Ko te kupu whakarite mō te kairui Matiu 13:1-23 1 I taua rā anō i haere atu a Ihu i te whare, ka noho ki te taha o te moana. 2 Nā, he tini te mano i huihui ki a ia, ā, ka eke ia ki te kaipuke, ka noho; i te takutai anō te tū o te mano katoa. 3 A he maha ana kupu whakarite ki a ratou, i mea ia, Nana, i haere atu tetahi kairui ki te rui; 4 Ā, i tana ruitanga, ka ngahoro ētahi o ngā purapura ki te taha o te ara, ā, ka rere mai ngā manu, ka kainga ake: 5 Ko ētahi i ngahoro ki ngā wāhi kamaka, ki ngā wāhi kāore i nui te oneone: ā, pihi tonu ake, nā te mea kāore i hohonu te oneone: 6 Ā, i te whitinga o te rā, ka ngaua; ā, nā te mea kāore he pakiaka, memenge noa iho. 7 Ko ētahi i ngahoro ki roto ki ngā tataramoa; ā, no te tupunga ake o ngā tataramoa, ka kowaowaotia ngā purapura: 8 Ko ētahi i ngahoro ki te oneone pai, ā ka hua, ko ētahi kotahi rau, ko ētahi e ono tekau, ko ētahi e toru tekau. 9 Ki te whai taringa tetahi hei whakarongo, kia rongo ia. 10 Ā, ka haere mai ngā ākonga, ka mea ki a ia, He aha koe i kōrero whakarite ai ki a rātou? 11 Nā, ka whakahoki ia, ka mea ki a rātou, Kua hoatu ki a koutou te mārama ki ngā mea ngaro o te rangatiratanga o te rangi, ki a rātou ia kāore i hoatu. 12 Ki te whai mea hoki tetahi, ka hoatu ano ki a ia, a ka maha atu ana: ki te kahore ia he mea a tetahi, ka tangohia atu i a ia ana mea katoa. 13 Nō reira, ka kōrero ahau ki a rātou i ngā kupu whakarite: nā te mea e titiro ana rātou, kāhore e kite; e rongo ana, kāhore hoki e mātau. 14 Ā, ka tutuki i a rātou te poropititanga a Ihaia, e mea nei, Mā te whakarongo ka rongo koutou, ā, e kore e mātau; mā te titiro ka titiro koutou, ā, e kore e kite: 15 Kua matotoru hoki te ngākau o tēnei iwi, kua puhoi te whakarongo o rātou taringa, kua katia hoki ō rātou kanohi; kei kite ō rātou kanohi, kei rongo ō rātou taringa, kei mātau ō rātou ngākau, ā, ka tahuri rātou, ā, ka whakaorangia e ahau.
1
16 E hari ana ia ō koutou kanohi, nō te mea ka kite: ā, ō koutou taringa, nō te mea ka rongo. 17 He pono hoki taku e mea nei ki a koutou, He tokomaha nga poropiti me nga tangata tika i hiahia kia kite i nga mea e kite nei koutou, a kahore i kite; kia rongo hoki i nga mea e rongo nei koutou, a kahore i rongo. 18 Nā, whakarongo ki te kupu whakarite mō te kairui. 19 Ki te rongo tetahi i te kupu o te rangatiratanga, ā, e kore e mārama, ka haere mai te wairua kino, ka kapo i te mea i ruia ki roto i tōna ngākau. Ko te tangata tēnei i ruia ki te taha o te ara. 20 Ko te tangata ia i nga purapura i te wahi kohatu, ko te tangata i rongo ki te kupu, a hohoro tonu te tango atu me te hari; 21Otiia kāhore ōna pakiaka i roto i a ia, e mau ana mō te wā poto: ā, i te pānga mai o te whakapawera, o te whakatoi rānei mō te kupu, ka hē tonu ia. 22 Ko te tangata i ruia ki waenga tataramoa, ko ia te tangata i rongo ki te kupu; a, ko te manukanuka ki tenei ao, me te tinihanga o nga taonga, hei whakakoi i te kupu, a kore ake he hua. 23 Ko te tangata ia i ruia ki te oneone pai, ko ia te tangata e rongo ana ki te kupu, a e matau ana ki taua mea; a ka hua, ka hua, no tetahi kotahi rau, no tetahi e ono tekau, no tetahi e toru tekau.
Maka 4:1-20 1 Na ka tīmata anō ia ki te whakaako i te taha o te moana: ā, he nui te hui i huihui ki a ia, no ka eke ia ki runga ki te kaipuke, ka noho ki te moana; i uta hoki te mano katoa i te taha o te moana. 2 Ā, he maha āna kupu whakarite i whakaako ai i a rātou, i mea atu hoki ki a rātou i tana whakaakoranga, 3 Whakarongo mai; Nā, i haere atu te kairui ki te rui: 4 Ā, i a ia e rui ana, ka ngahoro ētahi ki te taha o te ara, ā, ka rere mai ngā manu o te rangi, ka kainga. 5 Ko ētahi i ngahoro ki te wāhi kamaka, ki te wāhi kāore i nui te oneone; ā pihi tonu ake, nā te mea kāore i hohonu te oneone: 6 I te whitinga o te rā, ngaua iho; ā, nā te mea kāore he pakiaka, memenge noa iho. 7 Ko ētahi i ngahoro ki roto ki ngā tataramoa, ā, ka tupu ake ngā tataramoa, ka kōwaowao, ā, kore ake he hua. 8 Ko ētahi i ngahoro ki te oneone pai, ā, ka hua; ka tupu, ka nui; ka hua ake, no etahi e toru tekau, no etahi e ono tekau, no etahi kotahi rau. 9 Nā, ka mea ia ki a rātou, Ki te whai taringa te tangata hei whakarongo, kia rongo ia. 10 Ā, i a ia e noho ko ia anake, ka ui atu ki a ia te hunga i tōna taha me te tekau mā rua ki te tikanga o te kupu whakarite. 11 Ka mea ia ki a rātou, Kua hoatu ki a koutou te mārama ki te mea ngaro o te rangatiratanga o te Atua: ki te hunga ia o waho, e meatia ana enei mea katoa i roto i ngā kupu whakarite: 12 Kia titiro noa atu rātou, ā, e kore e kite; kia rongo noa atu, ā, e kore e mātau; kei tahuri, ā, ka murua ō rātou hara. 13 Nā, ka mea ia ki a rātou, Kāore koutou i te mātau ki tēnei kupu whakarite? ā, me pēhea rā koutou ka mātau ai ki ngā kupu whakarite katoa? 14 Ko te kairui e rui ana i te kupu. 15 Ko ēnei te hunga i te taha o te ara, i te wāhi e ruia ana te kupu; i tō rātou rongonga, ka haere tonu mai a Hātana, ka tangohia te kupu i ruia ki roto i ō rātou ngākau. 16 Ko ēnei anō te hunga i ruia ki te oneone kōhatu; ko te hunga, i tō rātou rongonga i te kupu, ka tango tonu i te kupu me te hari; 17 Kāore hoki ō rātou pakiaka, ā, e mau tonu ana mō te wā poto noa iho: muri iho, i te pānga mai o te whakapawera, o te whakatoi rānei mō te kupu, ka hē tonu rātou. 18 Ko ēnei te hunga i ruia ki roto i ngā tataramoa; ko te hunga i rongo ki te kupu,
2
19 Ā, ko te putanga mai o te manukanuka ki tēnei ao, me te tinihanga o ngā taonga, me ngā hiahia ki ērā atu mea, ka kōwaowao i te kupu, ā, kore ake he hua. 20 Ko ēnei te hunga i ruia ki te oneone pai; ko te hunga e rongo ana ki te kupu, ā, e tango ana, ā, e hua ana, ko ētahi e toru tekau, ko ētahi e ono tekau, ko ētahi kotahi rau.
Ruka 8:4-15 4 Nā, i te huihuinga mai o te mano tini, i haere mai hoki ki a ia i roto i ia pā, i ia pā, ka kōrero ia i tētahi kupu whakarite: 5 I haere atu te kairui ki te rui i tana purapura: a, i a ia e rui ana, ka ngahoro etahi ki te taha o te ara; a takahia ana ki raro, kainga ake e nga manu o te rangi. 6 Ko ētahi i ngahoro ki runga ki te toka; ā, i te tupunga ake, kua maroke, kāore hoki i te makuku. 7 Ko ētahi i ngahoro ki roto ki ngā tataramoa; ā, tupu tahi ana ngā tataramoa, ā, kowaowaotia iho. 8 Ko ētahi i ngahoro ki te oneone pai; ā, tupu ake ana, ka hua tata rau ngā hua. Ā, i tana kōrerotanga i ēnei mea, ka karanga ia, Ki te whai taringa ia hei whakarongo, kia rongo ia. 9 Nā ka ui āna ākonga ki a ia, ka mea, He aha te tikanga o tēnei kupu whakarite? 10 Ka mea ia, Kua hoatu ki a koutou te matauranga ki nga mea ngaro o te rangatiratanga o te Atua: ki etahi ia he kupu whakarite: kia kite ai ratou, a e kore e kite, kia rongo ai, a e kore e matau. 11 Nā, ko te kupu whakarite tēnei: Ko te purapura ko te kupu a te Atua. 12Ko ērā i te taha o te huarahi, ko te hunga i whakarongo; kātahi ka haere mai te rewera, ka tango i te kupu i roto i ō rātou ngākau, kei whakapono rātou, ā, ka ora. 13 Ko ērā i runga i te toka, ko te hunga i tango i te kupu me te hari i tō rātou rongonga; kāore hoki ō rātou pakiaka, ka whakapono mō tētahi wā poto, ā, i te wā o te whakamātautau ka taka atu. 14 Ko te mea i ngahoro ki roto ki ngā tataramoa, ko te hunga i rongo, ā, ka haere atu, ka kowaowaotia e ngā manukanuka, e ngā taonga, e ngā ahuareka o te ao, ā, kāore e hua i te hua tika. 15 Ko te hunga ia i te oneone pai, ko te hunga i rongo i te kupu, i pupuri i roto i te ngākau pono, pai, ā, e hua ana i runga i te manawanui.
3