Raniera UPOKO 1 1 ¶ I te toru o nga tau o te kingitanga o Iehoiakimi kingi o Hura ka tae mai a Nepukaneha kingi o Papurona ki Hiruharama, whakapaea ana e ia. 2 Na ka hoatu e te Ariki a Iehoiakimi kingi o Hura ki tona ringa, me etahi o nga oko o te whare o te Atua, a kawea ana e ia ki te whenua o Hinara, ki te whare o tona atua; a mauria ana e ia nga oko ki te whare taonga o tona atua. 3 Na ka ki atu te kingi ki a Ahapenata rangatira o ana unaka, kia tikina etahi o nga tama a Iharaira, ara o nga uri o te kingi o nga rangatira hoki; 4 He tamariki kahore nei o ratou koha, he pai ano te ahua, e mohio ana ki nga whakaaro nui katoa, e mohio ana ki te matauranga, e matau ana ki te matauranga, me te hunga e pai ana hei tu ki te whare o te kingi, hei whakaako ki te ako, ki te reo o nga Karari. 5 I whakaritea ano e te kingi tetahi wahi o ta te kingi kai ma ratou, he mea mo ia ra, mo ia ra, me tetahi wahi o te waina i inumia e ia, kia toru nga tau e whangaia ai ratou; 6 Na i roto i enei ko etahi o nga tama a Hura, ko Raniera, ko Hanania, ko Mihaera, ko Ataria; Na ka tapa he ingoa mo ratou e te rangatira unaka: ko tana ingoa mo Raniera, ko Peretehatara; ki a Hanania, ko Hataraka; ki a Mihaera, ta Mehaka; ki a Ataria, no Apereneko. 8 Otiia kua takoto to Raniera whakaaro i roto i tona ngakau, kia kaua ia e poke i ta te kingi kai, i te waina ranei i inumia e ia. Na ka tono ia ki te rangatira unaka kia kaua ia e whakapoke ia ia. 9 Na, kua mea te Atua kia manakohia a Raniera, kia arohaina e te rangatira unaka. 10 Na ka mea te rangatira unaka ki a Raniera, E wehi ana ahau i toku ariki, i te kingi, nana nei i whakarite ta koutou e kai ai, ta koutou e inu ai: he aha hoki i tirohia mai ai e ia o koutou kanohi he kino atu i o nga tamariki pena me koutou? katahi ka meinga ahau e koutou kia maka atu toku upoko ki te kingi. 11 Ano ra ko Raniera ki a Meretara, ki ta te rangatira unaka i whakarite ai hei kaitirotiro mo Raniera, ratou ko Hanania, ko Mihaera, ko Ataria, 12 Tena ra, whakamatauria au pononga, kia tekau nga ra; me homai e ratou he pini hei kai ma matou, he wai hoki hei inu ma matou. 13 Hei reira ka mea kia tirohia o matou mata i tou aroaro, me te mata ano o nga tamariki e kai ana i te kai a te kingi; na kia rite ki tau e kite ai tau e mea ai ki au pononga. 14 Heoi ka whakaaetia e ia tenei mea a ratou, a kotahi tekau nga ra i whakamatauria ai ratou e ia. 15 Na, i te mutunga o nga ra kotahi tekau, ka kitea o ratou mata, ataahua atu, tetere atu o nga tamariki katoa i kai i ta te kingi kai. 16 Heoi ka tangohia atu e Meretara te wahi kai ma ratou, me te waina ano hei inu ma ratou; a hoatu ana he pini ki a ratou. 17 Na, ko aua tamariki tokowha, i homai e te Atua ki a ratou he matauranga, he mohio ki nga pukapuka katoa, ki nga whakaaro nunui: a i a Raniera te mohio ki nga kite katoa, ki nga moemoea.
18 Na, i te takanga o nga ra i ki ai te kingi kia kawea atu ratou, ka kawea atu ratou e te rangatira unaka ki te aroaro o Nepukaneha. 19 Na ka korerorero te kingi ki a ratou; a kihai i kitea i roto i a ratou katoa tetahi e rite ana ki a Raniera, ki a Hanania, ki a Mihaera, ki a Ataria: na tu ana ratou i te aroaro o te kingi. 20 Na, i nga mea katoa o te whakaaro nui, o te matauranga i ui ai te kingi ki a ratou, ka kitea e ia tekau noa atu to ratou pai i to nga tohunga maori katoa, i to nga kaititiro whetu puta noa i tona kingitanga. 21 I tutuki ano a Raniera a tae noa ki te tuatahi o nga tau o Kingi Hairuha. UPOKO 2 1 ¶ Na, i te rua o nga tau o te kingitanga o Nepukaneha ka moea etahi moe e Nepukaneha; raruraru tonu iho tona wairua, rere atu ana te moe ia ia. 2 Katahi te kingi ka ki atu kia karangatia nga tohunga maori, nga kaititiro whetu, nga tohunga makutu, nga Karari, hei whakaatu i ana moe ki te kingi. Na ka haere mai ratou, ka tu ki te aroaro o te kingi. 3 Na ka mea te kingi ki a ratou, Kua moea e ahau he moe, a raruraru ana toku wairua, e mea ana kia mohio ki taua moe. 4 Katahi ka korero Hiriani mai nga Karari ki te kingi, E te kingi, kia ora tonu koe: korerotia mai te moe ki au pononga, a ma matou e whakaatu tona tikanga. 5 Ka whakahoki te kingi, ka mea ki nga Karari, Kua ngaro taua mea i ahau: ki te kore e whakaaturia mai e koutou ki ahau te moe me tona tikanga hoki, ka haehaea koutou, a ka meinga o koutou whare hei puranga paru. 6 Ki te whakaaturia mai ia e koutou te moe me tona tikanga, ka riro aku hakari ma koutou, nga utu, me te honore nui; na whakaaturia mai te moe ki ahau, me tona tikanga ano. 7 Na ka whakahoki ano ratou, ka mea, Ma te kingi e korero te moe ki ana pononga, a ma matou e whakaatu tona tikanga. 8 Ka whakahoki te kingi, ka mea, E mohio rawa ana ahau e whai ana koutou kia roa, no te mea ka kite koutou kua ngaro taua mea i ahau. 9 Ki te kore ia e whakaaturia mai e koutou te moe ki ahau, kotahi tonu te ture mo koutou: no te mea he teka, he teka nga kupu kua rite na ia koutou hei korero mai ki toku aroaro, a kia puta ke ra ano te wa: na korerotia mai te moe ki ahau, a ka mohio ahau ka taea e koutou te whakaatu mai tona tikanga ki ahau. 10 Na ka whakahoki nga Karari ki te aroaro o te kingi, ka mea, Kahore he tangata i runga i te whenua hei whakaatu i te mea a te kingi: kahore hoki he kingi, kahore he ariki, kahore he rangatira, i ui i nga mea penei ki tetahi tohunga makutu, ki tetahi tohunga matakite, ki tetahi Karari. 11 He mea tupua rawa hoki tenei e uia nei e te kingi, kahore atu hoki he kaiwhakaatu ki te kingi, ko nga atua anake, ehara nei ki te kikokiko to ratou nohoanga. 12 Na reira i riri ai te kingi, nui atu te riri, kiia iho e ia nga tangata whakaaro nui katoa o Papurona kia whakangaromia. 13 I puta ano te ture kia patua nga tangata whakaaro nui; a ka rapua a Raniera ratou ko ona hoa kia whakamatea. 14 Na, he whakaaro nui, he mohio, i oho ai a Raniera ki a Arioko, ki te rangatira o nga kaitiaki a te kingi, i puta nei ki te patu i nga tangata whakaaro nui o Papurona.