Kahore hoki i waiho e ia ki raro i nga anahera te ao meake nei puta, ta matou e korero nei.
6 Heoi i whakaaturia mai e tetahi i tetahi wahi, i mea mai, He aha te tangata, i mahara ai koe ki a ia? te tama ranei a te tangata i tirohia ai ia e koe? Nohinohi nei te wahi i whakaititia iho ai ia e koe i nga anahera; kua karaunatia ia e koe ki te kororia, ki te honore, kua waiho ano ia e koe hei rangatira mo nga mahi a ou ringa. 8 Kua waiho nei e koe nga mea katoa ki raro i ona waewae. I a ia hoki i pehi nei i nga mea katoa ki raro i a ia, kihai tetahi mea i waiho ki raro i a ia. Inaianei ia kahore ano tatou i kite noa i nga mea katoa kua oti te waiho ki raro i a ia. 9 Otira ka kite tatou ia Ihu, he nohinohi nei te wahi i whakaititia iho ai ia i nga anahera, ka oti nei te karauna ki te kororia, ki te honore, i muri nei i tona ngaunga e te mate; he mea na te aroha noa o te Atua ka pangia e ia te mate mo nga tangata katoa. 10 Ko te tikanga tika hoki ki a ia, mona nei nga mea katoa, nana ano hoki nga mea katoa, i a ia e arahi ana i nga tama tokomaha ki te kororia, kia waiho nga mamae hei mea e tino rite ai te Take o to ratou whakaoranga. 11 Ko te kaiwhakatapu hoki, ratou ko te hunga e whakatapua ana, no te kotahi ratou katoa: koia ia te whakama ai ki te kiia he teina ratou; 12 E mea ana, Maku e korero tou ingoa ki oku teina, ka himene atu ahau ki a koe i waenganui o te hahi. 13 Me tenei ano, Ka u pu ahau ki a ia. Me tenei ano, Nana, ahau me nga tamariki i homai e te Atua ki ahau. 14 Na, kei nga tamariki he kikokiko, he toto, koia hoki ia i whakawhiwhia ai ano hoki ki aua mea; kia taea ai e ia te whakamate te tangata kei a ia nei te mana o te mate, ara te rewera; 15 Kia whakaorangia hoki e ia te hunga i meinga e te wehi o te mate hei taurekareka i nga wa katoa i ora ai ratou. 16 Kihai hoki ia i mau ki te ahua o nga anahera; engari i mau ia ki nga uri o Aperahama. 17 Na konei i tika ai kia whakaritea ia ki ona teina i nga mea katoa, kia waiho ai ia hei tohunga nui e atawhai ana, e pono ana i nga meatanga ki te Atua, hei whakamarie mo nga hara o te iwi. 18 I te mea hoki ka whakamatautauria ia, a mamae iho, e taea e ia te awhina te hunga e whakamatautauria ana. UPOKO 3 1 ¶ Na, e oku teina tapu, e te hunga kua uru nei ki ta te rangi karanga, whakaaroa a Ihu Karaiti, te Apotoro, te Tohunga nui o te tikanga kua whakaaetia nei e tatou; 2 I pono nei ki tona kaiwhakarite mai, i pera ano me Mohi i tona whare katoa. 3 I tika hoki kia nui ake te kororia mo tenei tangata i to Mohi, no te mea nui ake i to te whare te honore o te kaihanga. 4 He mea hanga hoki na tetahi nga whare katoa; ko te Atua ia te kaihanga o nga mea katoa. 5 A i pono ano a Mohi i roto i tona whare katoa, i pera me te pononga, hei whakaatu mo nga mea ka korerotia i muri; 6 Ko te Karaiti ia i rite ki te tama i tona whare ake; Ko tona whare hoki tatou, ki te mau ta tatou maia me te whakamanamana ki te mea e tumanakohia atu nei, a taea noatia te mutunga. 7 Mo konei (ka rite ki ta te Wairua Tapu i mea ai, Ki te rongo koutou ki tona reo aianei;