Nehemia UPOKO 1 1 Ko nga kupu a Nehemia tama a Hakaria. Na, i te marama Kihireu, i te rua tekau o nga tau, i ahau i Huhana, i te whare kingi, 2 Ka tae mai a Hanani, tetahi o oku teina, ratou ko etahi tangata o Hura; a ka ui ahau ki a ratou mo nga Hurai i mawhiti, i mahue o nga whakarau, mo Hiruharama ano hoki. 3 A ka mea ratou ki ahau, Ko nga oranga i mahue o nga whakarau i reira i taua kawanatanga he nui te he, te whakahaweatia: kua pakaru hoki te taiepa o Hiruharama, a kua wera ona keti i te ahi. 4 A, no toku rongonga i enei kupu, ka noho ahau, ka tangi, ka pouri hoki a taka noa etahi ra, ka nohopuku ano, ka inoi ki te aroaro o te Atua o te rangi; 5 A ka mea, Tena ra, e Ihowa, e te Atua o te rangi, e te Atua nui, e wehingia ana, e pupuri nei i te kawenata, i te atawhai mo te hunga e aroha ana ki a ia, e pupuri ana i ana whakahau. 6 Tena ra, kia tahuri mai tou taringa, kia titiro mai ano ou kanohi, kia rongo ai koe ki te inoi a tau pononga e inoi nei ahau ki tou aroaro i te ao, i te po, mo au pononga, mo nga tama a Iharaira, me te whaki i nga hara o nga tama a Iharaira, i hara nei matou ki a koe: kua hara ahau me te whare o toku papa. 7 He rawa ta matou mahi ki a koe, kihai hoki i pupuri i nga whakahau, i nga tikanga, i nga whakaritenga i whakahaua e koe ki tau pononga ki a Mohi. 8 Tena ra, maharatia te kupu i whakahaua e koe ki tau pononga ki a Mohi, i mea ra koe, Ki te poka ke ta koutou, ka whakamararatia atu koutou e ahau ki roto ki nga tauiwi; 9 Na, ki te tahuri mai koutou ki ahau, a ka pupuri i aku whakahau, ka mahi hoki; ahakoa i maka atu o koutou ki te pito o te rangi, ka kohikohia ano ratou e ahau i reira, ka kawea mai ano ki te wahi i whiriwhiria e ahau hei waihotanga iho mo toku ingoa ki reira. 10 Na ko au pononga enei, ko tau iwi i hokona e koe, ara e tou kaha nui, e tou ringa kaha. 11 Tena ra, e te Ariki, tahuri mai tou taringa ki te inoi a tau pononga, ki te inoi hoki a au pononga e mea nei kia wehi i tou ingoa: kia ora ano tau pononga aianei, homai hoki ki a ia kia arohaina e tenei tangata. Ko ahau hoki te kaiwhakainu a te kingi. UPOKO 2 1 ¶ Heoi i te marama Nihana i te rua tekau o nga tau o Kingi Arataherehe, i te mea he waina i tona aroaro, ka hapainga ake e ahau te waina, hoatu ana ki te kingi. Na kahore ahau i pouri i mua i tona aroaro. 2 Na ka mea te kingi ki ahau, He aha tou kanohi i pouri ai; ehara tenei i te mea ke atu i te pouri o te ngakau. Katahi ahau ka tino wehi, 3 Na ka mea atu ki te kingi, Kia ora tonu te kingi: he aha toku mata i kore ai e pouri, i te mea kua ururuatia te pa, te whare o nga tanumanga o oku matua, a kua pau ona keti i te ahi?
4 Ano ra ko te kingi ki ahau, He aha te mea ka tonoa nei e koe? Na ka inoi ahau ki te Atua o te rangi. 5 Na ka mea ahau ki te kingi, Ki te pai te kingi, ki te mea hoki e paingia ana tau pononga i tou aroaro, kia unga ahau e koe ki Hura, ki te pa o nga tanumanga o oku matua, kia hanga ai e ahau. 6 Na ka mea te kingi ki ahau, i tona taha ano te kuini e noho ana, Kia pehea te roa ou ka haere nei? a hea koe hoki mai ai? Na i pai te kingi kia tonoa ahau; a whakaritea ana e ahau he taima mona. 7 I mea ano ahau ki te kingi, Ki te pai te kingi, me homai he pukapuka ki ahau ki nga kawana i tawahi o te awa, kia tukua ahau e ratou kia whiti atu a tae noa ki Hura; 8 He pukapuka ano hoki ki a Ahapa te kaitiaki o te ngahere a te kingi, kia homai e ia etahi rakau ki ahau hei hanga kurupae mo nga keti o te whare kingi, mo te taiepa hoki o te pa, mo te whare hoki e tomo atu ai ahau. Na ka homai e te kingi ki ahau: i runga ano i te ringa pai o toku Atua i runga i ahau. 9 Katahi ka haere ahau ki nga kawana i tera taha o te awa; hoatu ana e ahau nga pukapuka, a te kingi ki a ratou. Na i unga mai e te kingi etahi rangatira ope me nga kaieke hoiho hei hoa moku. 10 A, no te rongonga o Hanaparata Horoni raua ko te pononga, ko Topia Amoni, nui rawa te kino i kino ai ki a raua; no te mea kua tae he tangata hei rapu i te pai mo nga tama a Iharaira. 11 Heoi kua tae ahau ki Hiruharama, ae toru oku ra ki reira. 12 Na ka maranga ahau i te po, matou ko etahi tangata torutoru hei hoa moku; kihai hoki i korerotia e ahau ki tetahi ta toku Atua i homai ai ki toku ngakau kia mahia ki Hiruharama: kahore hoki oku kararehe, heoi ano ko te kararehe i eke ai ahau. 13 I haere atu ahau i te po i te kuwaha o te raorao, i te ritenga atu o te puna tarakona, ki te kuwaha paru, a tirotirohia ana e ahau nga taiepa o Hiruharama kua pakaru nei, me ona keti kua pau nei i te ahi. 14 Katahi ahau ka haere ki te kuwaha o te puna, ki te poka wai ano a te kingi; heoi kahore he wahi e haere atu ai te kararehe e waha ana i ahau. 15 Na piki ana ahau i te awaawa i te po, tirotirohia ana e ahau te taiepa. Na tahuri ana ahau, tomo ana na te kuwaha o te raorao, hoki ana. 16 Heoi kihai nga rangatira i mohio e haere ana ranei ahau ki hea, he aha ranei taku e mea nei; kahore ano i korerotia noatia e ahau ki nga Hurai, ki nga tohunga, ki nga tino tangata, ki nga rangatira, ki era atu mahi ranei. 17 Katahi ahau ka mea ki a ratou, Ka kite koutou i to tatou aitua, ko Hiruharama kua ururuatia, ko ona keti kua wera i te ahi: haere mai, tatou ka hanga i te taiepa o Hiruharama, kei waiho hei tawai a muri ake nei. 18 Na ka korerotia e ahau ki a ratou te ringa o toku Atua i pai nei ki runga ki ahau; me nga kupu ano a te kingi i korerotia e ia ki ahau. Na ka mea ratou, Tatou ka whakatika, ka hanga. Na kei te whakakaha ratou io ratou ringa mo tenei mahi pai. 19 I te rongonga ia o Hanaparata Horoni, ratou ko te pononga, ko Topia Amoni, ko Keheme Arapi, ka whakahi mai ratou ki a matou, ka whakahawea ki a matou, ka mea, He aha tenei mea ka meatia nei e koutou? ka whakakeke ranei koutou ki te kingi? 20 Katahi ka whakahoki ahau ki a ratou, ka mea ki a ratou, Ko te Atua o te rangi, mana e tika ai ta matou; Na ka