Te Whāngai i te 5000 Matiu 14:13-21 13 Nō te rongonga o Ihu, ka haere atu ia i reira i runga i te kaipuke ki te koraha, ki te wāhi motu ke: ā, nō te rongonga o te mano, ka aru i a ia i runga i te waewae i roto i ngā pā. 14 Ā, ka puta atu a Ihu, ka kite i te huihuinga nui, ka aroha ia ki a rātou, a whakaorangia ana e ia ō rātou tūroro. 15 Ā, nō te ahiahi, ka haere mai āna ākonga ki a ia, ka mea, He wāhi koraha tēnei, kua heke te rā; tonoa atu te mano kia haere ki ngā kāinga ki te hoko kai mā rātou. 16 Nā, ka mea a Ihu ki a rātou, Kāore he take e haere ai rātou; mā koutou e hoatu he kai mā rātou. 17 Ka mea rātou ki a ia, Heoi anō ā mātou taro e rima, me ngā ika e rua. 18 Ka mea ia, Mauria mai ki konei ki ahau. 19 Nā ka mea ia ki te mano kia noho ki runga i te tarutaru, ka tango i ngā taro e rima, i ngā ika e rua, ka titiro ake ki te rangi, ka manaaki, ka whawhati, ā hoatu ana e ia ngā taro ki āna ākonga, ā, hoatu ana e ngā ākonga ki te mano. 20 Ā, kai ana rātou katoa, ā, mākona ana: ā, kotahi tekau mā rua ngā kete i kohia e rātou, kī tonu i ngā whatiwhatinga i toe. 21 Ā, ko te hunga i kai, e rima mano tāne, haunga ngā wāhine me ngā tamariki.
Maka 6:30-44 30 Na ka huihui nga apotoro ki a Ihu, ka korerotia ki a ia nga mea katoa i mea ai ratou, i whakaako ai. 31 Nā ka mea ia ki a rātou, Haere mai tātou ki te koraha, ko tātou anake, kia okioki ai: he tokomaha hoki e haere mai ana, e haere atu ana, ā, kāore i wātea ki a rātou te kai. 32 Ā, haere puku ana rātou ki te koraha i runga i te kaipuke. 33 Ā, i kite te mano i a rātou e haere ana, he tokomaha i mōhio ki a ia, ā, ka oma waewae ki reira i roto i ngā pā katoa, ā, kua tae wawe atu ki mua i a rātou. 34 Ā, i tōna putanga mai ki waho, ka kite ia i te mano tini, ka aroha ki a rātou, i rite hoki rātou ki te hipi kāhore he hepara: ā ka anga ia ki te whakaako i a rātou ki ngā mea maha.
1
35 Nā, kua tō te rā, ka haere mai āna ākonga ki a ia, ka mea, He wāhi koraha tēnei, kua tō te rā: 36 Tukua atu rātou kia haere ki ngā whenua, ki ngā kāinga hoki, ki te hoko taro mā rātou: kāhore hoki ā rātou kai. 37 Nā ka whakahoki ia, ka mea ki a rātou, Hoatu he kai mā rātou. Nā ka mea rātou ki a ia, Me haere rānei mātou ki te hoko taro e rua rau pene, ka hoatu ai he kai mā rātou? 38 Ka mea ia ki a rātou, E hia ā koutou taro? Haere kia kite. Ā, i tō rātou mōhiotanga, ka mea rātou, E rima, me ngā ika e rua. 39 Nā ka mea ia ki a rātou kia meinga rātou katoa kia noho, he rōpū, ki runga i te tarutaru matomato. 40 Nā, ka noho rātou ki raro, he rōpū, he rōpū rau, he rōpū rima tekau. 41 Ā, ka mau ia ki ngā taro e rima, ki ngā ika e rua, ka titiro ake ki te rangi, ka whakapai, ka whawhati i ngā taro, ka hoatu ki āna ākonga kia whakatakotoria ki mua i a rātou; ā, ka tuwhaina e ia ngā ika e rua mā rātou katoa. 42 Ā, kai ana rātou katoa, ā, mākona ana. 43 Ā, kotahi tekau mā rua ngā kete i kohia e rātou, kī tonu i ngā whatiwhatinga, me ngā ika anō hoki. 44 Ā, ko te hunga i kai i ngā taro, e rima mano tāne.
Ruka 9:10-17 10 Ā, i te hokinga mai o ngā apotoro, ka kōrerotia ki a ia ngā mea katoa i mea ai rātou: ā, ka tango ia i a rātou, ka haere ko ia anake ki tētahi wāhi koraha o te pā, ko Petahaira te ingoa. 11 Ā, i te kitenga o te mano, ka aru i a ia: ā, ka manaaki ia i a rātou, ka kōrero ki a rātou mō te rangatiratanga o te Atua, ka whakaorangia hoki e ia te hunga e hiahia ana kia rongoatia. 12 Ā, i te tōnga o te rā, ka haere mai te tekau mā rua, ka mea ki a ia, Tukua te mano kia haere ki ngā kāinga me ngā whenua i tetahi taha, i tetahi taha, ki te moe, ki te hoko kai mā rātou: he koraha hoki tēnei wāhi mō tātou. 13 Nā, ka mea ia ki a rātou, “ Hoatu he kai mā rātou.” Ka mea rātou, “Kāore ā mātou taro e rima, me ngā ika e rua; ki te kore ia mātou e haere ki te hoko kai mā tēnei iwi katoa.” 14 E rima mano pea ngā tāne. Ā, ka mea ia ki āna ākonga, Me noho rātou, kia rima tekau mā rima tekau, he rōpū kotahi. 15 Ā, pera ana rātou, meinga ana rātou katoa kia noho. 16 Nā, ka mau ia ki ngā taro e rima, ki ngā ika e rua, ka titiro ake ki te rangi, ka whakapai i aua mea, ka whawhati, ka hoatu ki ngā ākonga kia whakatakotoria ki te aroaro o te mano. 17 Ā, kai ana rātou, ā, mākona katoa: ā, tekau mā rua ngā kete i kohia ake e rātou, he toenga nā rātou.
Hoani 6:1-14 1 Muri iho i enei mea ka whiti atu a Ihu i te moana o Kariri, ara i te moana o Taipiria. 2 Ā, he nui te hui i aru i a ia, i kite hoki rātou i ana merekara i mea ai ia ki te hunga mate. 3 Na ka haere a Ihu ki runga i te maunga, a noho ana i reira ratou ko ana akonga. 4 Kua tata te kapenga, te hakari a nga Hurai. 5 Ā, ka ara ake ngā kanohi o Ihu, ka kite i te rahi o te hui e haere mai ana ki a ia, ka mea ia ki a Piripi, Kei hea tātou e hoko ai i te taro, kia kai ai ēnei? 6 I mea ia i tēnei hei whakamātautau i a ia: i mōhio hoki ia ki tāna e mea ai. 7 Ka whakahoki a Piripi ki a ia, E kore e ranea mā rātou te taro e rua rau pene, kia whiwhi ai tēnei, tēnei o rātou i tētahi wahi iti. 8 Ka mea tetahi o ana akonga ki a ia, a Anaru, te teina o Haimona Pita, 9 He tamaiti tēnei, e rima āna taro parei, me ngā ika ririki e rua; heoi hei aha ēnei mā tēnei ope nui? 10 Nā ka mea a Ihu, Me mea ngā tāngata kia noho. He nui hoki te tarutaru i taua wāhi. Nā, noho ana ngā tāngata, tata ki te rima mano te tokomaha.
2
11 Na ka mau a Ihu ki nga taro, a ka mutu te whakawhetai, ka tuwha ki nga akonga, a na nga akonga ki te hunga e noho ana; me nga ika ano, ta ratou i pai ai. 12 Ā, nō ka makona rātou, ka mea ia ki āna ākonga, Kohikohia ngā toenga o te taro, kei maumauria tetahi mea. 13 Nā, ka kohikohia e rātou, ā, whakakīia ana ngā kete tekau mā rua ki ngā whatiwhatinga o ngā taro parei e rima, ki ngā toenga a te hunga i kai. 14 A, i te kitenga o aua tāngata i te merekara i meatia e Ihu, ka mea ratou, Ko ia tonu te poropiti e haere mai ana ki te ao.
3