1 Kingi UPOKO 1 1 ¶ Na kua koroheketia a Kingi Rawiri, kua maha ona ra; a hipokina ana ia ki te kakahu, heoi kihai i mahana. 2 No reira ka mea atu ana tangata ki a ia, Me rapu tetahi kotiro, he wahine, ma toku ariki, ma te kingi: a me tu ia ki te aroaro o te kingi, mana hoki ia e atawhai, a me takoto ki tou uma, kia mahana ai toku ariki, te kingi. 3 Heoi rapua ana e ratou tetahi kotiro ataahua i nga rohe katoa o Iharaira; a kitea ana ko Apihaka Hunami, a kawea ana mai ia ki te kingi. 4 Na he ataahua rawa taua kotiro; ai atawhai ia i te kingi, i mahi hoki ki a ia: otira kihai te kingi i mohio ki a ia. 5 Katahi a Aronia tama a Hakiti ka whakanui ia ia, ka mea, Ko ahau hei kingi: a meatia ana e ia etahi hariata mana, me etahi kaieke hoiho, e rima tekau hoki nga tangata hei rere i tona aroaro. 6 Kihai hoki tona papa i whakapouri i tona ngakau o mua iho, kihai i mea, He aha koe i pena ai? a he tangata ataahua rawa ia; i whanau ano hoki ia i muri i a Apoharama. 7 Na ka korerorero ia ki a Ioapa tama a Teruia, ki a Apiatara tohunga; a i whai raua ia Aronia, i awhina ia ia. 8 Ko Haroko tohunga ia, ko Penaia tama a Iehoiara, ko Natana poropiti, ko Himei, ko Rei, ko nga tangata nunui a Rawiri, kihai ratou i uru ki a Aronia. 9 Na ka patua e Aronia he hipi, he kau, he mea momona, ki te kohatu ki Toherete, ki tera i te taha o Enerokere, a ka karangatia ona teina katoa, nga tama a te kingi, me nga tangata katoa o Hura, nga tangata a te kingi; 10 Ko Natana matakite ia, ko Penaia, ko nga tangata nunui, me tona teina, me Horomona, kihai i karangatia e ia. 11 Na ka korero a Natana ki a Patehepa whaea o Horomona, ka mea, Kahore ano koe i rongo ko Aronia tama a Hakiti te kingi, kahore hoki i te mohiotia e to tatou ariki, e Rawiri? 12 Na haere mai, tukua maku e hoatu he whakaaro ki a koe, kia ora ai koe, kia ora ai hoki tau tama, a Horomona. 13 Haere, haere ki roto ki a Kingi Rawiri, ka mea ki a ia, Kihai ianei koe i oati, e toku ariki, e te kingi, ki tau pononga wahine, i mea, Ko Horomona tonu, ko tau tama hei kingi i muri i ahau, a ko ia hei noho ki toku torona? Na he aha i kingi ai a Aronia? 14 Na, e korero ana ano koe i reira ki te kingi, ka tae atu hoki ahau i muri ia koe, a maku e whakakoia ki au korero. 15 Na ko te haerenga o Patehepa ki te whare moenga, ki te kingi: he koroheke rawa hoki te kingi; a ko Apihaka Hunami ki te mahi ki te kingi. 16 Na ka tuohu a Patehepa, ka piko ki te kingi. Na ka mea te kingi, He aha tau? 17 Na ka mea tera ki a ia, E toku ariki, i oatitia e koe a Ihowa, tou Atua, ki tau pononga, Ko Horomona tonu, ko tau tama hei kingi i muri i ahau, a ko ia hei noho ki toku torona. 18 Na, inaianei, kua kingi a Aronia; na, e toku ariki, e te kingi, kahore koe i te mohio. 19 A kua patua e ia he kau, he mea momona, he hipi, tona tini; kua karangatia hoki nga tama katoa a te kingi, me Apiatara tohunga, me Ioapa te rangatira ope: ko Horomona ia, ko tau pononga, kihai i karangatia e ia.
20 Na ko koe, e toku ariki, e te kingi, e anga ana nga kanohi o Iharaira katoa ki a koe, kia whakaaturia ki a ratou ko wai e noho ki te torona o toku ariki, o te kingi, i muri ia ia. 21 Na tenei ake, hei te moenga o toku ariki, o te kingi, ki ona matua, ka kiia maua ko taku tama, ko Horomona, he hunga hara. 22 Na, ia ia ano e korero ana ki te kingi, ka tomo mai a Natana poropiti. 23 A ka korerotia e ratou ki te kingi, ka mea, Ko Natana poropiti tenei. Na haere ana ia ki te aroaro o te kingi, a ka piko iho tona mata ki te whenua ki te aroaro o te kingi. 24 Na ka mea a Natana, E toku ariki, e te kingi, i mea ranei koe, Ko Aronia hei kingi i muri i ahau, a ko ia hei noho ki toku torona? 25 I haere hoki ia ki raro i tenei ra, a kua patu i te kau, i te mea momona, i te hipi, tona tini; na, kei te kai ratou, kei te inu i tona aroaro, kei te ki, Kia ora a Kingi Aronia. 26 Ko ahau ia, ko tau pononga, ko matou ko Haroko tohunga, ko Penaia tama a Iehoiara, ko tau pononga, ko Horomona, kihai i karangatia e ia. 27 Na toku ariki ranei, na te kingi tenei mea, a kihai i whakaaturia e koe ki tau pononga, ko wai e noho ki te torona o toku ariki, o te kingi i muri ia ia? 28 Na ka whakahoki a Kingi Rawiri, ka mea, Karangatia a Patehepa ki ahau. Na haere ana ia ki te aroaro o te kingi, a tu ana i te aroaro o te kingi. 29 Na ka oati te kingi, ka mea, E ora ana a Ihowa nana nei i whakaora toku wairua i roto i nga he katoa; 30 Ko taku i oati ai i a Ihowa, i te Atua o Iharaira ki a koe, i ahau i ki ra, He pono, ko Horomona, ko tau tama, hei kingi i muri i ahau, a ko ia hei noho ki toku torona i muri i ahau; ka pena ano ahau i tenei ra. 31 Katahi ka tuohu a Patehepa, anga tonu tona mata ki te whenua, piko ana ki te aroaro o te kingi, ka mea, Kia ora toku ariki, a Kingi Rawiri, a ake ake. 32 Na ka mea a Kingi Rawiri, Karangatia a Haroko tohunga ki ahau, a Natana poropiti, a Penaia tama a Iehoiara. Na haere ana ratou ki te aroaro o te kingi. 33 Na ka mea te kingi ki a ratou, Mauria nga pononga a to koutou ariki hei hoa mo koutou, ka whakanoho ai i taku tama a Horomona ki runga ki toku ake muera, ka kawe ia ia ki raro, ki Kihona. 34 A ma Haroko tohunga raua ko Natana poropiti ia e whakawahi ki reira hei kingi mo Iharaira; me whakatangi hoki te tetere, me mea, Kia ora a Kingi Horomona. 35 Na ka piki ake koutou i muri ia ia, a ka tae mai ia, ka noho ki toku torona; ko ia hoki hei kingi i muri i ahau: a kua oti ia te whakarite e ahau hei kawana mo Iharaira raua ko Hura. 36 Na ka whakahoki a Penaia tama a Iehoiara ki te kingi, ka mea, Amine: kia pena mai hoki te ki a Ihowa, a te Atua o toku ariki, o te kingi. 37 I toku ariki nei, i te kingi, a Ihowa, kia pena ano ia ki a Horomona; a kia whakanuia ake tona torona ki runga ake i te torona o toku ariki, o Kingi Rawiri. 38 Heoi ka haere a Haroko tohunga, a Natana poropiti, a Penaia tama a Iehoiara, me nga Kereti, me nga Pereti ki raro, a whakanohoia ana e ratou a Horomona ki te muera o Kingi Rawiri, a kawea ana ki Kihona. 39 Na tangohia ana e Haroko tohunga te haona hinu i roto i te tapenakara, a whakawahia ana e ia a Horomona. Na ka