2 Kingi UPOKO 1 1 ¶ Na i muri i te matenga o Ahapa ka whakakeke a Moapa ki a Iharaira. 2 Na ka hinga a Ahatia i te wini whakakahokaho i tona ruma i runga i Hamaria, a ka mate: na ka tono tangata ia, ka mea ki a ratou, Haere, ui atu ki a Paarahepupa atua o Ekerono, e ora ranei ahau i tenei mate. 3 Na ka mea te anahera a Ihowa ki a Iraia Tihipi, Whakatika, haere ki runga, ki te whakatau i nga karere a te kingi o Hamaria, ka mea ki a ratou, He kore Atua ianei no Iharaira i haere ai koutou ki te ui ki a Paarahepupa atua o Ekerono? 4 No reira ko te kupu tenei a Ihowa, Ko te moenga i pikitia na e koe, e kore koe e heke iho i reira, engari ko te mate kau mou. Na haere ana a Iraia. 5 Na, i te hokinga atu o nga tangata ki a ia, ka mea ia ki a ratou, He aha koutou i hoki mai ai? 6 Na ka mea ratou ki a ia, I haere mai tetahi tangata ki te whakatau ia matou, a ka mea ki a matou, Haere, hoki atu ki te kingi nana koutou i tono mai, mea atu ki a ia, Ko te kupu tenei a Ihowa, He kore Atua ianei no Iharaira, i tono tangata ai koe ki te ui ki a Paarahepupa atua o Ekerono? na reira e kore koe e heke iho i te moenga i pikitia na e koe, engari ko te mate kau mou. 7 Na ka mea ia ki a ratou, Tena koa te ahua o taua tangata i haere mai na ki te whakatau ia koutou, i korero na i enei kupu ki a koutou? 8 Na ka mea ratou ki a ia, He tangata puhuruhuru, he whitiki hiako te whitiki o tona hope. Na ka mea ia, Ko Iraia Tihipi tena. 9 Katahi te kingi ka unga i tetahi rangatira rima tekau me tana rima tekau. Na haere ana ia ki a ia; na, i runga ia i te tihi o tetahi puke e noho ana. Na ka mea tera ki a ia, E te tangata a te Atua, kua mea mai te kingi, Heke iho. 10 Na ka whakahoki a Iraia, ka mea ki te rangatira rima tekau, Ki te mea he tangata ahau na te Atua, kia heke iho he ahi i te rangi hei kai ia koutou ko tau rima tekau. Na ko te hekenga iho o te ahi i te rangi, pau ake ia me tana rima tekau. 11 Na ka unga ano e ia tetahi atu rangatira rima tekau me tana rima tekau. Na ka oho tera, ka mea ki a ia, E te tangata a te Atua, ko te kupu tenei a te kingi, Hohoro te heke iho. 12 Na ka whakahoki a Iraia, ka mea ki a ratou, Ki te mea he tangata ahau na te Atua, kia heke iho he ahi i te rangi hei kai ia koutou ko tau rima tekau. Na ko te hekenga iho o te ahi a te Atua i te rangi, pau ake ia me tana rima tekau. 13 Na ka unga ano e ia, ka tuatorutia, he rangatira rima tekau me tana rima tekau. Na ka haere te tuatoru o nga rangatira rima tekau, ka haere, ka tuku i ona turi ki te aroaro o Iraia, ka inoi ki a ia, ka mea ki a ia, E te tangata a te Atua, kia nui ki tau titiro mai toku wairua me te ora o enei tangata e rima tekau au. 14 Nana, i heke iho he ahi i te rangi, a pau ake nga rangatira tokorua o nga rima tekau o mua ake nei me a raua rima tekau: na kia nui toku wairua ki tou aroaro. 15 Na ka mea te anahera a Ihowa ki a Iraia, Heke atu korua, kaua e wehi ia ia. Na whakatika ana ia, haere tahi ana raua ki raro, ki te kingi.
16 Na ka mea tera ki a ia, Ko te kupu tenei a Ihowa, Na kua unga tangata na koe ki te ui ki a Paarahepupa atua o Ekerono, he kore Atua ianei no Iharaira hei uinga mau i tana kupu? na reira e kore koe e heke iho i te moenga i pikitia na e koe, engari ko te mate kau mou. 17 Heoi mate iho ia, i rite tonu ki te kupu a Ihowa i korerotia e Iraia. Na ko Iehorama te kingi i muri ia ia, i te rua o nga tau o Iehorama tama a Iehohapata kingi o Hura; no te mea kahore ana tama. 18 Na, ko era atu mahi a Ahatia i mea ai ia, kahore ianei i tuhituhia ki te pukapuka o nga meatanga o nga ra o nga kingi o Iharaira? UPOKO 2 1 ¶ Na, i te meatanga a Ihowa kia tangohia atu a Iraia ki te rangi i roto i te tukauati, ka haere atu a Iraia raua ko Eriha i Kirikara. 2 Na ka mea a Iraia ki a Eriha, Hei konei koe noho ai; kua unga hoki ahau e Ihowa ki Peteere. Ano ra ko Eriha ki a ia, E ora ana a Ihowa, e ora ana hoki tou wairua, e kore ahau e whakarere ia koe. Na ka haere raua ki raro, ki Peteere. 3 Na ka puta mai nga tama a nga poropiti i Peteere ki a Eriha, a ka mea ki a ia, E mohio ana ranei koe ko aianei tangohia ai e Ihowa tou ariki i runga i tou upoko? Ano ra ko ia, Ae ra, e mohio ana ahau; noho puku. 4 Na ka mea a Iraia ki a ia, E Eriha, heoi konei koe noho ai; kua unga hoki ahau e Ihowa ki Heriko. Ano ra ko tera, E ora ana a Ihowa, e ora ana hoki tou wairua, e kore ahau e whakarere ia koe. Na ka tae ratou ki Heriko. 5 Na ka whakatata mai nga tama a nga poropiti i Heriko ki a Eriha, a ka mea ki a ia, E mohio ana ranei koe ko aianei tangohia ai e Ihowa tou ariki i runga i tou upoko? Ano ra ko ia, Ae ra, e mohio ana ano ahau; noho puku. 6 Na ka mea a Iraia ki a ia, Hei konei koe noho ai; kua unga hoki ahau e Ihowa ki Horano. Ano ra ko tera, E ora ana a Ihowa, e ora ana hoki tou wairua, e kore ahau e whakarere ia koe. Na haere ana raua tokorua. 7 Na ka haere etahi tangata e rima tekau, he tama na nga poropiti, a tu atu ana i tawhiti: me te tu ano raua tokorua i te taha o Horano. 8 Na ka mau a Iraia ki tona koroka, whakakopaia ana e ia, patua ana ki nga wai, a ka wehea ki tetahi taha, ki tetahi taha, a whiti ana raua i te wahi maroke. 9 ¶ A, no to raua whitinga, ka mea a Iraia ki a Eriha, Tonoa mai, ko te aha e meatia e ahau mau i ahau kiano kia wehea noatia ia koe. Na ka mea a Eriha, Kia rua nga wahanga o tou wairua ki runga ki ahau. 10 Na ka mea tera, He mea pakeke tau i tono mai na: he ahakoa ra, ki te kite koe i ahau e tangohia atu ana ia koe, ka rite ki tau na; engari ki te kahore, e kore e pena. 11 Na, ia raua e haere ana, me te korero haere, ka puta mai tetahi hariata ahi me nga hoiho ahi, a wehea ana raua tokorua; a kake ana a Iraia i roto i te tukauati ki te rangi. 12 A ka kite a Eriha, ka karanga ia, E toku papa, e toku papa, e nga hariata o Iharaira, e ona kaieke hoiho! A heoi ano kitenga o tera i a ia: na ka mau ia ki ona kakahu ake, haea ana kia rua nga wahi. 13 I tangohia ake hoki e ia te koroka o Iraia i marere i runga ia ia, e hoki ana, tu ana i te pareparenga o Horano; 14 Na ka mau ia ki te koroka o Iraia i marere nei i runga i a ia, a patua iho ki nga wai, me te ki ano, Kei hea ra a Ihowa,