Ny fomba amam-panao kristiana amin'ny fanomezana fiantrana Fiantrana - fitafiana, sakafo, na vola omena ny mahantra
Filazantsara Mitandrema mba tsy hanao ny fiantrananareo eo imason'ny olona mba hahitany azy; fa raha izany, dia tsy hahazo valisoa amin'ny Rainareo Izay any an-danitra ianareo. Koa amin'izany, raha manao fiantrana ianareo, dia aza mitsoka trompetra eo anoloanao tahaka ny ataon'ny mpihatsaravelatsihy eo amin'ny synagoga sy eny an-dalambe mba hankalazan'ny olona azy. Lazaiko aminareo marina tokoa: Efa azony ny valisoany. Fa raha manao fiantrana kosa ianao, dia aza avela ho fantatry ny tananao ankavia izay ataon'ny tananao ankavanana, mba hatao ao amin'ny mangingina ny fiantranao; ary ny Rainao, Izay mahita ao amin'ny mangingina, no hamaly soa anao. Matio 6:1-4 Ary Jesosy namaly ka nanao hoe: Nisy lehilahy iray nidina avy tany Jerosalema ho any Jeriko ka azon'ny jiolahy, dia nendahin'ireo ny lambany sady nokapohiny izy, dia lasa, namela azy efa ho faty. Ary sendra nidina tamin'izany lalana izany ny mpisorona iray; ary raha nahita azy izy, dia nandalo teny ampitan'ny lalana. Ary toy izany koa ny Levita anankiray, izay tonga teo amin'izany toerana izany, dia nahita azy, nefa nandalo teny ampitan'ny lalana ihany koa. Fa Samaritana anankiray kosa, raha nandeha teny an-dalana, dia tonga teo aminy; ary raha nahita azy izy, dia onena azy. Dia nanatona azy izy, dia nofeheziny ny feriny, sady nandraraka diloilo sy divay, dia nampitaingeniny tamin'ny bibiny, ka nentiny tany amin'ny tranom-bahiny izy, dia nokarakarainy. Ary nony ampitson'iny, dia naka denaria roa izy, ka nomeny ny tompon-trano, ary hoy izy taminy: Karakarao izy; ary na inona na inona laninao mihoatra noho izany, dia honerako rehefa miverina aho. Iza amin'ireto telo ireto no heverinao ho naman'ilay azon'ny jiolahy? Dia hoy izy: Ilay niantra azy. Dia hoy Jesosy taminy: Mandehana ianao, ka mba manaova toy izany koa. Lioka 10:30-37 Fa aleo izay anananareo no omeo fiantrana, dia, indro, madio ho anareo ny zavatra rehetra. Lioka 11:41 Amidio izay anananareo, ka manaova fiantrana; manaova kitapom-bola tsy mety ho tonta ho anareo, dia harena any an-danitra tsy mety ho lany, izay tsy azon'ny mpangalatra hatonina, sady tsy misy kalalao manimba. Fa izay misy ny harenareo, dia ho any koa ny fonareo. Lioka 12:33-34