1 Hamuera UPOKO 1 1 ¶ Na tera tetahi tangata no Ramataima Topimi, no te whenua pukepuke o Eparaima, ko Erekana tona ingoa, he Eparati, he tama na Ierohama, tama a Erihu, tama a Tohu, tama a Tupu: 2 A tokorua ana wahine; ko Hana te ingoa o tetahi, ko Penina te ingoa o tetahi: na he tamariki a Penina, kahore ia he tamariki a Hana. 3 A haere atu ai tenei tangata i ia tau, i ia tau, i tona pa ki te koropiko, ki te patu whakahere ki a Ihowa o nga mano, ki Hiro. I reira ano nga tama tokorua a Eri, a Hoponi raua ko Pinehaha, nga tohunga a Ihowa. 4 A ka tae ki te wa i tapae ai a Erekana, na hoatu ana e ia etahi wahi ki a Penina, ki tana wahine, ki ana tama katoa ano hoki, ki ana tamahine; 5 Ki a Hana ia e rua nga wahi i hoatu e ia; i aroha hoki ia ki a Hana: heoi kua tutakina tona kopu e Ihowa. 6 A nui atu te whakatoia a tona hoa tauwhainga ki a ia, a mamae noa ia, no te mea kua tutakina tona kopu e Ihowa. 7 Pena tonu ta te tane mahi i ia tau, i ia tau, i nga haerenga o tenei ki runga, ki te whare o Ihowa, a pena tonu ta tera whakatoi i tenei; na reira i tangi ai ia, kihai hoki i kai. 8 Na ka mea tana tahu, e Erekana ki a ia, E Hana, he aha koe i tangi ai? he aha koe te kai ai? he aha hoki i pouri ai tou ngakau? ki tau e kore ianei ahau e pai atu i to nga tama kotahi tekau? 9 Heoi ka whakatika a Hana i muri ia ratou i kai ai i Hiro, i inu ai hoki. Na ko Eri, ko te tohunga, i runga i tona nohoanga noho ai, i te pou o te temepara o Ihowa. 10 A i tino pouri te ngakau o tera, ka inoi ki a Ihowa, a nui atu tana tangi. 11 Na ka puaki tana kupu taurangi, i mea ia, E Ihowa o nga mano, ki te ata titiro mai koe ki te mamae o tau pononga wahine, a ka mahara ki ahau, a ka kore e wareware ki tau pononga wahine, a ka hoatu e koe he tama ki tau pononga wahine, na, ka hoatu ia e ahau ki a Ihowa i nga ra katoa e ora ai ia, e kore ano he heu e pa ki tona mahunga. 12 Na, i te mea e inoi tonu ana ia i te aroaro o Ihowa, ka titiro a Eri ki tona waha. 13 Na ko Hana, e korero ana ia i roto i tona ngakau; ko ona ngutu kau e komeme ana, kihai ia tona reo i rangona: na reira a Eri i mea ai e haurangi ana ia. 14 Na ka mea a Eri ki a ia, Ka tae te roa o tou haurangi! whakarerea atu tau waina. 15 Na ka whakahoki a Hana, ka mea, Kahore, e toku ariki; he wahine ngakau pouri ahau: kahore ahau i inu i te waina, i te wai whakahaurangi ranei; engari e ringihia ana e ahau toku ngakau ki te aroaro o Ihowa. 16 Kaua tau pononga e kiia he tamahine na Periara: na te nui hoki o toku mamae, o toku pouri, enei korero aku. 17 Katahi ka utua e Eri, ka mea ia, Haere marie: a ma te Atua o Iharaira e homai tau mea i inoi ai koe ki a ia. 18 Na ka mea tera, Kia manakohia tau pononga e koe. Na ka haere te wahine ra, ka kai, a mutu ake te pouri o tona mata. 19 Na ka maranga wawe ratou i te ata, a ka koropiko ki te aroaro o Ihowa, a hoki ana, haere ana ki to ratou whare i
Rama: na ka mohio a Erekana ki a Hana, ki tana wahine; a i mahara a Ihowa ki a ia. 20 Na, ka taka nga ra, ka hapu a Hana, a ka whanau he tama; a huaina iho e ia tona ingoa ko Hamuera, i mea hoki, No te mea i inoia ia e ahau ia Ihowa. 21 Na ka haere taua tangata a Erekana me tona whare katoa ki runga, ki te patu i te whakahere o te tau ki a Ihowa, me tana ki taurangi hoki. 22 Ko Hana ia kihai i haere ki runga; i mea hoki ki tana tahu, E kore ahau e haere ki runga, kia whakamutua ra ano te kai u o te tamaiti, ko reira ahau kawe atu ai i a ia, kia puta ai ia ki te aroaro o Ihowa, mo tona noho tonu atu ki reira. 23 Na ka mea a Erekana tana tahu ki a ia, Meatia ta tou whakaaro e pai ai; noho kia whakamutua ra ano tana kai u; ko Ihowa anake hei whakapumau i tana kupu. Heoi noho ana te wahine, whakangotea ana tana tama, a whakamutua ra ano tana kai u. 24 Na ka whakamutua tana kai u, ka mauria e ia, me nga puru e toru, me te epa paraoa, me te ipu waina, a kawea ana ia ki te whare o Ihowa i Hiro: he tamariki rawa hoki te tamaiti. 25 Na patua ana e ratou te puru, a kawea ana te tamaiti ki a Eri. 26 A ka mea ia, E toku ariki, kia ora tou wairua; e toku ariki, ko ahau te wahine i tu i tou taha i konei nei, i inoi ra ki a Ihowa. 27 Ko tenei tamaiti taku i inoi ai; a kua homai e Ihowa ki ahau taku mea i inoi ai ahau ki a ia. 28 Na reira kua tukua atu nei ia e ahau ki a Ihowa; he mea tuku ia ki a Ihowa i nga ra katoa e ora ai ia. a koropiko ana ia ki a Ihowa ki reira. UPOKO 2 1 ¶ Na ka karakia a Hana, ka mea, E whakamanamana ana toku ngakau ki a Ihowa, kua ara toku haona ia Ihowa; ka rahi toku waha ki oku hoariri; no te mea ka koa ahau ki tau whakaoranga. 2 Kahore he mea tapu, ko Ihowa anake: kahore ke atu, ko koe anake: kahore ano hoki he kamaka hei rite mo to tatou Atua. 3 Kati te korero whakapehapeha; kei puta te whakapehapeha i o koutou mangai: he Atua mohio hoki a Ihowa, a ka paunatia e ia nga mahi. Whati ana nga kopere a te hunga marohirohi; ko te hunga i tutuki te waewae, ko te kaha hei whitiki mo ratou. 5 E mahi ana hei utu taro te hunga i makona i mua; a mutu ake te hunga i matekai: a ka tokowhitu a te pakoko i whanau ai; a ka ngoikore te wahine kua tokomaha nei ana tamariki. 6 Ko Ihowa e whakamate ana, a ko ia e whakaora ana: mana e riro ai ki raro ki te reinga, mana e kake ai ki runga. 7 Ko Ihowa hei whakarawakore, ko ia hei whakawhiwhi ki te taonga: mana e whakaiti, mana ano hoki e whakaara. 8 E whakaara ake ana ia i te rawakore i roto i te puehu, e whakaara ake ana i te tangata rawakore i roto i te puranga paru, kia whakanohoia ai ki roto ki nga rangatira, kia whakawhiwhia ai ratou ki te torona o te kororia: na Ihowa hoki nga pou o te whenua, a nana i whakatu te ao ki runga ki a ratou.