Joshua UPOKO 1 1 ¶ Na, i muri iho i te matenga o Mohi, o te pononga a Ihowa, ka korero a Ihowa ki a Hohua tama a Nunu, ki te tangata a Mohi, ka mea, 2 Kua mate a Mohi, taku pononga; Na whakatika, whiti atu i tenei Horano, a koe me tenei iwi katoa, ki te whenua ka hoatu nei e ahau ki a ratou, ara ki nga tama a Iharaira. 3 Ko nga wahi katoa e takahia e nga kapu oo koutou waewae kua hoatu e ahau ki a koutou, ka rite ki taku i korero ai ki a Mohi. 4 Ko te rohe ki a koutou kei te koraha, kei Repanona nei, a tae noa ki te awa nui, ki te awa ki Uparati, ki te whenua katoa o nga Hiti, ki te moana nui, ki te toenetanga o te ra. 5 E kore rawa tetahi e kaha ki te tu ki tou aroaro i nga ra katoa e ora ai koe: ia Mohi ahau, ka pera ano ahau ki a koe: e kore ahau e whakarere ia koe, e kore hoki e mawehe atu ia koe. 6 Kia kaha, kia maia rawa: mau hoki tenei iwi e whakawhiwhi ki te whenua i oati ai ahau ki o ratou matua kia hoatu ki a ratou. 7 Engari kia kaha, kia tino maia rawa ki te pupuri ki te mahi i nga ture katoa i whakahaua ki a koe e Mohi, e taku pononga: kei peka ke koe i reira ki matau, ki maui ranei, kia kake ai koe i nga wahi katoa e haere ai koe. 8 Kei whakarerea e tou waha tenei pukapuka o te ture; engari kia whai whakaaro koe ki reira i te ao, i te po, kia mau ai koe ki te mahi i nga mea katoa kua oti te tuhituhi ki reira: ko reira koe ka tika ai i tou ara, ko reira koe kake ai. 9 Kahore ianei ahau i whakahau ki a koe? Kia kaha, kia maia; kaua e wehi, kaua hoki e pawera: no te mea kei a koe a Ihowa, tou Atua, i nga wahi katoa e haere ai koe. 10 Na ka whakahau a Hohua i nga rangatira o te iwi, ka mea, 11 Haere ra waenganui o te puni, ka whakahau i te iwi, ka mea, Taka he o mo koutou; kia toru hoki nga ra ka whiti ai koutou i tenei Horano, ka haere ki te tango i te whenua ka homai nei e Ihowa, e to koutou Atua, kia nohoia e koutou. 12 Na ka korero a Hohua ki nga Reupeni, ki nga Kari, ki tetahi taanga hoki o te iwi o Manahi, ka mea, 13 Kia mahara ki te kupu i whakahau ai a Mohi, te pononga a Ihowa ki a koutou, i mea ai, E mea ana a Ihowa, to koutou Atua, i a koutou kia okioki, ka homai hoki e ia tenei whenua ki a koutou. 14 Ko a koutou wahine, ko a koutou potiki, me a koutou kararehe, me noho ki te whenua i hoatu e Mohi ki a koutou i tenei taha o Horano; Engari ko nga marohirohi katoa e haere atu i mua i o koutou teina, me a ratou patu, hei awhina ia ratou; 15 Kia meinga ra ano e Ihowa o koutou tuakana kia okioki, kia pena me tana i homai ai ki a koutou, a kia whiwhi ano ratou ki te whenua ka homai nei e Ihowa, e to koutou Atua ki a ratou: katahi koutou ka hoki ki te whenua i noho ai koutou, ka noho hoki ki reira, ki ta Mohi, ki ta te pononga a Ihowa i hoatu ai ki a koutou i tenei taha o Horano, whaka te rawhiti. 16 Na ka whakahoki ratou ki a Hohua, ka mea, Ko nga mea katoa e whakahaua e koe ki a matou ka mahia e matou, a
ka haere hoki matou ki nga wahi katoa e unga ai matou e koe. 17 Ko to matou rongo ki a Mohi i nga mea katoa, ka pera ano to matou rongo ki a koe: kia noho ra ia a Ihowa, tou Atua, ki a koe, me ia hoki i noho ki a Mohi. 18 Ahakoa ko wai te tangata e tutu ki tau whakahau, e kore hoki e rongo ki au kupu, ki nga mea katoa e whakahau ai koe ki a ia, me whakamate: ko koe ia kia kaha, kia maia. UPOKO 2 1 ¶ Na ka tonoa atu e Hohua, e te tama a Nunu, etahi tangata tokorua i Hitimi hei tutei puku atu, i mea ia, Tikina, tirohia te whenua, me Heriko hoki. Na haere ana raua, a ka tae ki te whare o tetahi wahine kairau, ko Rahapa te ingoa, a ka moe i reira. 2 Na ka korerotia ki te kingi o Heriko, ka meatia, Nana, kua tae mai etahi tangata ki konei i te po nei, no nga tama a Iharaira, he whakataki i te whenua. 3 Na ka tono tangata te kingi o Heriko ki a Rahapa, ka mea, Whakaputaina mai ki waho nga tangata i haere mai na ki a koe, i haere atu na ki tou whare: i haere mai hoki raua he mataki i te whenua katoa. 4 Na ka mau te wahine ki nga tangata tokorua, a huna ana e ia, a ka mea atu, I haere mai etahi tangata ki ahau, heoi kahore ahau i mohio no hea ranei raua; 5 A, no te wa o te tutakina o te kuwaha, no te mea ka pouri nei, ka puta atu aua tangata ki waho: kahore ahau e mohio i haere aua tangata ki hea: kia hohoro te whai i muri ia raua; ka mau hoki ratou i a koutou. 6 Otira kua kawea raua e ia ki runga ki te tuanui, a huna ana raua ki nga kakau rinena i horahorangia e ia ki runga i te tuanui. 7 Na ka whai nga tangata i muri ia raua na te huarahi ki Horano a tae noa ki nga whakawhitinga: a, no te putanga atu ano o nga kaiwhai ia raua ki waho, ka tutakina te kuwaha. 8 A, kiano raua i takoto noa, na ka haere ake ia ki a raua ki te tuanui; 9 Ka mea ia ki aua tangata, E mohio ana ahau kua hoatu te whenua nei e Ihowa ki a koutou, kua tau mai hoki te wehi o koutou ki a matou, a kei te ngohe nga tangata katoa o te whenua nei ia koutou. 10 I rongo hoki matou ki ta Ihowa whakamaroketanga i te wai o te Moana Whero i o koutou aroaro, i to koutou putanga mai i Ihipa; ki nga mea hoki i mea ai koutou ki nga kingi tokorua o nga Amori i tera taha o Horano, ki a Hihona raua ko Oka, i huna nei e koutou. 11 A, i to matou rongonga i enei mea, ngohe noa o matou ngakau, kahore atu hoki he toa i roto i tetahi tangata, na koutou hoki: ko Ihowa hoki, ko to koutou Atua, ko ia te Atua i te rangi i runga, i te whenua hoki i raro. 12 Na, tena ra, oatitia mai a Ihowa ki ahau, i te mea kua atawhaitia koutou e ahau, ka puta ano to koutou aroha ki te whare o toku papa, a ka homai he tohu pono ki ahau. 13 Ka whakaora hoki koutou i toku papa, i toku whaea, i oku tungane, i oku tuahine, me a ratou mea katoa, kia ora ai matou kei mate. 14 Na ka mea aua tangata ki a ia, Ko to maua oranga mo koutou, ki te kahore koutou e korero i ta maua take. Na tenei ake, kei te homai e Ihowa te whenua ki a matou, ka mahi aroha matou, ka mahi pono ki a koe.