Mam - The Book of the Prophet Obadiah

Abdías CAPÍTULO 1 1 Aju witzic' tzaj ti'j Abdías. Atzun jlu in tma'n Kman Dios cyi'j aj Edom. Ma kbiye tkanil tu'n Kman, ma tzaj sama'n jun sanjel cyxol ke nasyon cyja': Che we'ctze ex ko k'ojlel ti'j tnam lu. 2 Ma tz'oc nk'o'ne ch'in cyxol ke nasyon ex ma che ic'une nimxix. 3 Aju tniman tib'a in cub sbu'na tu'n, aya najl tuj toy' pic ex ma' twa'l; aju in tma'n tuj tanmi: ¿Alcye jacu cub k'onte weye twitz tx'otx'? 4 Masque jaw tniman tiba ic tza'n jun t'iw, ex masque cub tk'u'ja cyxol ke che'w, max ma chixin cbel nk'o'na, chi Kman. 5 Ka ma che ul elek' tuc'ila, ex ka ma che ul elek' te konic'an, ¿tza'n tten ma cub byo'na? ka ma che ul ke chmon uva tuc'ila, ¿mlaypelo cyaj cyk'o'n ch'in twitz uva? 6 ¡Tza'ntzun tten in baj jyet ti'j tcyakilju at te Esaú! tza'n tten in che jyon ti'j ke ti'xti ewan ate'! 7 Cycyakil ke xinak ate' tuc'ila ma che pon k'i'na cyu'n max ttzi mojon, ke xinak ate' tuc'ila tuj txubtxaj ma che cub sbu'na tu'n ex ma cub ti'ja cyu'n; keju in che chyo'n ti'ja in cub cyk'o'n jun c'ixbisabl tjak' txela, ex mi a'l jun xjal at tnabl. 8 Chi Kman: Tuj tk'ijlalil tzul, mlaype che naj ke xjal at cynabl tuj Edom ex ke xjal at cynabl tuj tiwitz tx'otx' tiyjil Esaú? 9 Aya tnam Temán, ke t-soldadiya cyuw cyc'u'j tuj k'oj, ctzajel cyxobil tu'n cynaj cycyakil keju najlke tuj tiwitz tx'otx' tiyjil Esaú. 10 Tu'nju ma tbinchaya mya ba'n ti'j termaniya Jacob, c'oquel tch'ixwiya tu'n, ex bi'x cnajel ti'ja te jumajx. 11 Tuj k'ij tej ttena tuj juntl plaj, tej cyxi k'i'n ke soldad cyu'n stranjer xjal, tej cyocx ke stranjer xjal cyuj ke tpwertil tnam, ex jaw cybyo'n swert ti'j tnam Jerusalén, ax icx teya ic tza'n jun cye. 12 Atzun teya minti'wtlo tz'oc tk'o'na twitza ti'j tk'ijlalil termaniya tuj k'ij tej toc te stranjer xjal; ex minti'wtlo tzalaja cyi'j ke aj Judá tuj tk'ijlalil tej cynaj; ex minti'wtlo yolina tu'n tjaw tniman tib'a tuj tk'ijlalil yajbil. 13 Miwtlo tz'ocxa ttzi tpwertil cytx'otx'e xjal etzan wu'ne tuj k'ij tej ttzaj mya ba'n cyi'j; ax toc, ntiʼ tuʼn toc tqueʼyina cyiʼj tuj tkʼijlal cybix, bix ntiʼ tuʼn tcub tkʼoʼna tkʼaba tiʼj cykʼinumabl tuj kʼij oc cynajsaʼn; 14 Ax icx minti'wtlo cub we'ya ttzi be tu'n cycub tbyo'na keju otok che clet; ex miwtlo che tzaj tk'o'na keju e cyaj ank'in tuj tk'ijlalil yajbil. 15 Porque ch'ix tul tk'ijlalil tu'n tul Kman cyi'j cycyakil nasyon, ex ic tza'nx ma cybinchaye, ax icx cbantel cyi'je; 16 Porque ic tza'n ma che c'ane twi witz xjan wu'ne, icxtzun cycyakil nasyon cucx che c'al c'al, ax toc che c'al ex che bajel wa'n, ex che oquel mer ic tza'n minti' o ten. 17 Pero twi witz Sión ctel colbil, ex at jun xjansbil; ax icx ke tiyjil Jacob c'oquel tajwil cytx'otx'. 18 Ke tiyjil Jacob che oquel ic tza'n jun k'ak', ke tiyjil José che oquel ic tza'n jun k'ak', ex ke tiyjil Esaú che oquel ic tza'n k'ak', ex che oquel ic tza'n k'ak' c'ul ex cbajel tz'e'y cyu'n. ex mi jun tiyjil Esaú cyjel ank'in; porque ate Kman ma k'mante jlu. 19 Ke xjal ate' tuj Néguev che oquel tajwil tiwitz tx'otx' tiyjil Esaú; ex ke aj Filistey najl tuj chk'ajlaj, che oquel tajwil cytx'otx' aj Efraín ex cytx'otx' aj Samaria, atzun ke aj Benjamín che oquel tajwil tx'otx' Galaad. 20 Ke soldad aj Israel otok che'x k'i'n pres, ctzyetel cytx'otx' aj Canaán cyu'n, ex ctzyetel tx'otx' cyu'n max tuj tnam Sarepta. ex ke xjal aj Jerusalén ate' tuj tnam Sefarad, che oquel tajwil ke tnam ate' tuj tx'otx' Néguev. 21 Che jawil jlet ke colol twi witz Sión tu'n tcub cysentens ke tiyjil Esaú. ex te Kman c'oquel cawbil.