Genesis UPOKO 1 1 He mea hanga na te Atua i te timatanga te rangi me te whenua. 2 A kahore he ahua o te whenua, i takoto kau; he pouri ano a runga i te mata o te rire. Na ka whakapaho te Wairua o te Atua i runga i te kare o nga wai. 3 A ka ki te Atua, Kia marama: na ka marama. 4 A ka kite te Atua i te marama, he pai: a ka wehea e te Atua te marama i te pouri. 5 Na ka huaina e te Atua te marama ko te Awatea, a ko te pouri i huaina e ia ko te Po. A ko te ahiahi, ko te ata, he ra tuatahi. 6 ¶ Na ka mea te Atua, Kia whai kikorangi a waenganui o nga wai, hei wehe i waenganui o nga wai. 7 Na ka hanga e te Atua te kikorangi, ka wehea e ia nga wai i raro o te kikorangi i nga wai o runga o te kikorangi: a ka oti. 8 Na ka huaina te kikorangi e te Atua ko te Rangi. A ko te ahiahi, ko te ata, he ra tuarua. 9 ¶ Na ka mea te Atua, Kia huihuia nga wai i raro i te rangi kia kotahi te wahi, a kia puta te tuawhenua: a ka oti. 10 Na ka huaina e te Atua te tuawhenua ko te Whenua; a ko te huihuinga o nga wai i huaina e ia ko nga Moana: a ka kite te Atua, he pai. 11 Na ka mea te Atua, Kia pihi ake te tarutaru i te whenua, te otaota whai purapura, me te rakau hua, ki runga ki te whenua, e hua ana ona hua, he mea rite tonu ki a ia, kei roto nei i a ia ona purapura: a ka oti. 12 Na ka whakaputaina e te whenua te tarutaru, te otaota hoki e hua ana ona purapura he mea rite tonu ki a ia, me te rakau whai hua, kei roto nei i a ia ona purapura he mea rite tonu ki a ia: a ka kite te Atua, he pai. 13 A ko te ahiahi, ko te ata, he ra tuatoru. 14 ¶ Na ka mea te Atua, Kia whai mea whakamarama te kiko o te rangi, hei wehe i te awatea, i te po; me waiho ano hei tohu, hei taima, hei ra, hei tau. 15 Hei whakamarama aua mea i te kiko o te rangi, hei whakamarama i te whenua: a ka oti. 16 Na ka hanga e te Atua nga mea whakamarama nui e rua; ko te whakamarama nui hei tohutohu mo te awatea, ko te whakamarama tuaiti hei tohutohu mo te po: i hanga ano e ia nga whetu. 17 A whakanohoia ana aua mea e te Atua ki te kiko o te rangi, hei whakamarama i te whenua; 18 Hei tohutohu i te awatea, i te po, hei wehe hoki i te marama, i te pouri: a ka kite te Atua, he pai. 19 A ko te ahiahi, ko te ata, he ra tuawha. 20 Na ka mea te Atua, Kia ngahue ake i roto i nga wai te mea ora e ngoki ana, kia rere ano hoki te manu i runga ake i te whenua i te mata o te kiko o te rangi. 21 Na ka hanga e te Atua nga tohora nunui, me nga mea ora katoa, nga mea ngokingoki, i ngahue ake nei i roto i nga wai o ia ahua, o ia ahua, me nga manu whai parirau katoa o ia ahua, o ia ahua: a ka kite te Atua, he pai. 22 Na ka manaaki te Atua ia ratou, ka mea, Kia hua koutou, kia tini, kia kapi hoki nga wai o nga moana ia koutou, kia tini ano hoki nga manu ki runga ki te whenua. 23 A ko te ahiahi, ko te ata, he ra tuarima.
24 Na ka mea te Atua, Kia whakaputaina e te whenua te mea ora o ia ahua, o ia ahua, te kararehe me te mea ngokingoki me te kirehe o te whenua o ia ahua, o ia ahua: a ka oti. 25 Na ka hanga e te Atua te kirehe o te whenua o ia ahua, o ia ahua, me te kararehe o ia ahua, o ia ahua, me nga mea ngokingoki katoa o te whenua o ia ahua, o ia ahua: a ka kite te Atua, he pai. 26 Na ka mea te Atua, Kia hanga tatou i te tangata kia rite ki a tatou, hei to tatou ano te ahua: a kia waiho ko ratou hei rangatira mo te ika o te moana, mo te manu o te rangi, mo nga kararehe hoki, mo te whenua katoa, mo te whenua katoa. nga mea ngokingoki katoa e ngokingoki ana i runga i te whenua. 27 Na ka hanga e te Atua te tangata rite tonu ki a ia; i hanga ia e ia kia rite ki te Atua; i hanga raua he tane, he wahine. 28 Na ka manaaki te Atua i a raua, a ka mea te Atua ki a raua, Kia hua, kia tini, kia kapi hoki te whenua i a korua, kia mate hoki ki raro; e neke haere ana i runga i te whenua. 29 A ka mea te Atua, Na, kua oti te hoatu e ahau ki a korua nga otaota katoa e whai purapura ana i runga i te mata o te whenua katoa, me te rakau katoa, he hua rakau tona e whai purapura ana; hei kai tena ma koutou. 30 A kua hoatu e ahau nga otaota matomato katoa hei kai ma nga kirehe katoa o te whenua, ma nga manu katoa o te rangi, ma nga mea katoa hoki e ngokingoki ana i runga i te whenua kei roto nei i a ratou he oranga: a ka oti. 31 A ka kite te Atua i nga mea katoa kua hanga nei e ia, na, pai whakaharahara. A ko te ahiahi, ko te ata, he ra tuaono. UPOKO 2 1 ¶ Na ka oti te rangi me te whenua me o reira mano katoa. 2 A no te whitu o nga ra i oti ai i te Atua tana mahi i mahi ai; a ka okioki i te ra whitu i ana mahi katoa i mahia e ia. 3 Na ka whakapaingia e te Atua te ra whitu, whakatapua ana hoki e ia: mona i okioki i taua ra i ana mahi katoa i oti i te Atua te hanga. 4 Ko nga whakatupuranga enei o te rangi, o te whenua, i te hanganga ai, i te ra i hanga ai e Ihowa, e te Atua, te whenua me te rangi; 5 Me nga otaota katoa o te parae i mua atu i te whenua, me nga otaota katoa o te parae kiano i tupu noa: kahore hoki a Ihowa, te Atua, i mea kia ua ki runga ki te whenua, a kahore rawa he tangata hei mahi i te oneone. 6 Engari i pupu ake he kohu i te whenua, na reira i whakamakuku te mata katoa o te oneone. 7 Na ka whakaahuatia te tangata e Ihowa, e te Atua, he puehu no te oneone, a whakahangia ana e ia ki roto ki ona pongaihu te manawa ora; a ka noho te tangata hei wairua ora. ¶ Na ka whakatokia e Ihowa, e te Atua, tetahi kari ki te taha ki te rawhiti, ki Erene; a whakanohoia iho e ia ki reira te tangata i hanga e ia. 9 A i whakatupuria e Ihowa, e te Atua, i roto i te oneone nga rakau katoa he mea ahuareka ki te titiro, he pai hoki hei kai; te rakau hoki o te ora ki waenganui o te kari, me te rakau o te matauranga ki te pai, ki te kino. 10 I rere mai ano he awa i Erene hei whakamakuku i te kari; a i reira ka wehea kia wha nga mahunga. 11 Ko te ingoa o te tuatahi ko Pihona: ko ia tera e taiawhio ra i te whenua katoa o Hawira, he koura kei reira;